ଖୋର୍ଦ୍ଧା: ରାଜ୍ୟ ରାଜଧାନୀର ଜିଲ୍ଲା ଖୋର୍ଦ୍ଧା, କିନ୍ତୁ ପ୍ରଶାସନିକ ବ୍ୟବସ୍ଥାରେ ଗତ କିଛି ବର୍ଷ ଧରି ଏଠାରେ ଜିଲ୍ଲାପାଳ, ଆରକ୍ଷୀ ଅଧୀକ୍ଷକ, ଉପଜିଲ୍ଲାପାଳ ଆଦି ପ୍ରମୁଖ ପଦବୀରେ ରାଜ୍ୟ ପ୍ରାଶାସନିକ ସେବା (ଓଏଏସ୍)ର ବରିଷ୍ଠ ଅଧିକାରୀଙ୍କୁ ନିଯୁକ୍ତି ଦିଆଯାଉଥିଲା । ଆଜି ନୂତନ ଜିଲ୍ଲାପାଳ ଭାବେ ବାଲେଶ୍ୱର ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତୀଙ୍କୁ ନିଯୁକ୍ତି ଦିଆଯାଇଛି । ଫଳରେ ପ୍ରାୟ ୩ ବର୍ଷ ପରେ ଜିଲ୍ଲାପାଳ ପଦବିରେ ଭାରତୀୟ ପ୍ରାଶାସନିକ ସେବା ପାହ୍ୟାର ଅଧିକାରୀ ଦାୟିତ୍ୱ ସମ୍ଭାଳିବେ ।
ଆଜି ରାଜ୍ୟ ସରକାରଙ୍କ ବିଜ୍ଞପ୍ତି ଅନୁସାରେ, ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କୁ ରାଜ୍ୟ ଆଦର୍ଶ ବିଦ୍ୟାଳୟର ପ୍ରକଳ୍ପ ନିଦେ୍ର୍ଦଶକ ଭାବେ ବଦଳି କରାଯାଇଥିବା ବେଳେ ବାଲେଶ୍ୱରର ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତୀଙ୍କୁ ଖୋର୍ଦ୍ଧା ଜିଲ୍ଲାପାଳ ଭାବେ ନିଯୁକ୍ତି ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
୨୦୧୯ ଫନି ବାତ୍ୟା ସମୟରେ ତତ୍କାଳୀନ ଜିଲ୍ଲାପାଳ ନିର୍ମଳ ମିଶ୍ରଙ୍କ ବିବାଦୀୟ ବଦଳି ପରେ ଆଇଏଏସ୍ ଅଧିକାରୀ ଭୂପେନ୍ଦର ସିଂହ ପୁନିଆ ମାତ୍ର ୧ ମାସ ଦାୟିତ୍ୱ ସମ୍ଭାଳିଥିଲେ । ଶ୍ରୀ ପୁନିଆଙ୍କ ବଦଳି ପରେ ଜିଲ୍ଲାରେ ୩ ବର୍ଷ ମଧ୍ୟରେ ତିନିଜଣ କ୍ରମାନ୍ୱୟରେ ବରିଷ୍ଠ ଓଏଏସ୍ ଅଧିକାରୀ ଜିଲ୍ଲାପାଳ ଭାବେ ଦାୟିତ୍ୱ ସମ୍ଭାଳିଥିଲେ । ଶ୍ରୀ ପୁନିଆଙ୍କ ପରେ ସୀତାଂଶୁ କୁମାର ରାଉତ ୧ ବର୍ଷ ୨ ମାସ, ସନତ କୁମାର ମହାନ୍ତି ୧ ବର୍ଷ ୨ ମାସ ଦାୟିତ୍ୱ ସମ୍ଭାଳି ଥିବା ବେଳେ ସଂଗ୍ରାମ କେଶରୀ ମହାପାତ୍ର ୮ ମାସ ଦାୟିତ୍ୱ ସମ୍ଭାଳି ଛନ୍ତି । ଅର୍ଥାତ୍ ୩ବର୍ଷ ପରେ ବର୍ତମାନ ଜିଲ୍ଲାରେ ଜଣେ ଆଇଏଏସ୍ ପାହ୍ୟାର ଅଧିକାରୀଙ୍କୁ ଜିଲ୍ଲାପାଳ ଦାୟିତ୍ୱ ଦିଆଯାଇଛି ।
ସେହିଭଳି ଜିଲ୍ଲାର ଆରକ୍ଷୀ ଅଧୀକ୍ଷକ ଭାବେ ଦୁଇ ମାସ ପୂର୍ବେ ଆଇପିଏସ୍ ଅଧିକାରୀ ସିଦ୍ଧାର୍ଥ କଟ୍ଟାରିଆ ଦାୟିତ୍ୱ ସମ୍ଭାଳିଛନ୍ତି । ଖୋର୍ଦ୍ଧା ସ୍ୱତନ୍ତ୍ର ପୁଲିସ ଜିଲ୍ଲା ଗଠନ ହେବା ପରଠାରୁ ଅର୍ଥାତ୍ ପ୍ରାୟ ୧୫ ବର୍ଷ ଧରି କୌଣସି ଆଇପିଏସ୍ ପାହ୍ୟାର ଅଧିକାରୀଙ୍କୁ ଆରକ୍ଷୀ ଅଧୀକ୍ଷକ ଭାବେ ଦାୟିତ୍ୱ ଦିଆଯାଇନଥିଲା । ପ୍ରାୟ ସମସ୍ତେ ବରିଷ୍ଠ ଓପିଏସ୍ ଅଧିକାରୀ ହିଁ ଆରକ୍ଷୀ ଅଧୀକ୍ଷକ ଭାବେ ନିଯୁକ୍ତି ପାଇଥିଲେ । ଏହାସହ ପ୍ରାୟ ୭ ବର୍ଷ ଧରି ଖୋର୍ଦ୍ଧା ପୌର ପରିଷଦର ଉପଜିଲ୍ଲାପାଳ ଭାବେ ଓଏଏସ୍ ପାହ୍ୟାର ଅଧିକାରୀଙ୍କୁ ହିଁ ନିଯୁକ୍ତି ଦିଆଯାଉଥିଲା । ୨୦୨୧ ଜୁନ୍ ମାସରେ ଆଇଏଏସ୍ ପାହ୍ୟାର ଅଧିକାରୀ ଆଇ ଶିବାଜୀ ଗୌରବଙ୍କୁ ଉପଜିଲ୍ଲାପାଳ ଭାବେ ଖୋର୍ଦ୍ଧା ବଦଳି ହୋଇଥିଲା ।
ବର୍ତମାନ ଜିଲ୍ଲାରେ ଜିଲ୍ଲାପାଳ, ଆରକ୍ଷୀ ଅଧୀକ୍ଷକ ଓ ଉପଜିଲ୍ଲାପାଳ ଦାୟିତ୍ୱରେ ଭାରତୀୟ ପ୍ରାଶାସନିକ ସେବା ପାହ୍ୟାର ଅଧିକାରୀ ନିଯୁକ୍ତି ପାଇଥିବାରୁ ଜିଲ୍ଲାର ବିକାଶ କାର୍ଯ୍ୟ, ଆଇନଶୃଙ୍ଖଳା ନିୟନ୍ତ୍ରଣ, ଖଣି ଚୋରାଚାଲାଣ, ବେଆଇନ ଜମି ଦଖଲ ଆଦି ଦିଗରେ ପ୍ରଭାବଶାଳୀ ଓ ସମନ୍ୱିତ ଢଙ୍ଗରେ କାର୍ଯ୍ୟ ହୋଇପାରିବ ବୋଲି ସହରର ବୁଦ୍ଧିଜୀବୀ ଆଶା ପ୍ରକାଶ କରିଛନ୍ତି ।