ଧର୍ମଗଡ଼/ ଗୋଲାମୁଣ୍ଡା : ଆଜି ଗୋଲାମୁଣ୍ଡା ବ୍ଲକର ସମସ୍ୟା ଉପରେ କଳାହାଣ୍ଡି ଜିଲ୍ଲା ଯୁବ କଂଗ୍ରେସ ତରଫରୁ ତହସିଲ ଅଫିସ ଘେରାଉ କରି ରାଜ୍ୟପାଳଙ୍କ ଉଦ୍ଦେଶ୍ୟରେ ୬ ଦଫା ଦାବିପତ୍ର ପ୍ରଦାନ କରାଯାଇଛି । କଳାହାଣ୍ଡି ଜିଲ୍ଲା ଯୁବ କଂଗ୍ରେସ ସଭାପତି ସାଉଲ ମଙ୍ଗରାଜଙ୍କ ନେତୃତ୍ୱରେ ଆଜି ଗୋଲାମୁଣ୍ଡା ମହାଭାରତ ପଡ଼ିଆରୁ ଏକ ବିଶାଳ ରାଲି ବାହାରି ତହସିଲ ଅଫିସ ଘେରାଉ କରି ୬ ଦଫା ଦାବି ତୁରନ୍ତ ପୁରଣ କରିବା ନେଇ ଗର୍ଜନ କରିଛି ଯୁବ କଂଗ୍ରେସ । ୬ ଦଫା ଦାବି ମଧ୍ୟରେ ଗୋଲାମୁଣ୍ଡା ବ୍ଲକର ଚାଷୀମାନଙ୍କୁ ତୁରନ୍ତ ଶସ୍ୟ ବୀମା ରାଶି ଟଙ୍କା ପ୍ରଦାନ ସହ ମରୁଡି ସହାୟତା ରାଶି ପ୍ରଦାନ ଦାବି ରହିଛି । ଜଙ୍ଗଲ ଜମି ପଟାରେ ବନ୍ଧା ଯାଇଥିବା ଫସଲ ବୀମା ଗ୍ରହଣ କରି ତୁରନ୍ତ ଫସଲ ବୀମା ପ୍ରଦାନ ସହିତ ମରୁଡି ସହାୟତା ପ୍ରଦାନ କରାଯାଉ, ଗୋଲାମୁଣ୍ଡାସ୍ଥିତ ବୈଜଲପୁର, ସୁକୁନୀମୁଣ୍ଡାଠାରେ ବେନିୟମ ଭାବରେ ଗଢି ଉଠିଥିବା କ୍ରସରକୁ ତୁରନ୍ତ ବନ୍ଦ କରାଯାଉ, ଗୋଲାମୁଣ୍ଡା ବ୍ଲକର ସମସ୍ତ ଗ୍ରାମର ଭୂମିହୀନମାନଙ୍କୁ ତୁରନ୍ତ ୪ ଡିସମିଲ ପଟ୍ଟା ପ୍ରଦାନ ପ୍ରଦାନ କରାଯାଉ, ଗୋଲାମୁଣ୍ଡା, ମାନଝରୀ, ବୃନ୍ଦାବାହାଲ, ଧାମନପୁର ଓ ଚିଲଗାଁ ଡୋକରିପଡାକୁ ତୁରନ୍ତ ସେଟେଲାଇଟ ମାଧ୍ୟମରେ ଭୂ ବନ୍ଦୋବସ୍ତ କରି ପଟ୍ଟା ପ୍ରଦାନ କରାଯାଉ ବୋଲି ଉଲ୍ଲେଖ ରହିଛି। ରାଜ୍ୟପାଳଙ୍କ ଉଦ୍ଦେଶ୍ୟରେ ଏହି ଦଫା ଦାବିପତ୍ରକୁ ୬ ଗୋଲାମୁଣ୍ଡା ତହସିଲଦାର ସର୍ବେଶ୍ୱର ଜାଲଙ୍କୁ ପ୍ରଦାନ କରାଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଅପରପକ୍ଷରେ ଉକ୍ତ ୬ ଦାବି ଉପରେ ଉଚ୍ଚ ପଦାଧିକାରୀଙ୍କୁ ଜଣାଇ ବହୁ କମ ଦିନ ମଧ୍ୟରେ ଏହି ଦାବି ସବୁ ପୁରଣ କରିବା ସହିତ ଆସନ୍ତା ତିନି ମାସ ମଧ୍ୟରେ ଭୂ ବନ୍ଦୋବସ୍ତ କରାଯାଇ ପଟ୍ଟା ପ୍ରଦାନ କରାଯିବ ବୋଲି ତହସିଲଦାର ପ୍ରତିଶ୍ରୁତି ଦେଇଥିଲେ। ଯୁବ କଂଗ୍ରେସ ସଭାପତି ମଙ୍ଗରାଜଙ୍କ ଆହ୍ୱାନରେ ଆଜିର କାର୍ଯ୍ୟକ୍ରମରେ ଗୋଲାମୁଣ୍ଡା ବ୍ଲକ ଯୁବ କଂଗ୍ରେସ ସଭାପତି ଲମ୍ବୁଧର ଜାଲ, ଧର୍ମଗଡ଼ ବ୍ଲକ ଯୁବ କଂଗ୍ରେସ ସଭାପତି ଡାକେଶ୍ୱର ଲହଜଲ, ଜୁନାଗଡ଼ ଏନଏସି କଂଗ୍ରେସ ସଭାପତି କୁମୁଦ ଗହୀର, ଜୁନାଗଡ଼ ନିର୍ବାଚନ ମଣ୍ଡଳୀ ସଭାପତି ଅନିଲ କୁମାର ଉପସ୍ଥିତ ଥିଲେ।