ବାଲିଅନ୍ତା: ସ୍ଥାନୀୟ କାକରୁଦ୍ରପୁର ପୋଲ ନିକଟରେ ଗତ ରାତିରେ ପାଟ୍ରୋଲିଂ କରୁଥିବା ପିସିଆର ଗାଡ଼ିରେ କାର୍ଯ୍ୟରତ ଜଣେ ପୁଲିସ ଅଧିକାରୀଙ୍କ ମାଡ଼ରେ ଜଣେ ହାଇୱା ଚାଳକ ଗୁରୁତର ଆହତ ହେବା ଘଟଣା ଚର୍ଚ୍ଚାର ବିଷୟ ହୋଇଛି । ଆହତ ଚାଳକ ହେଲେ ପୁରୀ ଜିଲ୍ଲା କାକଟପୁର ଥାନା ଅଞ୍ଚଳର ଲିଟୁ ସ୍ବାଇଁ (୩୦) । ଲିଟୁଙ୍କ ଗୋଡ଼ , ହାତ , ଛାତି ଏବଂ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଛି । ଖବର ପାଇ ହାଇୱା ମାଲିକ ଆହତ ଲିଟୁଙ୍କୁ ଉଦ୍ଦାର କରି ଚିକିତ୍ସା ଲାଗି ବାଲିପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ । ହେଲେ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ତାଙ୍କ ଗୋଡ଼ ବ୍ୟାଣ୍ଡେଜ ହୋଇଥିବା ବେଳେ ଶରୀର କ୍ଷତାକ୍ତ ହୋଇଛି । ଖବର ପାଇ ଲିଟୁଙ୍କ ପତ୍ନୀ ଶ୍ରଦ୍ଧାଞ୍ଜଳୀ ଓ କୁନି ଝିଅ ହସ୍ପିଟାଲରେ ପହଞ୍ଚିଥିଲେ ।
Sambad is now on WhatsApp
Join and get latest news updates delivered to you via WhatsApp
ଏନେଇ ଶ୍ରଦ୍ଧାଞ୍ଜଳୀ ଆଜି ଅପରାହ୍ନରେ ବାଲିଅନ୍ତା ଥାନାରେ ଲିଖିତ ଅଭିଯୋଗ କରିବା ପରେ ଥାନା ଅଧିକାରୀ ଘଟଣାକୁ ଗୁରୁତର ସହ ନେଇ ହସ୍ପିଟାଲରେ ପହଞ୍ଚି ତଦନ୍ତ କରାଇଛନ୍ତି । ହେଲେ ରିପୋର୍ଟ ଲେଖା ହେବା ବେଳକୁ ଥାନାରେ ଏନେଇ ମାମଲା ରୁଜୁ ହୋଇନଥିବା ଜଣାପଡ଼ିଛି । ରାକେଶ ସାମନ୍ତରାୟ ନାମକ ଜଣେ ପୁଲିସ ଅଧିକାରୀ ମାଡ଼ମାରି ଥିବା ଅଭିଯୋଗରେ ଦର୍ଶାଯାଇଛି ।
ପ୍ରାପ୍ତ ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ବାଲିଅନ୍ତା ଥାନା ପିସିଆର ଗାଡ଼ି କାକରୁଦ୍ରପୁର ଏବଂ ପ୍ରତାପରୁଦ୍ରପୁର ଅଞ୍ଚଳରେ ପାଟ୍ରୋଲିଂ କରୁଥିଲେ । ସେହି ସମୟରେ ଲିଟୁ ହାଇୱାରେ ବାଲିନେଇ ଯାଉଥିବା ବେଳେ କାକରୁଦ୍ରପୁର ବ୍ରିଜ ନିକଟରେ ପିସିଆର ଭ୍ୟାନରେ ଥିବା ସଂପୃକ୍ତ ପୁଲିସ ଅଧିକାରୀ ତାଙ୍କୁ ଅଟକାଇ ଗାଡ଼ି କାଗଜପତ୍ର ଓ ଡ୍ରାଇଭିଂ ଲାଇସେନ୍ସ ଯାଞ୍ଚ କରିଥିଲେ । ୱାଇ ଫର୍ମ ଦେଖାଇବାକୁ ତାଙ୍କୁ କହିଥିଲେ । ହେଲେ ଲିଟୁ ଗାଡ଼ିର ସମସ୍ତ କାଗଜପତ୍ର ଓ ୱାଇଫର୍ମ ତାଙ୍କୁ ଦେଖାଇବା ସତ୍ବେ ୧୦୦୦ ଟଙ୍କା ଜରିମାନା ମାଗିଥିଲେ । ଏନେଇ ଲିଟୁ ଓ ପୁଲିସ ଅଧିକାରୀଙ୍କ ମଧ୍ୟରେ ଭୀଷଣ ଯୁକ୍ତିତର୍କ ହୋଇଥିଲା । ଏଥିରେ ଉତକ୍ଷିପ୍ତ ହୋଇ ପୁଲିସ ତାଙ୍କୁ ବାଡ଼ିରେ ପିଟି ଆହତ କରିଥିବା ଏତଲାରେ ଉଲ୍ଲେଖ ହୋଇଛି ।