କଳିଙ୍ଗାଘାଟିରେ ଲୁହାଚଦର ବୋଝେଇ ଟ୍ରକ୍‌ ଦୁର୍ଘଟଣାଗ୍ରସ୍ତ: ହେଲ୍‌ପର ମୃତ, ଚାଳକ ଗୁରୁତର

ଘୁ.ଉଦୟଗିରି: କନ୍ଧମାଳ ଜିଲ୍ଲା ଘୁମୁସର ଉଦୟଗିରି ବ୍ଲକ କଳିଙ୍ଗା ଛକ ଠାରୁ ମାତ୍ର ୩ କିଲୋମିଟର ଦୂର କଳିଙ୍ଗାଘାଟିର ପ୍ରଥମ ବୁଲାଣିରେ ୧୨ ଚକିଆ ଏକ ଲୁହା ଚଦର ବୋଝେଇ ଟ୍ରକ୍‌ (ଏପି ୦୩ ଟିଇ ୭୮୭୯) ଦୁର୍ଘଟଣାଗ୍ରସ୍ତ ହୋଇଛି। ଘଟଣାସ୍ଥଳରେ ହେଲପରଙ୍କ ମୃତ୍ୟୁ ହୋଇଥିବା ବେଳେ ଡ୍ରାଇଭର ସଂପୂର୍ଣ୍ଣ ଗୁରୁତର ଅଛନ୍ତି। ଗୁରୁତର ଟ୍ରକ୍‌ ଚାଳକଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି।

ଟ୍ରକ୍‌ ଦୁର୍ଘଟଣା ନେଇ ସୂଚନା ମିଳିବା ପରେ ଅଗ୍ନିଶମ ବିଭାଗର ଶିବରାମ ବିଶ୍ଵାଳ, ସଞ୍ଜୀବ ବିଶୋୟୀ, ରାମଚନ୍ଦ୍ର ଗୌଡ଼, ତ୍ରିନାଥ ରେଡ୍ଡି, ସୀତାକାନ୍ତ ସ୍ୱାଇଁ, ଦିବ୍ୟରଞ୍ଜନ ରାଉତ ପହଞ୍ଚି ଲୁହା ଚଦର ବଝେଇ ଟ୍ରକରୁ କଟର ମାଧ୍ୟମରେ ଗାଡ଼ିକୁ କାଟି ଡ୍ରାଇଭରକୁ ସୁରକ୍ଷିତ ଭାବେ ଉଦ୍ଧାର କରି ୧୦୮ ଆମ୍ବୁଲାନ୍ସ ମାଧ୍ୟମରେ ଘୁ.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଇଛି। ଘଟଣା ସ୍ଥଳରେ ଘୁ.ଉଦୟଗିରି ଆଦର୍ଶ ଥାନା ଏସଆଇ ଅନନ୍ତ କୁମାର ପ୍ରଧାନ ପହଞ୍ଚି ଅଧିକ ତଦନ୍ତ କରୁଥିବା ସୂଚନା ମିଳିଛି।