୬୦ ବର୍ଷର ଶିକ୍ଷାନୁଷ୍ଠାନ ନୀଳମଣି ସରକାରୀ ଉଚ୍ଚବିଦ୍ୟାଳୟ: ୬ ଶିକ୍ଷକ ପଦ ଖାଲି, ଖେଳପଡ଼ିଆ ନାହିଁ
ନିଆଳି: ନିଆଳିସ୍ଥିତ ୬୦ ବର୍ଷର ଶିକ୍ଷାନୁଷ୍ଠାନ ନୀଳମଣି ସରକାରୀ ଉଚ୍ଚବିଦ୍ୟାଳୟରେ ୬ଟି ଶିକ୍ଷକ ପଦବି ଖାଲି ପଡିଛି। ଏହାଛଡ଼ା ବିଦ୍ୟାଳୟର ଖେଳପଡ଼ିଆ କି ପାଚେରି ବି ନାହିଁ। ଏହାକୁ ନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି।
୧୯୬୧ ମସିହାରେ ଧୋୟାଅଞ୍ଚଳର ଗାନ୍ଧୀ ଭାବେ ପରିଚିତ ସ୍ବର୍ଗତ ନୀଳମଣି ପ୍ରଧାନଙ୍କ ସ୍ମୃତି ଉଦ୍ଦେଶ୍ୟରେ ସ୍ଥାପିତ ଏହି ବିଦ୍ୟାଳୟର ବହୁ ଛାତ୍ରୀ ରାଜ୍ୟ ତଥା ଓଡ଼ିଶା ବାହାରେ ଗୁରୁତ୍ବପୂର୍ଣ୍ଣ ପଦପଦବିରେ ଅଧିଷ୍ଠିତ। ଏକଦା ଅଞ୍ଚଳରେ ସୁନାମ ଅର୍ଜନ କରିଥିବା ଏହି ବିଦ୍ୟାଳୟରେ ଏବେ ଶିକ୍ଷକ ଅଭାବ ଯୋଗୁ ଶିକ୍ଷାଦାନ ବିପର୍ଯ୍ୟସ୍ତ ହୋଇ ପଡିଛି। କରୋନା ମହାମାରୀ ଯୋଗୁ ଗତ ଦୁଇ ବର୍ଷ ହେଲା ବିଭିନ୍ନ ସମୟରେ ବିଦ୍ୟାଳୟ ବନ୍ଦ ରହିଥିଲା। ଏବେ ବିଦ୍ୟାଳୟ ଖୋଲିବା ସହ ଅଷ୍ଟମ, ନବମ ଓ ଦଶମ ଶ୍ରେଣୀ ପାଠପଢା ଆରମ୍ଭ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଏଠାରେ ପ୍ରଥମରୁ ଦଶମ ଶ୍ରେଣୀରେ ମୋଟ ୩୩୫ ଛାତ୍ରଛାତ୍ରୀ ପଢୁଛନ୍ତି। ତେବେ ୧୪ ଜଣ ଶିକ୍ଷକଶିକ୍ଷୟତ୍ରୀଙ୍କ ସ୍ଥାନରେ ଅଛନ୍ତି ମାତ୍ର ୮ ଜଣ। ପିସିଏମ୍, ସିବିଜେଡ୍, ସଂସ୍କୃତ, ଟିଆଇ, ବିଏ-ସିଟି ଶିକ୍ଷକ ପଦବି ଖାଲି ପଡିଛି। ସେହିପରି ଚତୁର୍ଥ ଶ୍ରେଣୀ କର୍ମଚାରୀ ପଦବି ବି ଖାଲି ପଡିଛି ବୋଲି ପ୍ରଧାନ ଶିକ୍ଷକ ଧନଞ୍ଜୟ ମଲ୍ଲିକ ସୂଚନା ଦେଇଛନ୍ତି। ସେହିପରି ଖେଳ ପଡିଆ ଓ ବିଦ୍ୟାଳୟ ସୁରକ୍ଷା ପାଇଁ ପାଚେରି ବି ନାହିଁ। ଏନେଇ ଅଭିଭାବକ ଓ ପୁରାତନ ଛାତ୍ରଛାତ୍ରୀ କ୍ଷୋଭ ପ୍ରକାଶ କରିବା ସହ ତୁରନ୍ତ ଶିକ୍ଷକ ପଦବି ପୂରଣ କରିବାକୁ ଦାବି କରିଛନ୍ତି।