ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ୩ ଯୁବକଙ୍କ ଆତଙ୍କରାଜ, ୨ ଡାକ୍ତରଙ୍କୁ ଆକ୍ରମଣ କରି ଫେରାର୍
ଖୋର୍ଦ୍ଧା : ଆଜି ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ୩ଜଣ ଯୁବକ ବେଶ୍ କିଛି ସମୟ ଧରି ଆତଙ୍କରାଜ ସୃଷ୍ଟି କରିବା ସହ ଦୁଇଜଣ କାର୍ଯ୍ୟରତ ଡାକ୍ତରଙ୍କୁ ଗାଳିଗୁଲଜ କରିବା ସହ ପିଭିସି ପାଇପରେ ଆକ୍ରମଣ କରିଛନ୍ତି । ସିସିଟିଭି ଫୁଟେଜରୁ ଆକ୍ରମଣକାରୀ ଯୁବକଙ୍କୁ ଚିହ୍ନଟ କରାଯାଇଥିବା ବେଳେ ଏଯାଏଁ ଯୁବକଙ୍କୁ ଗିରଫ କରାଯାଇନଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଆଜି ଅପରାହ୍ଣ ସାଢ଼େ ୫ଟାରେ ସରଦାପୁରର ସେକ୍ ଅମିନ୍ (୪୦) ନାମକ ଜଣେ ବ୍ୟକ୍ତି ହାତରେ ଏକ ପିଭିସି ପାଇପ୍ ଧରି ସର୍ଜରୀ ୱାର୍ଡ ମଧ୍ୟକୁ ପଶିଥିଲେ । ସେଠାରେ ଥିବା ଲୋକଙ୍କୁ ଭୟଭୀତ କରିବା ସହ ୱାର୍ଡରେ କାର୍ଯ୍ୟରତ ଦୁଇଜଣ ଡାକ୍ତର ଶ୍ୟାମା ପ୍ରସନ୍ନ ମିତ୍ର ଓ ଶୁଭ୍ରାଂଶୁ କୁମାର ସାହୁଙ୍କୁ ଗାଳିଗୁଲଜ କରିବା ସହ ତାଙ୍କୁ ଆକ୍ରମଣ କରିଥିଲେ । ଆକ୍ରମଣକାରୀ ସେକ୍ ଅମିନ୍ ସହ ଦୁଇଜଣ ସହଯୋଗୀ ମଧ୍ୟ ଡାକ୍ତରଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ପ୍ରାଣରେ ମାରିଦେବାକୁ ଧମକ ଦେଇଥିଲେ । ଯୁବକଙ୍କ ଉଗ୍ର ରୁପ ଦେଖି ୱାର୍ଡରେ ଥିବା ନିରାପତ୍ତା କର୍ମଚାରୀ, ରୋଗୀ ଓ ରୋଗୀଙ୍କ ସମ୍ପର୍କୀୟ ଭୟଭୀତ ହୋଇଯାଇଥିଲେ । ଏନେଇ ଡାକ୍ତର ଶ୍ରୀ ମିତ୍ର ଓ ସାହୁ ହସ୍ପିଟାଲର ଅଧିକ୍ଷକ ରଘୁନାଥ ନାୟକଙ୍କୁ ଲିଖିତ ଅଭିଯୋଗ କରିବପରେ ଅଧିକ୍ଷକ ଏନେଇ ଟାଉନ୍ ଥାନାରେ ଏତଲା ଦେଇଛନ୍ତି । ଯୁବକ ତିନିଜଣଙ୍କ ସିସିଟିଭି ଫୁଟେଜରୁ ସେମାନଙ୍କୁ ଚିହ୍ନଟ କରାଯାଇଛି ।
ତେବେ ଏନେଇ ଟାଉନ୍ ଥାନା ଅଧିକାରୀ ଉମାଶଙ୍କର ସିଂହଙ୍କୁ ପଚାରିବାରେ ଘଟଣା ସମ୍ପର୍କରେ ସେ ଫୋନରେ ସୂଚନା ପାଇଛନ୍ତି । ଲିଖିତ ଅଭିଯୋଗ ଏଯାଏଁ ହସ୍ତଗତ ହୋଇନାହିଁ । ଅଭିଯୋଗ ଆସିବା ପରେ ଆଇନାନୁସାରେ ପଦକ୍ଷେପ ନିଆଯିବ ବୋଲି କହିଛନ୍ତି ।