ନିର୍ବାଚନ ପୂର୍ବରୁ ପ୍ରଥମ ରାଜନୈତିକ ହିଂସା: ଆଜି ବି ଧକୋଟା ବଜାର ବନ୍ଦ, ମୃତକ ପରିବାରଙ୍କୁ ଭେଟିଲେ ପିସିସି ସଭାପତି ନିରଞ୍ଜନ ପଟ୍ଟନାୟକ

ଘସିପୁରା: ଘସିପୁରାରେ ରାଜନୈତିକ ହିଂସାକାଣ୍ଡକୁ ନେଇ ବଢ଼ିଲା ରାଜନୀତି। ହତ୍ୟାର ଶିକାର ହୋଇଥିବା ରାମଚନ୍ଦ୍ର ବେହେରାଙ୍କ ପରିବାରକୁ ଭେଟିଲେ ପିସିସି ସଭାପତି ନିରଞ୍ଜନ ପଟ୍ଟନାୟକ ଓ ବରିଷ୍ଠ କଂଗ୍ରେସ ନେତା ଜୟଦେବ ଜେନା। ରାମଚନ୍ଦ୍ରଙ୍କ ପରିବାରକୁ ସମବେଦନା ଜଣାଇବା ସହ ହତ୍ୟାକାରୀଙ୍କୁ ତୁରନ୍ତ ଗିରଫ କରାନଗଲେ କଂଗ୍ରେସ ଜନ ଆନ୍ଦୋଳନ କରିବ ବୋଲି ଚେତାବନୀ ଦେଇଛନ୍ତ ନିରଞ୍ଜନ। ରାମଚନ୍ଦ୍ର ଜଣେ ଦକ୍ଷ ନେତା ଓ ସଂଗଠକ ଥିଲେ ବୋଲି କହିବା ସହ ଏହି ଅଞ୍ଚଳରେ ବାରମ୍ବାର ହତ୍ୟାକାଣ୍ଡ ହେଉଛି ବୋଲି କହିଛନ୍ତି ଶ୍ରୀ ପଟ୍ଟନାୟକ। ତେବେ ପୋଲିସ ଯଦି ଠିକ ଭାବରେ ଏହି ଘଟଣାର ତଦନ୍ତ କରିବ ତେବେ ହତ୍ୟାର ଶିକାର ହୋଇଥିବା ପରିବାର ଲୋକଙ୍କୁ ନ୍ୟାୟ ମିଳିବ ବୋଲି ନିରଞ୍ଜନ କହିଛନ୍ତି। ଏହି ହତ୍ୟାକାଣ୍ଡ ହେତୁ ଆଜି ବି ଧକୋଟା ବଜାର ବନ୍ଦ ରହିଛି।

ସୋମବାର ରାତିରେ ରାମଚନ୍ଦ୍ରଙ୍କ କେନ୍ଦୁଝର ଧକୋଟା ସ୍ଥିତ ଘର ନିକଟରେ ତାଙ୍କୁ ବିଭିତ୍ସ ଭାବେ ହତ୍ୟା କରିଥିଲେ ଦୁବୃର୍ତ। ଏହି ଘଟଣାରେ ମନ୍ତ୍ରୀ ବଦ୍ରିପାତ୍ରଙ୍କ ଗୋଷ୍ଠୀର ସମ୍ପୃକ୍ତି ଥିବା ଅଭିଯୋଗ ଆଣିଥିଲା ବିଜେପି। ମାତ୍ର ଏହି ଅଭିଯୋଗକୁ ଖଣ୍ଡନ କରିଥିଲେ ମନ୍ତ୍ରୀ ଏବଂ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ସେପଟେ ଏହି ଘଟଣାରେ ୫ଜଣ ଅଭିଯୁକ୍ତଙ୍କୁ ଗିରଫ କରିବା ସହ ଅଧିକ ତଦନ୍ତ ଜାରି ରଖିଛି କେନ୍ଦୁଝର ପୋଲିସ୍‌।