ପିସ୍ତଲ ସହିତ ଯୁବ ଠିକାଦାର ଗିରଫ

ବ୍ରଜରାଜନଗର: ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ଥାନା ଅନ୍ତର୍ଗତ ରାଜପୁରର ଜଣେ ଠିକାଦାର ମନୋଜ କିଷାନ(୩୪)ଙ୍କୁ ପୁଲିସ ଗିରଫ କରିଛି। ତାଙ୍କ ନିକଟରୁ ଏକ ପିସ୍ତଲ ଜବତ ହୋଇଛି। ବ୍ରଜରାଜନଗର ଥାନାରେ ୨୫ ଅସ୍ତ୍ରଶସ୍ତ୍ର ଆଇନ ବଳରେ ଏକ ମାମଲା ରୁଜୁ କରଯାଇ ମନୋଜଙ୍କୁ ଆଜି କୋର୍ଟ ଚାଲାଣ କରିଥିବା ବ୍ରଜରାଜନଗର ଏସ ଡି ପି ଓ ଦିଲୀପ ଦାସ ପ୍ରକାଶ କରିଛନ୍ତି।
ପୁଲିସ ସୂତ୍ରରୁ ପ୍ରକାଶ, ସୋମବାର ସାନ୍ଧ୍ୟରେ ଅଭିଯୁକ୍ତ ମନୋଜ ଏକ ପିସ୍ତଲ ଧରି ଓରିଏଣ୍ଟ କାଗଜକଳ ଡ୍ରାମା ପେଣ୍ଡାଲ ସମ୍ମୁଖରେ ଥିବା ବିଜୁ ପଟ୍ଟନାୟକ ଛକରେ ବୁଲୁଥିବା ନେଇ ଆଇଆଇସି ବୈକୁଣ୍ଠ ସେଠ କୌଣସି ସୂତ୍ରରୁ ଖବର ପାଇଥିଲେ।

ଏ ସମ୍ପର୍କରେ ଶ୍ରୀ ସେଠ ଏସ ଆଇ ପ୍ରଦ୍ୟୁମ୍ନ ସ୍ୱାଇଁଙ୍କୁ ଘଟଣାସ୍ଥଳକୁ ପଠାଇଥିଲେ। ଏସ ଆଇ ଶ୍ରୀ ସ୍ୱାଇଁଙ୍କ ସହିତ ଏଏସଆଇ ଶରତ ମଲ୍ଲିକ ପୁଲିସ ଫୋର୍ସ ସହିତ ଘଟଣାସ୍ଥଳରେ ପହଁଚି ଚତୁରତାର ସହ ମନୋଜଙ୍କୁ କାବୁ କରି ତାଙ୍କ ନିକଟରୁ ପିସ୍ତଲ ଜବତ କରିଥିଲେ। ପୁଲିସ ପିସ୍ତଲ ସମ୍ପର୍କରେ ଖୋଳତାଡ଼ ଆରମ୍ଭ କରିଛି। ଏହି ଘଟଣାରେ ପୁଲିସ ଆଗକୁ ବଡ଼ ଧରଣର ଚୋରା ପିସ୍ତଲ କାରବାର କରୁଥିବା ରାକେଟ ନିକଟରେ ପହଞ୍ଚିବାକୁ ପ୍ରୟାସ ଚଳାଇଛି।