କେବଳ ବାରଣ୍ଡାରେ ଛାତ ପକାଇ ଘର ପୂର୍ଣ୍ଣାଙ୍ଗ ହୋଇଛି ବୋଲି ଦର୍ଶାଇ ସଂପୂର୍ଣ୍ଣ ବିଲ୍ କରି ଟଙ୍କା ଉଠାଇ ନେଲେ ଯନ୍ତ୍ରୀ
ହାଟଡ଼ିହି: ଦେଖନ୍ତୁ ଏହି ଘରକୁ । ବାହାରୁ ଦେଖିଲେ ଆପଣଙ୍କୁ କ’ଣ ଲାଗୁଛି? ଚକାଚକ ଛାତଘର, ବାରଣ୍ଡା, ପୁଣି ଲାଗିଛି ଲୁହା କବାଟ । ହେଲେ ଆପଣଙ୍କ ଆଖିକୁ ଦିଆଯାଇଛି ଧୋକା । ଆପଣ ଯାହାକୁ ଛାତଘର ବୋଲି ବାହାରୁ ଦେଖି ଭାବୁଛନ୍ତି, ଅସଲରେ ତାହା ଏମିତି । ଘରେ ଆଦୌ ଛାତ ପଡିନାହିଁ, କେବଳ ବାରଣ୍ଡାରେ ପଡିଛି ଛାତ । ଛାତ ପଡିଲା ଭଳିଆ ଚାରିପାଖର କାନିସ ବାହାର କରାଯାଇଛି। ହେଲେ ଘର ପୂରା ହୋଇଯାଇଛି ବୋଲି ଦର୍ଶାଇ ପୂରା ଟଙ୍କା ବିଲ୍ କରିଛନ୍ତି ଚତୁର ଯନ୍ତ୍ରୀ ।
Sambad is now on WhatsApp
Join and get latest news updates delivered to you via WhatsApp
ଲୋକଙ୍କ ଆଖିରେ ଆଙ୍ଗୁଠି ଗେଞ୍ଜି ଏଭଳି ଦୁର୍ନୀତି କରାଯାଇଛି କେନ୍ଦୁଝର ଜିଲ୍ଲା ହାଟଡିହି ବ୍ଲକ ଆମ୍ବୋ ପଂଚାୟତର ଖଙ୍ଖୋ ବାଲିଆ ସାହିରେ । ୨୦୧୮/୧୯ ଆର୍ଥିକ ବର୍ଷରେ ଆମ ଗାଁ ଆମ ବିକାଶ ଯୋଜନାରେ କମ୍ୟୁନିଟି ସେଣ୍ଟର ନିର୍ମାଣ ପାଇଁ ଅଢ଼େଇ ଲକ୍ଷ ଟଙ୍କାର ଅନୁଦାନ ଯୋଗାଇ ଦିଆଯାଇଥିଲା । ସେହି ଅନୁସାରେ ବାଲିଆ ସାହିର ଗାଁ ମୁଣ୍ଡରେ ଆରମ୍ଭ କରାଯାଇଥିଲା ଘର । କିନ୍ତୁ ଘରର ଛାତ ପକାଯାଇ ନଥିବା ବେଳେ କେବଳ ବାରଣ୍ଡାର ଛାତ ପକାଇ ଛାତ ପଡିଲା ପରି ଚାରିପାଖର କାନିସ ବାହାର କରାଯାଇଥିଲା । ସାମ୍ନା ପାଖ ପ୍ଲାଷ୍ଟର କରି ରଙ୍ଗ କରାଯାଇଥିଲା । ଏପରିକି ଘରର ଭିତର ପାଖ ଓ ଘରର ପଛକାନ୍ଥ ପ୍ଲାଷ୍ଟର ହୋଇନି । ଡିସପ୍ଲେ ବୋର୍ଡ ମଧ୍ୟ ନାହିଁ । ଯେ କେହି ବାହାରୁ ଦେଖିବ ଘରଟି ପୂର୍ଣ୍ଣାଙ୍ଗ ହୋଇଛି ବୋଲି ଭାବିବ । କିନ୍ତୁ ଘରର ଛାତ ପଡିନଥିବା ବେଳେ ଅଧାପନ୍ତରିଆ ଘରକୁ ଯନ୍ତ୍ରୀ ଜଣକ ସମ୍ପୂର୍ଣ୍ଣ ବିଲ କରି ଟଙ୍କା ଉଠାଇ ନେଇଥିବାର ଅଭିଯୋଗ ହୋଇଛି।
୩୮ନମ୍ବର ଏମବିର ୧୦୮ପୃଷ୍ଠାରେ କନିଷ୍ଠଯନ୍ତ୍ରୀ ଓ ସହକାରୀ ଯନ୍ତ୍ରୀଙ୍କ ଦସ୍ତଖତରେ ଏହାର ଫାଇନାଲ ବିଲ କରାଯାଇଛି । ତେବେ ଏହାର ବିଦ୍ଧିବଦ୍ଧ ତଦନ୍ତ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଓ କହିଛନ୍ତି । ସେପଟେ ଏହି କାର୍ଯ୍ୟ ତଦାରଖ କରୁଥିବା କନିଷ୍ଠ ଯନ୍ତ୍ରୀ ମନୋଜ ବେହେରା ବ୍ଲକରୁ ବଦଳି ହୋଇ ସାରିଛନ୍ତି । କେନ୍ଦୁଝର ଜିଲ୍ଲାପାଳ ତୁରନ୍ତ ଏଥିରେ ହସ୍ତକ୍ଷେପ କରି ଦୁର୍ନ୍ନୀତୀଗ୍ରସ୍ଥ ଯନ୍ତ୍ରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।