କାଳିଆପାଣି : ଲଗାଣ ବର୍ଷାରେ ସୁକିନ୍ଦା ତହସିଲ କାଙ୍କଡ଼ପାଳ ସର୍କଲ ରାଁସୋଳ ପଞ୍ଚାୟତ ୨ ନମ୍ବର ୱାର୍ଡ କଲରଙ୍ଗି କୁମାରଡ଼ି ଗାଁର ୨ ଦିନ ମଜୁରିଆ ଗରିବ ଆଦିବାସୀ ପରିବାର ବେଘରହୋଇ ଗାଁର କ୍ଲବ୍ ଘରେ ମୁଣ୍ଡ ଗୁଞ୍ଜିଛନ୍ତି। ମାମୁ-ଭଣଜା ଧନେଶ୍ବର ମୁଣ୍ଡା ଓ ଅଜିତ ମୁଣ୍ଡାଙ୍କ ୪ ବଖରା ଝାଟିମାଟି ଏବଂ ଛଣଛପର ଘର ସଂପୂର୍ଣ୍ଣ ମାଟିରେ ଲୋଟିଯାଇଛି। ଘରେ ଥିବା ଧନେଶ୍ବର, ତାଙ୍କ ପତ୍ନୀ ଲକ୍ଷ୍ମୀ, ଝିଅ ଜେମା, ୨ ପୁଅ ବାପୁନ ଓ ନରୋତ୍ତମ ଏବଂ ଅଜିତ, ତାଙ୍କ ସ୍ତ୍ରୀ ସଂଯୁକ୍ତା, ୨ ପୁଅ ସମ୍ବିତ ଓ ଲଳିତ ଅଳ୍ପକେ ବର୍ତ୍ତି ଯାଇଛନ୍ତି। ଆସବାବପତ୍ର, ଲୁଗାପଟା ଓ ସଞ୍ଚିତ ଖାଦ୍ୟଶସ୍ୟ ସବୁ ମାଟିତଳେ ଚାପି ହୋଇଯାଇଛି। କୌଣସି ସାମଗ୍ରୀ ଉଦ୍ଧାର ହୋଇନଥିବା ୨ ପରିବାର କହିଛନ୍ତି।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
ଶ୍ରମିକନେତା ନାରାୟଣ ଚନ୍ଦ୍ର ଧୀର, ସରପଞ୍ଚ କନକଲତା ସର୍ଦ୍ଦାର, ଜଗବନ୍ଧୁ ମହାନ୍ତ, ଲାଲମୋହନ ମୁଣ୍ଡା ପ୍ରମୁଖ ସେମାନଙ୍କ ପାଖରେ ପହଞ୍ଚି ସପ୍ତାହକ ପାଇଁ ଚୁଡ଼ା, ଗୁଡ଼, ଚାଉଳ, ବିସ୍କୁଟ୍ ଓ ତେଜରାତି ସାମଗ୍ରୀ ପ୍ରଦାନ କରିଛନ୍ତି। ତେବେ ପ୍ରଶାସନ ପକ୍ଷରୁ ଏଯାଏ କୌଣସି ସହାୟତା ମିଳିନଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ୨ ପ୍ରଭାବିତ ପରିବାରକୁ ଶୀଘ୍ର କ୍ଷୟକ୍ଷତି ଆକଳନ ପୂର୍ବକ କ୍ଷତିପୂରଣ ପ୍ରଦାନ ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ଯୋଗାଇ ଦେବାକୁ ଶ୍ରମିକନେତା ଶ୍ରୀ ଧୀର ଦାବି କରିଛନ୍ତି।