କୁଆଖାଇରେ ପୁଣି ଗଲା ଜୀବନ: ଭାସିଗଲେ ୧୭ ବର୍ଷର ବାଳକ

ବାଲିଅନ୍ତା: ଭୁବନେଶ୍ୱର ଉପକଣ୍ଠ ବାଲିଅନ୍ତା ରଙ୍ଗବଜାର ନିକଟ କୁଆଖାଇ ନଦୀରେ ଭାସିଗଲେ ୧୭ ବର୍ଷର ବାଳକ | ନିଖୋଜ ଥିବା ବାଳକଙ୍କ ଘର ଝାରପଡା ଅଞ୍ଚଳରେ ହୋଇଥିବାବେଳେ ଗତକାଲି ୪ ଜଣ ସାଙ୍ଗ କୁଆଖାଇ ନଦୀକୁ ଗାଧୋଇବାକୁ ଯାଇଥିଲେ | ତେବେ ୪ ଜଣ ସାଙ୍ଗଙ୍କ ମଧ୍ୟରୁ ଜଣଙ୍କର ନଦୀରେ ଗୋଡ଼ ଖସି ଯାଇଥିଲା | ଆଉ ସେ ଭାସିଯାଇଥିଲେ | ଏହି ସୂଚନା ପାଇବା ପରେ ବାଲିଅନ୍ତା ଅଗ୍ନିଶମ ବାହିନୀର ସର୍ଚ୍ଚ ଅପରେସନ ଜାରି ରହିଛି |

ଉଲ୍ଲେଖ ଥାଉ କି ଗତ ମାସରେ ମଧ୍ୟ ଜଣେ ଯୁବକ ଏହି ନଦୀରେ ଭାସିଯାଇଥିଲେ | ସେହିପରି ଜୁଲାଇ ମାସରେ ବଇଁଚୁଆ ଧବଳାହାର ପଠାରେ କୁଆଖାଇ ନଦୀରେ ୪ ଏମ୍‌ବିଏ ଛାତ୍ର ବୁଡ଼ି ପ୍ରାଣ ହରାଇଥିଲେ | ମୃତକମାନେ ହେଲେ ଝାଡ଼ଖଣ୍ଡ ଜାମ୍‌ସେଦପୁରର ଆରିଆନ୍‌ ମିଶ୍ର(୨୫), କଟକର କୁମାର ଅବିନାଶ, ବାଲେଶ୍ବରର ରୋହିତ ପରିଡ଼ା(୨୪) ଏବଂ କଟକ ବାଲିକୁଦାର ପ୍ରତୀକ ଧଳସାମନ୍ତ(୨୩) | ସେହିପରି ମେ ମାସରେ ମଧ୍ୟ କୁଆଖାଇରେ ବୁଡ଼ି ଦୁଇ ଯୁବ ଇଞ୍ଜିନିୟର୍‌ଙ୍କ ମୃତ୍ୟୁ ଘଟିଥିଲା । ସତ୍ୟଭାମାପୁର ଇନ୍ଦ୍ରପାଳସ୍ଥିତ କୁଆଖାଇ ଘାଟରେ ଏହି ହୃଦୟବିଦାରକ ଅଘଟଣ ଘଟିଥିଲା । ମୃତକମାନେ ହେଲେ ତମାଣ୍ଡୋ ଥାନା ଅଞ୍ଚଳରେ ରହୁଥିବା ସ୍ମୃତି ସୌରଭ ପ୍ରଧାନ(୨୩) ଓ ଅନୁଗୁଳ ଜିଲ୍ଲା ରେଙ୍ଗାଲି ଥାନା ଅଞ୍ଚଳର ସତ୍ୟଜିତ ଦାସ।