ବାଣପୁର ଦକ୍ଷପ୍ରଜାପତି ମନ୍ଦିରରୁ ଅଷ୍ଟଧାତୁରେ ନିର୍ମିତ ମୂର୍ତ୍ତି ଚୋରି

ଖୋର୍ଦ୍ଧା: ବାଣପୁରରେ ଥିବା ୧୪ଶ ଶତାବ୍ଦୀର ଦକ୍ଷ ପ୍ରଜାପତି ମନ୍ଦିରରୁ ଗତକାଲି ରାତିରେ ଦୁର୍ବୃତ୍ତମାନେ ୨୧ଟି ଦେବାଦେବୀ ମୂର୍ତ୍ତି ଚୋରି କରି ନେଇଛନ୍ତି। ଚୋରି ଯାଇଥିବା ମୂର୍ତ୍ତି ମଧ୍ୟରେ ୪ଟି ମୂଲ୍ୟବାନ ଅଷ୍ଟଧାତୁ ମୂର୍ତ୍ତି ରହିଛି। ତେବେ ସାଇଂଟିଫିକ୍‌ ଟିମ୍‌ର ଅନୁସନ୍ଧାନ ପରେ ପୁଲିସକୁ ଦୁର୍ବୃତ୍ତଙ୍କ ସମ୍ପର୍କରେ କିଛି ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିବା ଜଣାପଡ଼ିଛି। ମନ୍ଦିରର ଦାୟିତ୍ୱରେ ଥିବା ପ୍ରତ୍ନତତ୍ୱ ବିଭାଗର କର୍ମଚାରୀ ତାରିଣୀ ସେନ ପ୍ରଧାନ କହିଛନ୍ତିି ଯେ ଗତକାଲି ରାତିରେ ପ୍ରତିଦିନର ନିୟମାନୁସାରେ ସେ ମନ୍ଦିରର କବାଟ ଓ ମୁଖ୍ୟ ଫାଟକ ବନ୍ଦ କରି ରାତି ପ୍ରାୟ ୮-୯ଟା ବେଳେ ଘରକୁ ଯାଇଥିଲେ । ସକାଳ ପ୍ରାୟ ୭-୮ଟା ବେଳେ ଆସି ମନ୍ଦିର ଖୋଲିବା ସମୟରେ ସମସ୍ତ କବାଟ ଓ ଫାଟକର ତାଲା ଭଙ୍ଗାଯାଇଥିବା ଦେଖି ଉପରିସ୍ଥ ଅଧିକାରୀଙ୍କୁ ତୁରନ୍ତ ସୂଚନା ଦେଇଥିଲେ। ତେବେ ମନ୍ଦିରର ମୁଖ୍ୟ ମୂର୍ତ୍ତି ଚୋରି ଯାଇନାହିଁ। ପ୍ରାୟ ୨୫ ବର୍ଷ ପୂର୍ବେ ଏହାର ମୁଖ୍ୟ ବହୁ କୋଟି ଟଙ୍କାର ଅଷ୍ଟଧାତୁ ମୂର୍ତ୍ତି ଚୋରି ଯାଇଥିଲା ଏହାପରେ ମୁଖ୍ୟମୂର୍ତ୍ତି ବଦଳରେ ଅନ୍ୟମୂର୍ତ୍ତି ସ୍ଥାପନ କରାଯାଇଥିଲା।

ଗତକାଲି ଦୁର୍ବୃତ୍ତମାନେ ମୁଖ୍ୟମୂର୍ତ୍ତି ନେଇନଥିଲେ ବରଂ ମନ୍ଦିରର ଭଣ୍ଡାର ଘରେ ଥିବା ୩୧ଟି ମୂର୍ତ୍ତି ମଧ୍ୟରୁ ୪ଟି ଅଷ୍ଟଧାତୁର ମୂର୍ତ୍ତି ସହ ଭକ୍ତମାନେ ଦେଇଥିବା ୧୭ଟି ମୂର୍ତ୍ତି ଚୋରି କରିଛନ୍ତି। ଅର୍ଥାତ ଦୁର୍ବୃତ୍ତମାନେ ମନ୍ଦିରର ମୂର୍ତ୍ତି ସମ୍ପର୍କରେ ବେଶ୍‌ ପରିଚିତି ଥିବା ପୁଲିସ ଅନୁମାନ କରୁଛି। ତେବେ ମନ୍ଦିରରୁ କେତେ ସଂଖ୍ୟକ ମୂର୍ତ୍ତି ଯାଇଛି ସେନେଇ ସଠିକ ସୂଚନା ମଧ୍ୟ ମିଳିପାରୁନାହିଁ। ପୁଲିସ ଚୋରି ଯାଇଥିବା ମୂର୍ତ୍ତି ସଂଖ୍ୟା ୨୧ କହୁଥିବା ବେଳେ ସକାଳେ ମନ୍ଦିରର ସେବାୟତ ୨୨ ବୋଲି କହିଥିଲେ। ସେହିଭଳି ମନ୍ଦିରର ପୂଜାର୍ଚ୍ଚନା ଆଦି କାର୍ଯ୍ୟରେ ଜଡ଼ିତ ଥିବା ଅନ୍ୟ କେତେକ ସେବାୟତ ଏହାକୁ ୨୩ ବୋଲି କହିଛନ୍ତି।

ଏନେଇ ଆରକ୍ଷୀ ଅଧିକ୍ଷକ ଅଜୟ ପ୍ରତାପ ସ୍ୱାଇଁଙ୍କୁ ପଚାରିବାରେ ସେ କହିଛନ୍ତି ଯେ ମୋଟ ୨୧ଟି ମୂର୍ତ୍ତି ଚୋରି ହୋଇଛି। ଏହା ମଧ୍ୟରେ ୩ଟି ଅଷ୍ଟଧାତୁ ଓ ଅନ୍ୟ ଏକ ପୁରାତନ ମୂର୍ତ୍ତି ରହିଛି। ମନ୍ଦିର ମୂର୍ତ୍ତି ଚୋରଙ୍କ ନଜରରେ ରହିଥିବାରୁ ସେବାୟତମାନେ ପାଳି କରି ପ୍ରତିଦିନ ରାତିରେ ଜଗୁଥିଲେ। ଗତକାଲି ପାଳିଥିବା ସେବାୟତ ମନ୍ଦିର ଜଗିନଥିଲେ। ଏନେଇ ୩୯୬/୨୦୨୦ରେ ଏକ ମାମଲା ରୁଜୁ କରାଯାଇଛି। ଏହି ଘଟଣାର ତଦନ୍ତ ଦାୟିତ୍ୱ ବାଲୁଗାଁ ଏସ୍‌ଡିପିଓଙ୍କ ତତ୍ୱାବଧାନରେ ବାଣପୁର ଥାନାଧିକାରୀ କରୁଛନ୍ତି। ସେ ଓ ସାଇଂଟିଫିକ୍‌ ଟିମ୍‌ ଯାଇ ସରଜମିନ ଅନୁସନ୍ଧାନ କରି ଫେରିଛନ୍ତି। ସାଇଂଟିଫିକ୍‌ ଟିମ୍‌ ହାତରେ କେତେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଛି ଖୁବ୍‌ ଶୀଘ୍ର ଚୋରଙ୍କୁ ଧରାଯିବ ବୋଲି ଆଶା ରହିଛି।