ରାୟଗଡ଼ାରେ ୨ଟି ଏମଏଚୟୁ ଗାଡ଼ି ଉଦ୍‌ଘାଟିତ

ରାୟଗଡା: ରାୟଗଡା ବିଧାୟକ ପାଣ୍ଠି ୨୦୨୨-୨୩ରୁ ୨୫ଲକ୍ଷ ଟଙ୍କା ଅନୁଦାନରେ ଆଦିବାସୀ ବହୁଳ ରାୟଗଡା ଜିଲ୍ଳା ସଦର ବ୍ଳକର ଜେମାଦେଇପେଣ୍ଠ ଓ କାଶୀପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଯୋଗାଇ ଦିଆଯାଇଛି ଗୋଟିଏ ଲେଖାଁଏ ଭ୍ରାମ୍ୟମାଣ ଚିକିତ୍ସା ଗାଡ଼ି। ରବିବାର ଏହାର ଶୁଭାରମ୍ଭ କାର୍ଯ୍ୟକ୍ରମରେ ଆଦିବାସୀ କଲ୍ୟାଣ ତଥା ଆଇନ ବିଭାଗୀୟ ମନ୍ତ୍ରୀ ଜଗନ୍ନାଥ ସାରକା ମୁଖ୍ୟ ଅତିଥି ଭାବେ ଯୋଗ ଦେଇ ସବୁଜ ପତାକା ଦେଖାଇ ଏହାର ଶୁଭାରମ୍ଭ କରିଛନ୍ତି। ରାୟଗଡା ବିଧାୟକ ମକରନ୍ଦ ମୁଦୁଲି, ଜିଲ୍ଳା ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷା ଅନୁସୂୟା ମାଝୀ, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ରାଜ୍ୟ ଉପଦେଷ୍ଠା ସୁଧୀର ଦାସ, ରାୟଗଡା ବ୍ଳକ ଅଧ୍ୟକ୍ଷା ଟୁନି ହୁଇକା, କାଶୀପୁର ବ୍ଳକ ଅଧ୍ୟକ୍ଷ କଣ୍ଠଶ୍ୱେର ମାଝି, ଜିଲ୍ଳା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡାକ୍ତର ଲାଲମୋହନ ରାଉତରାଏ ପ୍ରମୁଖ ଉପସ୍ଥିତ ରହିଥିଲେ। କାଶୀପୁର ଓ ଜେମାଦେଇପେଣ୍ଠ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିନସ୍ଥ ଅନେକ ଦୁର୍ଗମ ଅଞ୍ଚଳର ଲୋକେ ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ରର ସେବା ପାଇ ଆସୁଥିଲେ ମଧ୍ୟ ଏହି ୨ ଗୋଟି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଉପଲବ୍ଧ ଥିବା ଗାଡି ଗୁଡିକ ଦୀର୍ଘ ୧୫ବର୍ଷରୁ ଉର୍ଦ୍ଧ ସମୟ ଧରି ବ୍ୟବହୃତ ହୋଇ ଆସୁଥିବା ବେଳେ ବର୍ତମାନ ଏହା ଆଉ ଉପଯୋଗୀ ହୋଇପାରୁନ ଥିଲା।

ଅଞ୍ଚଳବାସୀଙ୍କ ଦାବି ସହ ଜିଲ୍ଳା ସ୍ୱାସ୍ଥ୍ୟ ସମିତିର ନିବେଦନ କ୍ରମେ ରାୟଗଡା ବିଧାୟକ ମକରନ୍ଦ ମୁଦୁଲିଙ୍କ ବିଧାୟକ ପାଣ୍ଠିରୁ ୧୨ଲକ୍ଷ ୫୦ହଜାର ଟଙ୍କା ଆକାରରେ ୨୫ଲକ୍ଷ ଟଙ୍କା ବ୍ୟୟରେ ୨ଟି ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ର ଗାଡି ଯୋଗାଇ ଦିଆଯାଇଛି। ଫଳରେ ଦୁର୍ଗମ ଅଞ୍ଚଳବାସୀଙ୍କୁ ଏବେ ଏହି ସେବା ଆହୁରି ନିକଟତର ହେବ ବୋଲି ମନ୍ତ୍ରୀ ଓ ବିଧାୟକ ପ୍ରକାଶ କରିଛନ୍ତି। ସେହିପରି ଜିଲ୍ଳାର ଅନ୍ୟ ୮ଟି ସିଏଚସିରେ ଏମଏଚୟୁ ଗାଡି ରହିଥିବା ବେଳେ ଗୁଣପୁର, ଗୁଡାରୀ ଓ ଚନ୍ଦ୍ରପୁର ସିଏଚସି ପାଇଁ ଏମଏଚୟୁ ଗାଡିର ଆବଶ୍ୟକ ଥିବାରୁ ଜିଲ୍ଳାପାଳଙ୍କୁ ଅନୁରୋଧ କରାଯାଇଥିବା ନେଇ ସିଡିଏମଓ ପ୍ରକାଶ କରିଛନ୍ତି। ଆଜିର ଏହି ଶୁଭାରମ୍ଭ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଏନଏଚଏମ ଡିପିଏମ ରାଜେଶ ପଟ୍ଟନାୟକ, ଜେମାଦେଇପେଣ୍ଠ ସିଏଚସି ମେଡିକାଲ ଅଫିସର ଡାକ୍ତର ପ୍ରଦୀପ୍ତ କୁମାର ସୁବୁଦ୍ଧି, ଏମଏଚୟୁ ମେଡିକଲ ଅଫିସର ଡାକ୍ତର ସୁନୀଲ ପ୍ରସାଦ ମହାପାତ୍ର, ଫାର୍ମାସିଷ୍ଟ ରେଣୁକା କୁମାରୀ ସାହୁ, କାଶୀପୁର ସିଏଚସି ମେଡିକଲ ଅଫିସର ଡାକ୍ତର ନେତ୍ରାନନ୍ଦ ନାୟକ, ଏମଏଚୟୁ ମେଡିକଲ ଅଫିସର ଡାକ୍ତର ରାମପ୍ରସାଦ ମହାପାତ୍ର, ଫର୍ମାସିଷ୍ଟ ସୁଶୀଲ କୁମାର ସାହୁଙ୍କ ସମେତ ଅନ୍ୟମାନେ ଉପସ୍ଥିତ ରହିଥିଲେ।