ବୋଲେରୋ ଧକ୍କାରେ ମହିଳାଙ୍କ ମୃତ୍ୟୁ

ହାଟଡିହି: ଆନନ୍ଦପୁର- ଭଦ୍ରକ ରାସ୍ତାର ଚଣ୍ଡୀ ବିରଞ୍ଚିପୁର ଛକ ନିକଟରେ ଆଜି ସକାଳ ୧୦ଟା ବେଳେ ଘଟିଛି ଏକ ଦୁର୍ଘଟଣା। ଏହି ଦୁର୍ଘଟଣାରେ ଜଣେ ମହିଳାଙ୍କ ଜୀବନ ଯାଇଛି। ସୂଚନାରୁ ପ୍ରକାଶ ଯେ, ଚଣ୍ଡୀ ବିରଞ୍ଚିପୁର ଗ୍ରାମର ରବୀନ୍ଦ୍ର ଜେନାଙ୍କ ପତ୍ନୀ ପ୍ରତିମା ଜେନା ଶୌଚ ପାଇଁ ରାସ୍ତା ଆରପଟକୁ ଯାଇ ଫେରୁଥିବା ବେଳେ ଭଦ୍ରକ ପଟୁ ଦ୍ରୁତ ଗତିରେ ଆସୁଥିବା ଏକ ବୋଲେରୋ ତାଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ପ୍ରତିମାଙ୍କ ମୃତ୍ୟୁ ଘଟିଥିଲା।

ଏହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇଥିବା ବେଳେ ନନ୍ଦିପଦା ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ବୋଲେରକୁ ଜବତ କରିବା ସହିତ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ଆନନ୍ଦପୁର ଡାକ୍ତରଖାନାକୁ ପଠାଇ ପୁଲିସ ଅଧିକ ତଦନ୍ତ ଜାରି ରଖିଛି।