ଜମିବାଡ଼ି ବିବାଦକୁ ନେଇ ହତ୍ୟାକାଣ୍ଡ, ଯୁବକ ମୃତ
ଖୋର୍ଦ୍ଧା: ଟାଉନ୍ ଥାନା ଅନ୍ତର୍ଗତ ବୋଡ଼ି ପୋଖରି ନିକଟସ୍ଥ ଧୋବାସାହିରେ ଜମିବାଡ଼ି ବିବାଦକୁ କେନ୍ଦ୍ର କରି ଜଣେ ଯୁବକଙ୍କୁ ହତ୍ୟା କରାଯାଇଛି। ମିଳିଥିବା ସୂଚନା ଅନୁସାରେ ପ୍ରଶାନ୍ତ କୁମାର ସେଠୀ(୩୨)ଙ୍କୁ ହତ୍ୟା କରାଯାଇ ଥିବା ପୁଲିସ କହିଛି। ବୈରାଗୀ ସେଠୀ ଓ ରାଜକିଶୋର ସେଠୀ ଦୁଇ ଭାଇଙ୍କ ପରିବାର ମଧ୍ୟରେ ଜମିବାଡ଼ିକୁ କେନ୍ଦ୍ର କରି ଅନେକ ଦିନରୁ ବିବାଦ ଲାଗି ରହିଥିଲା। ଏହି ଘଟଣା ଆଜି ଅପରାହ୍ନ ୩.୩୦ରେ ଉଗ୍ର ରୂପ ନେଇଥିଲା। ବୈରାଗୀଙ୍କ ପୁଅ-ଝିଅ ବିଜୟ ସେଠୀ, ସଞ୍ଜୟ ସେଠୀ ଓ ଜୟନ୍ତୀ ସେଠୀ ଆକ୍ରମଣ କରିଥିଲେ। ଘଟଣା ପରେ ପ୍ରଶାନ୍ତଙ୍କୁ ପରିବାରର ସଦସ୍ୟଙ୍କ ଦ୍ୱାରା ଖୋର୍ଦ୍ଧା ସଦର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସଧୀନ ଅବସ୍ଥାରେ ପ୍ରଶାନ୍ତଙ୍କ ମୃତ୍ୟୁ ହୋଇଥିବା ଡାକ୍ତର ଘୋଷଣଶ କରିଥିଲେ। ଏ ନେଇ ପ୍ରଶାନ୍ତର ଜଣେ ଦାଦା ବସନ୍ତ ସେଠୀ ଥାନାରେ ଅଭିଯୋଗ ଆଣିଛନ୍ତି।
Sambad is now on WhatsApp
Join and get latest news updates delivered to you via WhatsApp
ହତ୍ୟାକାଣ୍ଡର ପ୍ରକୃତ କାରଣ ଜଣାପଡ଼ି ନାହିଁ ବୋଲି ପୁଲିସ କହିଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ହତ୍ୟାକାଣ୍ଡ ସ୍ପଷ୍ଟ ହେବ। ପୁଲିସ ଏ ନେଇ ଭାରତୀୟ ଦଣ୍ଡ ସଂହିତା ଧାରା ୩୦୨ରେ ୩୩/୧୮ରେ ମାମଲା ରୁଜୁ କରି ଘଟଣାର ତଦନ୍ତ କରୁଛି। ମୃତ ପ୍ରଶାନ୍ତ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଆଉଟ୍ ଡୋର ଟିକେଟ କାଉଣ୍ଟରରେ କାର୍ଯ୍ୟରତ ଥିଲେ। ଅଭିଯୁକ୍ତମାନେ ଫେରାର ଥିବା ଜଣାପଡ଼ିଛି।