ବାଲିଗୁଡାରେ ଲଗାଣ ବର୍ଷା, ପୁଣି ଧୋଇଲା ୫୯ ନମ୍ବର ଜାତୀୟ ରାଜପଥର ଡାଇଭରସନ

ତୁମୁଡିବନ୍ଧ: କନ୍ଧମାଳ ଜିଲ୍ଲାରେ ମଙ୍ଗଳବାର ଦିନ ତମାମ ଲଗାଣ ବର୍ଷା ଫଳରେ ବାଲିଗୁଡା ଅଞ୍ଚଳର ବିଭିନ୍ନ ରାସ୍ତା ଧୋଇ ହୋଇଯିବା ଫଳରେ ଯାତାୟତ ପ୍ରଭାବିତ ହୋଇଛି। ବାଲିଗୁଡା ଦେଇ ଯାଇଥିବା ୫୯ ନମ୍ବର ଜାତୀୟ ରାଜପଥ ରାଟଗୁଡ଼ା ଓ ମଣ୍ଡଳପଦର ନିକଟରେ ଡାଇଭର୍ସନ ଧୋଇ ହୋଇ ଯାଇଥିଲା କିନ୍ତୁ ରାଟଗୁଡ଼ା ନିକଟରେ ଡାଇଭର୍ସନଟି ମାଟି ପକାଇ ଦେବା ଫଳରେ ଗାଡି ଚଳାଚଳ ସ୍ୱାଭାବିକ ହୋଇଥିବା ବେଳେ ମଣ୍ଡଳପଦର ନିକଟରେ ଏବେବି ବିଛିନ୍ନ ହୋଇଛି । ଯାହାଫଳରେ କନ୍ଧମାଳ-କଳାହାଣ୍ଡିକୁ ଯୋଗାଯୋଗ ବିଛିନ୍ନ ହୋଇଛି।

ସେହିପରି ତୁମୁଡିବନ୍ଧ ବ୍ଲକର କୁର୍ତ୍ତମଗଡ଼ ନିକଟ ସ୍ଲିକି ଠାରେ ଏକ ବ୍ରିଜ ଭାଙ୍ଗି ଯିବା ଫଳରେ ସିଲକ୍ଷ ଓ ପାରିଗଡ଼ ଦୁଇଟି ପଞ୍ଚାୟତରେ ରହିଥିବା ୧୦ ହଜାର ଲୋକ ମୁଖ୍ୟ ବଜାର ବାଲିଗୁଡା, ତୁମୁଡିବନ୍ଧ ଓ କୋଟଗଡକୁ ଯୋଗାଯୋଗ ବିଛିନ୍ନ ହୋଇଛି।

ଜିଲ୍ଲାର ଚାଉଳ ଧୁଆ ଓ ଉତ୍ତେଇ ନଦୀରେ ପାଣି ଆସିବାରୁ ଝିରୀପାଣି, ଲଙ୍କାଗଡ ଓ ଭଣ୍ଡାରଙ୍ଗି ୩ ପଞ୍ଚାୟତରେ ରହୁଥିବା ପ୍ରାୟ ୨୦ ହଜାର ଲୋକ ପ୍ରଭାବିତ ହୋଇଛନ୍ତି। ତୁମୁଡିବନ୍ଧ ମୁଖ୍ୟ ବଜାର ଦେଇ ଯାଇଥିବା ଟୁରି ନାଳର ପାଣି ମଧ୍ୟ ପ୍ରବଳ ଆସିବାରୁ ବଡ ସାହିର କିଛି ପରିବାର ଘରେ ପାଣି ପଶିଯାଇ ଥିବାମଧ୍ୟ ଖବର ମିଳିଛି।