ଖୋର୍ଦ୍ଧା: ଆଉ ୨ ଦିନ ପରେ କାର୍ତ୍ତିକ ପୂର୍ଣ୍ଣମୀ । ଓଡ଼ିଶାର କାହିଁ କେଉଁ କାଳରୁ ଚାଲିଆସିଥିବା ବୋଇତବନ୍ଦାଣ ଉତ୍ସବ ପାଳିତ ହୋଇ ଆସୁଛି। ମାଣିକଗଡ଼, ଚିଲିକା ଭଳି ପୁରାତନ ବନ୍ଦରର ଦୃଷ୍ଟିରୁ ପାରମ୍ପରିକ ଭାବେ ଖୋର୍ଦ୍ଧାରେ ବୋଇତବନ୍ଦାଣ ଉତ୍ସବର ମହତ୍ତ୍ବ ରହିଆସିଛି । କିନ୍ତୁ ଚଳିତ ବର୍ଷ କରୋନା କଟକଣା ଯୋଗୁଁ ଆଉ ପୋଖରୀ, ନଦୀରେ ଆକାମାବୈ ଶୁଣାଯିବନି କି ହୁଳହୁଳି ସହ ବୋଇତ ଭସାଯିବ ନାହିଁ।
Sambad is now on WhatsApp
Join and get latest news updates delivered to you via WhatsApp
କରୋନା ସଂକ୍ରମଣକୁ ଦୃଷ୍ଟିରେ ରଖି ଖୋର୍ଦ୍ଧା ଉପଖଣ୍ଡରେ କାର୍ତ୍ତିକ ପୂର୍ଣ୍ଣମୀ, ବଡ଼ ଓଷା ଓ ଅନ୍ୟ ଧାର୍ମିକ ପରମ୍ପରା କାର୍ଯ୍ୟ ପାଳିତ ହେବନାହିଁ । ଏଥିପାଇଁ ଉପଖଣ୍ଡ ମାଜିଷ୍ଟ୍ରେଟ (ଉପଜିଲ୍ଲାପାଳ)ଙ୍କ କାର୍ଯ୍ୟାଳୟରୁ ବିଜ୍ଞପ୍ତି ପ୍ରକାଶ ପାଇଛି ।
ନଦୀ ଘାଟ, ପୋଖରୀ ହୁଡ଼ା ଆଦିରେ ବୋଇତ ଭସାଇବା, ମନ୍ଦିର ଓ ଦେବାଳୟରେ ପୂଜାର୍ଚ୍ଚନା ଉପରେ କଟକଣା ଜାରି କରାଯାଇଛି । ଏନେଇ ସମସ୍ତ ସ୍ଥାନରେ ୧୪୪ ଧାରା ଜାରି କରାଯାଇଛି । ଏହି ପ୍ରାଶାସନିକ ନିର୍ଦେଶ ଭାଙ୍ଗିଲେ ଆଇନଅନୁସାରେ କଡ଼ାପଦକ୍ଷେପ ନିଆଯିବ ବୋଲି ପ୍ରଶାସନ ପକ୍ଷରୁ ମାଇକ ଯୋଗେ ଜନସାଧାରଣଙ୍କୁ ସତର୍କ କରିଦିଆଯାଇଛି ।
ଏପରିସ୍ଥଳେ କରୋନା କଟକଣା କୋହଳ ହେବା ପରେ ବୋଇତବନ୍ଦାଣ, ବଡ଼ ଓଷାକୁ ଅନୁମତି ମିଳିବ ବୋଲି ଶ୍ରଦ୍ଧାଳୁ ଓ ବ୍ୟବସାୟୀମାନେ ଆଶା ବାନ୍ଧିଥିଲେ । ଧୀମେଇ ଯାଇଥିବା ବ୍ୟବସାୟ ଏହି ସମୟରେ ବୋଇତ, ପୂଜା ସାମଗ୍ରୀ ଆଦି ବିକ୍ରିରେ ଦୁଇ ପଇସା ଆୟ କରିବେ ବୋଲି ଭରସା କରିଥିଲେ । କିନ୍ତୁ ପ୍ରଶାସନର ନିର୍ଦେଶ ପରେ ସେମାନଙ୍କ ସମସ୍ତ ଆଶା ଓ ଭରସାରେ ପାଣି ଫାଟିଯାଇଛି । ପାରମ୍ପରିକ ଭାବେ ବୋଇତ ପ୍ରସ୍ତୁତ କରି ବିକ୍ରି କରୁଥିବା ବ୍ୟବସାୟୀ ଓ କଳାକାର ଏବେ ମୁଣ୍ଡରେ ହାତ ଦେଇ ବସିଛନ୍ତି ।
ଖୋର୍ଦ୍ଧାରେ କାର୍ତ୍ତିକ ପୂର୍ଣ୍ଣିମୀ ଓ ବଡ଼ ଓଷାର ଦୁଇ ତିନି ପୂର୍ବରୁ ସମଗ୍ର ବଜାରରେ ଭଳିକି ଭଳି ବୋଇତ, କାଗଜ ତିଆରି ଡଙ୍ଗା ଆଦି ବିକ୍ରି ହେଉଥିବା ଦେଖିବାକୁ ମିଳୁଥିଲା । କିନ୍ତୁ ଚଳିତ ବର୍ଷ ଏହା ଫିକା ପଡ଼ିଯାଇଛି । ଯେଉଁମାନେ ଗତ ୧୫-୨୦ ଦିନ ଧରି ଘରେ ଅନେକ କଷ୍ଟ କରି ଡଙ୍ଗା ପ୍ରସ୍ତୁତ କରିଥିଲେ ବୋଇତ ବନ୍ଦାଣ ବନ୍ଦ ହୋଇଯିବା ଯୋଗୁଁ ନିଜର ସାମଗ୍ରୀପାଇଁ ଧାରଉଧାର କରି ବିନିଯୋଗ କରିଥିବା ଅର୍ଥ ଫେରିପାଇପାରିବେ ନାହିଁ ।
ଖୋର୍ଦ୍ଧା ମୁଖ୍ୟ ବଜାରରେ ଗତ ୩୫ ବର୍ଷ ଧରି ପୂଜା ସାମଗ୍ରୀ ଓ ବୋଇତ ପ୍ରସ୍ତୁତ କରି ବିକ୍ରି କରୁଥିବା ରବିନାରାୟଣ ପ୍ରଧାନ କହିଛନ୍ତି ଯେ ଗତ ବର୍ଷ କାର୍ତ୍ତିକ ପୂର୍ଣ୍ଣମୀ ଅବସରରେ ସେ ୫ହଜାର ବୋଇତ, କାଗଜ ଡଙ୍ଗା ବିକ୍ରି କରିଥିଲେ । କିନ୍ତୁ ଚଳିତ ବର୍ଷ ବର୍ତମାନ ସୁଦ୍ଧା ମାତ୍ର ୨୫ଟି ବୋଇତ ବିକ୍ରି କରିଛନ୍ତି ।
ସେହିଭଳି ଅନ୍ୟଜଣେ ବ୍ୟବସାୟୀ ଚଳିତ ବର୍ଷ ପ୍ରଥମ ଥର ପାଇଁ ଦୁଇ ପଇସା ରୋଜଗାର କରିବାକୁ ଘରେ ବୋଇତ ତିଆରି କରି ବିକ୍ରି କରିବାକୁ ବଜାରକୁ ଆସିଛନ୍ତି । ସେ ବୋଇତବନ୍ଦାଣ ଉପରେ କଟକଣା ନେଇ ଜାଣନ୍ତି ନାହିଁ । ଚଳିତ ବର୍ଷ ସେ ୧୦୦ଟି ବୋଇତ ପ୍ରସ୍ତୁତ କରିଥିଲେ । ଗତ ଦୁଇ ଦିନ ମଧ୍ୟରେ ମାତ୍ର ୪ଟି ବିକ୍ରି କରିଛନ୍ତି ।
୮ ବର୍ଷ ଧରି ବୋଇତ ପ୍ରସ୍ତୁତ କରୁଥିବା ଓ ବିକ୍ରି କରୁଥିବା ବସନ୍ତ ସାହୁ କହିଛନ୍ତି ଯେ କାର୍ତ୍ତିକ ପୂର୍ଣ୍ଣମୀ ଅବସରରେ ସେ ଓ ତାଙ୍କ ପରିବାର ମିଶି କାଗଜର ବୋଇତ ପ୍ରସ୍ତୁତ କରିଥାନ୍ତି । ଏହି ଦୁଇ ତିନି ଦିନ ମଧ୍ୟରେ ସେ ୮-୧୦ ହଜାର ଟଙ୍କାର ବ୍ୟବସାୟ କରିବା ସହ ୩-୪ ହଜାର ଟଙ୍କା ଲାଭ ପାଇଥାନ୍ତି । ଚଳିତ ବର୍ଷ ସେ କଟକଣାକୁ ଦୃଷ୍ଟିରେ ରଖି ୫୦୦ ଡଙ୍ଗା ପ୍ରସ୍ତୁତ କରିଥିଲେ । ତାହା ମଧ୍ୟ ବିକ୍ରି ହେବକି ନାହିଁ ସନ୍ଦେହ ବୋଲି କହିଛନ୍ତି ।