ଟ୍ରକ୍ ଧକ୍କାରେ ଯୁବକ ମୃତ, ଜଣେ ଆହତ

ଧର୍ମଶାଳା/ହରିପୁର : ଧର୍ମଶାଳା ଥାନା ଶଙ୍ଖାରିଡିହ ଛକ ନିକଟ ୧୬ ନମ୍ବର ଜାତୀୟ ରାଜପଥରେ ଗତକାଲି ସଂଧ୍ୟାରେ ଏକ ଟ୍ରକ୍ ଧକ୍କାରେ ଜଣେ ଯୁବକଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଆହତ ହୋଇଛନ୍ତି। ମୃତ ଯୁବକ ଯାଜପୁର ସଦର ଥାନା ମହେଶ୍ବରପୁର ପଞ୍ଚାୟତ ବେଣୀପୁର ଗ୍ରାମର ବ୍ୟବସାୟୀ ନିର୍ମଳ ସାମଲ(୩୪) ଓ ଆହତ ସ୍ବୟଂପ୍ରକାଶ ନାୟକ(୨୦)। ଦୁର୍ଘଟଣା ଘଟାଇ ଟ୍ରକ୍‌ଚାଳକ ଫେରାର ହୋଇଯାଇଛି।

ପ୍ରକାଶ ଯେ, ବାସୁଦେବ ସାମଲଙ୍କ ପୁଅ ନିର୍ମଳ ଓ ଧନଞ୍ଜୟ ନାୟକଙ୍କ ପୁଅ ସ୍ବୟଂପ୍ରକାଶ ଏକ ବାଇକ୍(ଓଡି-୦୪କ୍ୟୁ-୯୮୫୧)ରେ ଚଣ୍ତିଖୋଲରୁ ଘରକୁ ଫେରୁଥିଲେ। ଶଙ୍ଖାରିଡିହ ଛକ ନିକଟ ପେଟ୍ରୋଲ୍ ପମ୍ପ ସାମ୍ନାରେ ଏକ ଟ୍ରକ୍ ସେମାନଙ୍କ ବାଇକ୍‌କୁ ଧକ୍କା ଦେଇଥିଲା। ଫଳରେ ଖସି ପଡ଼ି ଉଭୟ ଆହତ ହୋଇଥିଲେ। ନିର୍ମଳଙ୍କ ମୁଣ୍ତରେ ଗଭୀର ଆଘାତ ଲାଗିଥିଲା। ନିକଟରେ ଥିବା ଲୋକମାନେ ସେମାନଙ୍କୁ ଏକ ଆମ୍ବୁଲାନ୍ସରେ ନେଇ ଧର୍ମଶାଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଡାକ୍ତର ନିର୍ମଳଙ୍କୁ ମୃତ ଘୋଷଣା କରିଥିଲେ। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବା ସହିତ ପ୍ରାୟ ଅଧଘଣ୍ଟାଏ ରାସ୍ତାରୋକ ହୋଇଥିଲା। ଖବରପାଇ ଜାରକା ବିଟ୍ ହାଉସ ପୁଲିସ୍‌ ପହଞ୍ଚି ଉତ୍ତ୍ୟକ୍ତ ଲୋକମାନଙ୍କୁ ବୁଝାସୁଝା କରିବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ପୁଲିସ୍‌ ମୃତଦେହ ଓ ଦୁର୍ଘଟଣାଗ୍ରସ୍ତ ବାଇକ୍‌କୁ ଜବତ କରି ତଦନ୍ତ କରୁଛି।