ଖୋର୍ଦ୍ଧା : ଖୋର୍ଦ୍ଧା ଜିଲ୍ଲା ସାରୁଅ ଜମି ଦୁର୍ନୀତି ମାମଲାରେ ମୁହଁ ଖୋଲିଛନ୍ତି ଡ୍ରାଇଭର ରବି ସେଠୀ । ଓଡିଶା ଇନଫ୍ରାଟେକ୍ ପ୍ରାଇଭେଟ୍ ଲିମିଟେଡ୍ ତାଙ୍କ ନାମରେ ବେଆଇନ୍ ଭାବେ ସାରୁଅରେ ଅନୁସୂଚିତ ଜାତିର ଲୋକଙ୍କ ମାଲିକାନାରେ ଥିବା ଜମି କିଣିଛି । ରବି ସେଠୀଙ୍କ ନାମରେ ଜମି କିଣିବା ପାଇଁ କମ୍ପାନୀ କର୍ତ୍ତୃପକ୍ଷ ତାଙ୍କୁ କହିବା ସମୟରେ ସେ ମନା କରିଥିଲେ । ହେଲେ କର୍ତ୍ତୃପକ୍ଷ ତାଙ୍କ ଚାକିରି ଛଡେଇ ନେବାର ଧମକ ଦେଇ ଜମି କିଣିଛନ୍ତି । ନିକଟରେ ତାଙ୍କ ନାମରେ ସାରୁଅ ବ୍ୟତୀତ ପୁରୀରେ କମ୍ପାନି ଜମି କଣିଥିବା ଜାଣିବା ପରେ ସେ ମୁହଁ ଖୋଲିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଚାକିରି ଚାଲି ଯିବା ଭୟରେ କମ୍ପାନି କର୍ତ୍ତୃପକ୍ଷ ଯେଉଁଠି କହିଲେ ସେଇଠି ସେ ଦସ୍ତଖତ କରିଥିଲେ । ବେଆଇନ୍ ଜମି କିଣିବା ନେଇ ସେ ଖୋର୍ଦ୍ଧା ଜିଲ୍ଲାପାଳଙ୍କୁ ଲିଖିତ ଆକାରରେ ଅଭିଯୋଗ ମଧ୍ୟ କରିଥିଲେ । ରବି ସେଠୀ ଓରଟେଲ୍ କମ୍ୟୁନିକେସନରେ ୨୦୦୦ ମସିହାରୁ ୨୦୧୭ ଯାଏଁ ଡ୍ରାଇଭର ଭାବେ କାମ କରୁଥିଲେ । ସେ ଜଣେ ଅନୁସୂଚିତ ଜାତିର ବ୍ୟକ୍ତି ହୋଇଥିବାରୁ ତାଙ୍କ ନାମରେ ଜମି କିଣିବାକୁ ବାଧ୍ୟ କରିଥିଲେ ଓଡ଼ିଶା ଇନଫ୍ରାଟେକ୍ ପ୍ରାଇଭେଟ୍ ଲିମିଟେଡର କର୍ତ୍ତୃପକ୍ଷ ।
ଯେହେତୁ ସାରୁଅ ଜମି ଅନୂସୁଚିତ ଜାତିର ଲୋକଙ୍କର ତେଣୁ ତାଙ୍କ ନାଁରେ କିଣା ଯାଇଛି । ଏହାସହ ପୁରୀ ଜିଲ୍ଲାରେ ମଧ୍ୟ ତାଙ୍କ ନାଁରେ କମ୍ପାନି ଜମି କିଣିଥିବା ଗଣମାଧ୍ୟମ ଜରିଆରେ ସରକାରଙ୍କୁ ଜଣାଇଛନ୍ତି ରବି ସେଠୀ । ପୁରୀରେ ଜମି କିଣିବା ବାବଦରେ ତାଙ୍କୁ କିଛି ଜଣା ନାହିଁ ଏବଂ ରବି ସେଠୀଙ୍କୁ ବେଆଇନ୍ ଭାବେ ବ୍ୟବହାର କରାଯାଇଥିବା ସେ ଅଭିଯୋଗ କରିଛନ୍ତି।