ଖଡ଼ିଆଲ: ନୂଆପଡା ଜିଲ୍ଲା ବୋଡେନ ବ୍ଲକ ଫରସରା ପଞ୍ଚାୟତ ବକୁଲିଖୁଣ୍ଟି ସଂଗରୋଧ କେନ୍ଦ୍ରରେ ରହୁଥିବା ଜଣେ ପ୍ରବାସୀ ଓଡିଆ ଶ୍ରମିକ ଏକ ଶିଶୁ କନ୍ୟା ଜନ୍ମ କରିଛନ୍ତି । ଗତ ୨୦ ତାରିଖରେ ହାଇଦ୍ରାବାଦରୁ ୬୫ ଜଣ ପ୍ରବାସୀ ଓଡିଆ ଶ୍ରମିକ ବୋଡେନ ବ୍ଲକକୁ ଆସିଥିଲେ । ସମସ୍ତ ପ୍ରବାସୀ ଶ୍ରମିକମାନଙ୍କୁ ଫରସରା ପଞ୍ଚାୟତର ବକୁଲିଖୁଣ୍ଟି ସଂଗରୋଧ କେନ୍ଦ୍ରରେ ରଖାଯାଇଥିଲା । ଏମାନଙ୍କ ମଧ୍ୟରେ ରୋକାଲ ଗାଁର ନରେନ୍ଦ୍ର ମାଝୀ ଓ ତାଙ୍କ ସ୍ତ୍ରୀ ଭାଗ୍ୟ ମାଝୀ ମଧ୍ୟ ଥିଲେ । ଭାଗ୍ୟ ଗର୍ଭବତୀ ଥିଲେ । କାଲି ସନ୍ଧ୍ୟାରେ ହଠାତ ତାଙ୍କର ପ୍ରସବ ଜନିତ ଯନ୍ତ୍ରଣା ହୋଇଥିଲା । ତାଙ୍କୁ ଆମ୍ବୁଲାନ୍ସରେ ବୋଡେନ ସରପଞ୍ଚ ଓ ଇଓ ବୋଡେନ ସରକାରୀ ମେଡିକାଲରେ ଥିବା ଆଇସୋଲେସନ୍ ୱାଡରେ ଭର୍ତ୍ତି କରିଥିଲେ । ରାତିରେ ତାଙ୍କର ଏକ ଶିଶୁ କନ୍ୟା ଜନ୍ମ ହୋଇଥିଲା । ଏବେ ମାଁ ଓ ଶିଶୁ ଦୁହେଁ ସୁସ୍ଥ ଅଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଦିନକ ପୂର୍ବରୁ ବଲାଙ୍ଗୀର ଜିଲ୍ଲାର ଜଣେ ମହିଳା ତେଲେଙ୍ଗାନାର ସିକିନ୍ଦରରାବାଦ ଠାରୁ ଶ୍ରମିକ ସ୍ୱତନ୍ତ୍ର ଟ୍ରେନରେ ବଲାଙ୍ଗୀର ଆସୁଥିବା ବେଳେ ଶିଶୁପୁତ୍ର ଜନ୍ମ କରିଥିଲେ । ବଲାଙ୍ଗୀର ଜିଲ୍ଲାର ତୁରେକେଲା ବ୍ଲକ କମେଇମୁଣ୍ଡା ଗାଁର ଧୁବଲେ ନାଗ ତାଙ୍କ ପରିବାର ସହ ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ । ସେଠାରେ ଲକଡାଉନ ପରେ ସେ ଫସି ରହିଥିଲେ । ସ୍ତ୍ରୀ କୁନ୍ତି ନାଗ ଗର୍ଭବତୀ ଥିବାରୁ ସେ ଚିନ୍ତିତ ଥିଲେ । ପଂଜିକରଣ କରାଇ ନିଜ ଗାଁକୁ ଫେରିବାକୁ ଉଦ୍ୟମ କରିଥିଲେ । ଗର୍ଭବତୀ ସ୍ତ୍ରୀ ସହ ଟ୍ରେନରେ ସେ ଆଜି ଫେରୁଥିବା ବେଲେ ହଠାତ ବଲାଙ୍ଗୀର ଷ୍ଟେସନ ପାଖାପାଖି ହେବା ପରେ ତାଙ୍କ ସ୍ତ୍ରୀଙ୍କ କଷ୍ଟ ବଢିଥିଲା ଓ ସେ ଟ୍ରେନରେ ହିଁ ଏକ ଶିଶୁ ପୁତ୍ର ଜନ୍ମ ଦେଇଥିଲେ । ଏହା ଜାଣିବା ପରେ ଟ୍ରେନରେ ଉପସ୍ଥିତ କର୍ମଚାରୀମାନେ ବଲାଙ୍ଗୀର ଷ୍ଟେସନ କର୍ତ୍ତୃପକ୍ଷଙ୍କୁ ଖବର କରିଥିଲେ ।