ଝାରସୁଗୁଡ଼ା: ଏକ ହତ୍ୟା ମାମଲରେ ଅଭିଯୁକ୍ତ ଥିବା ଜଣେ ବାଳ ଅପରାଧୀ ମଙ୍ଗଳବାର ପୁଲିସ୍‌ ହାତରୁ ଚମ୍ପଟ ମାରିଥିବା ଜଣାପଡ଼ିଛି। ତାକୁ ଆଜି ଝାରସୁଗୁଡ଼ା କୋର୍ଟ ପରିସର ସ୍ଥିତ ଜୁଭେନାଇଲ୍‌ ଜଷ୍ଟିସ୍‌ ବୋର୍ଡ ଆଗରେ ଉପସ୍ଥାପନ କରିବା ପରେ ପୁଲିସ୍‌ ଫେରାଇ ନେଉଥିବା ବେଳେ ଦିନ ପ୍ରାୟ ସାଢ଼େ ୧୧ଟାରୁ ୧୨ଟା ମଧ୍ୟରେ ସେ ଖସି ଯାଇ ଦୌଡ଼ି ଚମ୍ପଟ ମାରିଥିବା ଜଣାପଡ଼ିଛି। ଗତ ଫେବ୍ରୁଆରି ମାସ ୧୪ ତାରିଖ ଦିନ ଝାରସୁଗୁଡ଼ା ବସ୍‌ଷ୍ଟାଣ୍ଡରେ ବସ୍‌କୁ ଅପେକ୍ଷା କରିଥିବା ଜଣେ ଯାତ୍ରୀଙ୍କୁ ଉକ୍ତ ନାବାଳକ ଜଣକ ଡାକି ନେଇ ପଥରରେ ଛେଚି ହତ୍ୟା କରିବା ପରେ ୨ ହଜାର ଟଙ୍କା ଲୁଟି ନେଇଥିବା ଅଭିଯୋଗରେ ପୁଲିସ୍‌ ହାତରେ ଧରାପଡ଼ିଥିଲା। ତାକୁ ରାଉରକେଲା ସ୍ଥିତ ସୁଧାର ଗୃହରେ ରଖାଯାଇଥିଲା। ମଙ୍ଗଳବାର ଝାରସୁଗୁଡ଼ା ପୁଲିସ୍‌ ବିଭିନ୍ନ ମାମଲାରେ ସଂପୃକ୍ତ ଥିବା ୯ ଜଣ ବାଳ ଅପରାଧୀଙ୍କୁ ରାଉରକେଲାରୁ ଆଣି କୋର୍ଟରେ ଉପସ୍ଥାପିତ କରିବା ପରେ ପୁଣି ରାଉରକେଲା ଫେରାଇ ନେଉଥିଲା। ଏହି ଅବସରରେ ସଂପୃକ୍ତ ବାଳ ଅପରାଧୀ ପୁଲିସ୍‌ ହାତରୁ ଖସି ଯାଇ ଦୌଡ଼ି ଚମ୍ପଟ ହୋଇଯାଇଥିବା ଜଣାଯାଇଛି। ତାକୁ ଧରିବା ପାଇଁ ପୁଲିସ୍‌ ପକ୍ଷରୁ ତନାଘନା ଜାରି ରହିଥିଲା। ତେବେ ଖବର ଲେଖାଯିବା ବେଳକୁ ତାକୁ ସ୍ଥାନୀୟ ମଙ୍ଗଳ ବଜାର ଠାରେ ଧରାଯାଇଥିବା ଆଇଆଇସି ସାବିତ୍ରୀ ବଳ ସୂଚନା ଦେଇଛନ୍ତି।

Advertisment