ମାଛ ଗାଡ଼ି ଲୁଟ୍ ମାମଲାରେ ୩ ଗିରଫ
ଖୋର୍ଦ୍ଧା: ଆଜି ଭୋରରେ ଖୋର୍ଦ୍ଧା ଉପକଣ୍ଠ ତରତୁଆ ଠାରେ ଏକ ମାଛଗାଡ଼ି ଲୁଟ ହୋଇଥିଲା । ଏହି ଘଟଣାରେ ଖୋର୍ଦ୍ଧା ଟାଉନ୍ ଥାନା ପୁଲିସ ତଦନ୍ତ କରି ୩ ଜଣଙ୍କୁ ଗିରଫ କରିବା ସହ ଲୁଟ ହୋଇଥିବା ମାଛ ଓ ଗାଡ଼ି ଉଦ୍ଧାର କରିଛି ।
ସୂଚନାନୁସାରେ, ଗଂଜାମ ଜିଲ୍ଲା ଭଂଜନଗର ନିରଗଛା ଗାଁରୁ ଜିତୁ ବାରିକ ନାମକ ଜଣେ ଯୁବକ ଏକ ୪୦୭ ଗାଡ଼ିରେ ୧ କ୍ୱିଂଟାଲ୍ ମାଛ ନେଇ ବାଙ୍କୀ ଆସୁଥିଲେ । ଭୋର ୪ଟା ବେଳେ ତରତୁଆ ଛକ ଠାରେ ୩ଜଣ ଯୁବକ ଏକ ମୋଟସାଇକଲରେ ପିଛା କରି ଗାଡ଼ିଟିକୁ ଅଟକାଇଥିଲେ । ଏହାପରେ ଗାଡ଼ିଚାଳକ ଜିତୁଙ୍କୁ ମାରପିଟ କରିବା ସହ ମାଛଭର୍ତି ଗାଡ଼ିଟିକୁ ନେଇ ନାଲିପଡ଼ା ଜଙ୍ଗଲ ମଧ୍ୟକୁ ନେଇଯାଇଥିଲେ । ସେଠାରେ ତାଙ୍କୁ ଛାଡ଼ି ଦେଇ ଗାଡ଼ି ନେଇ ବାଘମାରୀ ପଟକୁ ଚାଲିଯାଇଥିଲେ ।
Sambad is now on WhatsApp
Join and get latest news updates delivered to you via WhatsApp
ଏନେଇ ଜିତୁ ଥାନାରେ ଲିଖିତ ଅଭିଯୋଗ କରିବା ପରେ ଏସ୍ଆଇ ଅନୁଭା ଦାସଙ୍କ ନେତୃତ୍ୱରେ ଏକ ଟିମ୍ ବିଭିନ୍ନ ସ୍ଥାନରେ ଚଢ଼ଉ କରିବା ସହ ୩ଜଣଙ୍କୁ ଗିରଫ କରିଥିଲେ । ସେମାନେ ଲୁଚାଇ ରଖିଥିବା ମାଛ ଓ ଗାଡ଼ି ଉଦ୍ଧାର କରିଥିଲେ । ଗିରଫ ହୋଇଥିବା ୩ଜଣ ହେଲେ ନାଲିପଡ଼ା ଅର୍ଜୁନପୁରର ପ୍ରଶାନ୍ତ ପାଣ୍ଡିଆ ଓ ତପନ ସ୍ୱାଇଁ, ତୋଟାପଡ଼ାର ଲିଙ୍ଗରାଜ ବେହେରା । ଏନେଇ ୧୬୫/୨୦୨୧ରେ ଏକ ମାମଲା ରୁଜୁ କରାଯିବା ସହ ୩ଜଣ ଅଭିଯୁକ୍ତଙ୍କ ସ୍ୱାସ୍ଥ୍ୟ ପରୀକ୍ଷା ପରେ କୋର୍ଟ ଚାଲାଣ କରାଯାଇଥିବା ପୁଲିସ ସୂତ୍ରରୁ ଜଣାଯାଇଛି ।