ଅଜଣା ଗାଡ଼ି ଧକ୍କାରେ ଯୁବକ ମୃତ, ସାପ କାମୁଡ଼ାରେ ଚାଲିଗଲା ଜଣଙ୍କ ଜୀବନ

ଭୁବନେଶ୍ବର: ରାଜ୍ୟରେ ବିଭିନ୍ନ ଘଟଣା, ଦୁର୍ଘଟଣା ଘଟିଛି।

ଅଜଣା ଗାଡ଼ି ଧକ୍କାରେ ଯୁବକ ମୃତ
ଟମକା: ଟମକା ଥାନା ଚିତ୍ରୀ ପଞ୍ଚାୟତ ଚିତ୍ରୀ ଗାଁର ଗଙ୍ଗାଧର ସାମଲଙ୍କ ପୁଅ ସୁଧୀର ରଂଜନ (୪୨) ଙ୍କର ଗତକାଲି ସନ୍ଧ୍ୟାରେ ଦୁର୍ଘଟଣାରେ ମୃତ୍ୟୁ ହୋଇଛି। ସେ ଗତକାଲି ହରିଚନ୍ଦନପୁରରୁ ବୁଲେଟ୍‌ (ଓଡି ୦୫ ପି ୧୮୧୯)ରେ ଘରକୁ ଫେରୁଥିବାବେଳେ ରେମାଳ ଛକ ନିକଟରେ ଏକ ଅଜଣା ଗାଡ଼ି ଧକ୍କା ଦେଇଥିଲା। ସେ ଗୁରୁତର ହୋଇ ପଡ଼ି ରହିଥିଲେ। ସ୍ଥାନୀୟ ଲୋକେ ଆମ୍ବୁଲାନ୍ସ ଡକାଇ ଘସିପୁରା ଡାକ୍ତରଖାନାକୁ ପଠାଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘରେ ତାଙ୍କର ପତ୍ନୀ ଓ ଦୁଇ ପୁଅ ଅଛନ୍ତି। ଆଜି ଶୋକାକୁଳ ପରିବେଶରେ ଗାଁ ଶ୍ମଶାନରେ ସୁଧୀରଙ୍କ ଅନ୍ତିମ ସଂସ୍କାର କରାଯାଇଛି।

ଅପେରା ପାର୍ଟି ଗାଡ଼ି ଦୁର୍ଘଟଣାଗ୍ରସ୍ତ
ତେଲକୋଇ: କେନ୍ଦୁଝର ଜିଲ୍ଲା କାଞ୍ଜିପାଣି ଥାନା ଅନ୍ତର୍ଗତ କାଞ୍ଜିପାଣି-କୁନ୍ତଳା ପୂର୍ତ୍ତ ବିଭାଗର ରାସ୍ତା କାଞ୍ଜିପାଣି କୁସୁମ ଘାଟିରେ ଆଜି ସନ୍ଧ୍ୟାରେ ଏକ ଅପେରା ପାର୍ଟି ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୨ଜଣ ଗୁରୁତର ଆହତ ହୋଇଛନ୍ତି। ସେମାନେ ହେଲେ ବାଦଲ ମାଝୀ (୩୦) ଓ ଦୁର୍ଯ୍ୟୋଧନ ମାଝୀ (୩୮)। ଉଭୟଙ୍କୁ ପ୍ରଥମେ ତେଲକୋଇ ଡାକ୍ତରଖାନା ପରେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଆଜି ଅପରାହ୍‌ଣ ସାଢ଼େ ୫ଟାବେଳେ ବାଲେଶ୍ବର ଜିଲ୍ଲା ଭୋଗରାଇ ଅଞ୍ଚଳର ତାରିଣୀ ଗଣନାଟ୍ୟର ଏକ ଟ୍ରକ୍‌ (ଓଡି-୦୧-ଏ-୧୦୩୯)ରେ ଜିନିଷପତ୍ର ବୋଝେଇ ହୋଇ କେନ୍ଦୁଝର ଜିଲ୍ଲା ଢେଙ୍କିକୋଟରୁ ତେଲକୋଇ ଥାନା ଦୁର୍ଲଭପୁର ଗ୍ରାମକୁ ଯାଉଥିଲା। କୁସୁମ ଘାଟିରେ ଟ୍ରକ୍‌ଟି ଭାରସାମ୍ୟ ହରାଇ ସୁରକ୍ଷାବାଡ଼ରେ ଧକ୍କା ହୋଇ ଅଟକି ଯାଇଥିଲା। ଖବର ପାଇ କାଞ୍ଜିପାଣି ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ସାପ କାମୁଡ଼ାରେ ଯୁବକ ମୃତ
ଦାନଗଦୀ: ଯଖପୁରା ଥାନା ନୀଳମଣିଦେଇପୁର ଶାସନ ଗ୍ରାମର ଗୋକୁଳ ସାହୁଙ୍କ ପୁଅ ପ୍ରଦୀପ କୁମାର ସାହୁ(୩୪)ଙ୍କର ସାପ କାମୁଡ଼ାରେ ମୃତ୍ୟୁ ହୋଇଛି। ସେ ଶନିବାର ସକାଳେ ତାଙ୍କ ଭାଇଙ୍କ ସହ ଦାନଗଦୀ ରାସ୍ତାରେ ଯାଉଥିଲେ। ଏହି ସମୟରେ ଏକ ବିଷଧର ସାପ ତାଙ୍କୁ କାମୁଡ଼ି ଦେଇଥିଲା। ତାଙ୍କୁ ସଙ୍ଗେସଙ୍ଗେ ଦାନଗଦୀ ଡାକ୍ତରଖାନାକୁ ନିଆଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଦାନଗଦୀ ପୁଲିସ ପହଞ୍ଚି ଶବ ବ୍ୟବଚ୍ଛେଦ କରାଇଥିଲା।