ପାରାଦୀପ: ପାରାଦୀପରେ ଏକ ବଡ଼ଧରଣର ଡକାୟତି ଯୋଜନାକୁ ପାରାଦୀପ ଆଦର୍ଶ ଥାନା ପୁଲିସ ପଣ୍ଡ କରିଛି। ନିକାଞ୍ଚ‌ନ ସ୍ଥାନରେ ବସି ଡକାୟତି ପାଇଁ ଯୋଜନା କରୁଥିବା କୁଖ୍ୟାତ ଅପରାଧୀ ଘୁଙ୍ଗୁର ଓ ତା’ ଗ୍ୟାଙ୍ଗ୍‌ର ଅନ୍ୟ ୩ ଜଣଙ୍କୁ ପୁଲିସ ଗିରଫ କରିଛି। ଗିରଫ ଡକାୟତମାନେ ହେଲେ ତିର୍ତ୍ତୋଲ ଥାନା କୁଟିଲୋ ଗ୍ରାମର ପ୍ୟାରୀମୋହନ ଦାସ(୩୬) ଓରଫ ପିଣ୍ଟୁ, ମୂଳିସିଂ ଗାଁର ଚିତ୍ତରଞ୍ଜନ ସାହୁ, ପାରାଦୀପ ଆଦର୍ଶ ଥାନା ଅନ୍ତର୍ଗତ ଅଠରବାଙ୍କୀରେ ରହୁଥିବା କଚି ମାଇତି ଓ ବାଲିକୁଦା ଥାନା ବାଲିପାଟଣା ଗାଁର ଦୀପକ ବେହେରା(୩୦) ଓରଫ ଘୁଙ୍ଗୁର। ସେମାନଙ୍କ ନିକଟରୁ ଦେଶୀ ପିସ୍ତଲ୍‌ ଓ ଜୀବନ୍ତ ଗୁଳି ସହ ଅନ୍ୟାନ୍ୟ ମାରଣାସ୍ତ୍ର ଜବତ କରାଯାଇଛି। ସେମାନଙ୍କ ସହ ଥିବା ଅନ୍ୟ ଦୁଇ ଜଣ ଡକାୟତ ଫେରାର ହୋଇଯାଇଛନ୍ତି। ଅତିରିକ୍ତ ଆରକ୍ଷୀ ଅଧୀକ୍ଷକ ବିଷ୍ଣୁଚରଣ ମିଶ୍ରଙ୍କ ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ସ୍ଥାନୀୟ ଭୀମଭୋଇ କଲୋନି ନିକଟରେ ଥିବା ପୌରପାଳିକା ଡମ୍ପିଂ ୟାର୍ଡ ନିକଟରେ କେତେଜଣ ଯୁବକ ସନ୍ଦେହଜନକ ଅବସ୍ଥାରେ ବସିଥିବା ପୁଲିସକୁ ସୂଚନା ମିଳିଥିଲା। ଖବର ପାଇ ପୁଲିସ୍‌ ଚଢ଼ାଉ କରି ସେମାନଙ୍କୁ ଗିରଫ କରିବା ପାଇଁ ସକ୍ଷମ ହୋଇଥିଲା।