ଶିକାରୀ ଗିରଫ, ଦେଶୀ ବନ୍ଧୁକ ସହ କୁଟୁରା ମାଂସ ଜବତ

ବୌଦ୍ଧ: ବୌଦ୍ଧ ରେଞ୍ଜ ବାଙ୍କମୁଣ୍ଡି ସଂରକ୍ଷିତ ଜଙ୍ଗଲରେ ବନ ବିଭାଗ କର୍ମଚାରୀ ଗୁରୁବାର ରାତିରେ ଜଣେ ଶିକାରୀଙ୍କୁ କାବୁ କରିବା ସହିତ କୁଟୁରା ମାଂସ ଓ ଦେଶୀ ବନ୍ଧୁକ ଜବତ କରିଛି।

ବିଭାଗୀୟ ସୂଚନା ଅନୁସାରେ, ବୌଦ୍ଧ ରେଞ୍ଜ ବାଙ୍କମୁଣ୍ଡି ସଂରକ୍ଷିତ ଜଙ୍ଗଲର ୩ ନଂ କମ୍ପାର୍ଟମେଣ୍ଟରେ ଗୁରୁବାର ରାତିରେ ବନ ବିଭାଗ ପକ୍ଷରୁ ପାଟ୍ରୋଲିଂ କରାଯାଉଥିଲା। ରାତି ପ୍ରାୟ ୧୧ଟାରେ ଜଙ୍ଗଲ ମଧ୍ୟରେ ଜଣେ ବ୍ୟକ୍ତିଙ୍କୁ ଦେଖି କାବୁ କରିଥିଲେ। ତଲାସି କରିବାରେ ତାଙ୍କ ପାଖରୁ ଏକ ଦେଶୀ ବନ୍ଧୁକ, ଗୋଟିଏ ଟାଙ୍ଗିଆ, କଟୁରି ଓ କୁଟୁରା ମାଂସ ମିଳିଛି। ଜବତ ମାଂସର ଓଜନ ୮ କେଜି ୧୦୦ ଗ୍ରାମ।

ଏଥି ସହିତ ଗୋଟିଏ ଟର୍ଚ୍ଚ ଲାଇଟ, ବନ୍ଧୁକ ପାଉଡ଼ର ଓ ଦୁଇଟି ଗାମୁଛା ଜବତ କରାଯାଇଛି। ଅଭିଯୁକ୍ତ ବୌଦ୍ଧ ଥାନା ବୀରନରସିଂହପୁର ନିକଟ ନୂଆପଡ଼ାର ସଭାଜନ ପ୍ରଧାନ (୬୦)ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଏସିଏଫ୍‌ ଆଶିଷ କହଁର ସୂଚନା ଦେଇଛନ୍ତି। ଚଢ଼ଉରେ ଏସିଏଫ୍‌ ଶ୍ରୀ କହଁରଙ୍କ ସହ ଫରେଷ୍ଟର ସ୍ବାଧୀନ ସାମଲ, ଫରେଷ୍ଟ ଗାର୍ଡ ପ୍ରକାଶ ପ୍ରଧାନ ଓ ସ୍କ୍ବାଡ୍‌ ସାମିଲ ହୋଇଥିଲେ।