ବାଇକକୁ ଧକ୍କା ଦେଲା ବୋଲେରୋ: ୨ ଯୁବକଙ୍କ ପ୍ରାଣହାନି

କୁଜଙ୍ଗ: ଜଗତସିଂହପୁର ଜିଲ୍ଲା କୁଜଙ୍ଗ ସନ୍ତରାଗଡ଼ା ନିକଟରେ ଘଟିଛି ଏକ ଦୁର୍ଘଟଣା। ଏହାଫଳରେ ଅକାଳରେ ଚାଲିଯାଇଛି ୨ ଯୁବକଙ୍କ ଜୀବନ।

ସୂଚନା ଅନୁଯାୟୀ, ଗତକାଲି ରାତ୍ରିରେ ଦୁଇ ଯୁବକ ବାଇକରେ ଯାଉଥିବା ବେଳେ ପାରାଦୀପରୁ କଟକ ଅଭିମୁଖେ ଆସୁଥିବା ଏକ ବୋଲେରୋ ବାଇକକୁ ଧକ୍କା ଦେଇଥିଲା। ଦୁର୍ଘଟଣାରେ ୨ ବାଇକ୍ ଆରୋହୀଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା। ୨ ମୃତକ ହେଲେ ଆଇଓସିଏଲର କର୍ମଚାରୀ। ଏମାନଙ୍କ ମଧ୍ୟରୁ ଜଣଙ୍କର ନାଁ କୈବଲ୍ୟ ହୋଇଥିବା ବେଳେ ଅନ୍ୟ ଜଣେ କେନ୍ଦୁଝର ଜିଲ୍ଲା କଂଟା ଗାଁର ବିଶ୍ୱଜିତ ନାୟକ ବୋଲି ଜଣାଯାଇଛି।

ଦେବଦୂତ ସଡ଼କ ସୁରକ୍ଷା ବାହିନୀର ସଭାପତି ପଙ୍କଜ କୁମାର ତରାଇ ଓ ଅଗ୍ନିଶମ ବାହିନୀ ଉଭୟଙ୍କୁ ଉଦ୍ଧାର କରି କୁଜଙ୍ଗ ହସ୍ପିଟାଲରେ ଭର୍ତ୍ତି କରଥିଲେ। ହେଲେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଏଣେ ବୋଲେରୋ ଚାଳକଙ୍କ ପରିଚୟ ବି ମିଳିଛି। ସେ କିଶନ ନଗର ଅଞ୍ଚଳର କୀର୍ତ୍ତିରଞ୍ଜନ ବେହେରା।