ଘର ଭିତରୁ ମହିଳାଙ୍କ ରକ୍ତାକ୍ତ ମୃତଦେହ ଉଦ୍ଧାର: ହତ୍ୟା ସନ୍ଦେହରେ ଥାନାରେ ପୁଅ ଅଟକ

ଭଞ୍ଜନଗର: ଗଞ୍ଜାମ ଜିଲ୍ଲା ତାରାସିଙ୍ଗି ଥାନା ଅନ୍ତର୍ଗତ ଗଜାପଦର ଗାଁରେ ଆଜି ସକାଳେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଏଠାରେ ନିଜ ଘର ଭିତରୁ ଜଣେ ମହିଳାଙ୍କ ରକ୍ତାକ୍ତ ମୃତଦେହ ଉଦ୍ଧାର କରାଯାଇଛି।ବିଳମ୍ବିତ ରାତିରେ କେହି ଉକ୍ତ ମହିଳାଙ୍କ ହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାଯାଇଛି। ମୃତ ମହିଳାଜଣକ ହେଲେ ତ୍ରିବେଣୀ ନାୟକ(୫୦)।

ସୂଚନା ମୁତାବକ ତ୍ରିବେଣୀ ନିଜ ପୁଅ ସନା ନାୟକ ସହିତ ଘରେ ରହୁଥିଲେ। ଗତକାଲି ରାତିରେ ମା ପୁଅକୁ ଟଙ୍କା ନ ଦେବାରୁ ଉଭୟଙ୍କ ମଧ୍ୟରେ ଝଗଡ଼ା ଲାଗିଥିଲା।ଆଜି ସକାଳୁ ମା ର ମୃତଦେହ ଘରେ ପଡ଼ିଥିବା ଦେଖି ପଡୋଶୀ ଲୋକେ ପୁଲିସକୁ ଖବର ଦେଇଥିଲେ। ମାଆଙ୍କୁ ହତ୍ୟା ସନ୍ଦେହରେ ମୃତ ମହିଳାଙ୍କ ପୁଅକୁ ଥାନାରେ ଅଟକ ରଖି ପୁଲିସ ପଚରାଉଚରା କରୁଥିବାର ସୂଚନା ମିଳିଛି। ଏହି ଘଟଣା ସେହି ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।