ଲାଞ୍ଚ ମାଗିଲେ ଯନ୍ତ୍ରୀ, ବନ୍ଧା ହେଲେ ପିଅନ
ଲାଂଚୁଆ ନିର୍ବାହୀ ଯନ୍ତ୍ରୀ ଫେରାର୍, ଭିଜିଲାନ୍ସର ଛାନ୍ଭିନ୍
କୋରାପୁଟ : ଠିକାଦାରଙ୍କ ବିଲ୍ ପାସ କରାଇ ଦେବା ପାଇଁ କୋରାପୁଟ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ଭାରପ୍ରାପ୍ତ ନିର୍ବାହୀ ଯନ୍ତ୍ରୀ ଲକ୍ଷ୍ମଣ କୁମାର ବେହେରା ୫୦ହଜାର ଟଙ୍କା ଲାଞ୍ଚ ମାଗିଥିଲେ। କିନ୍ତୁ ଲାଞ୍ଚ ଟଙ୍କା ଆଣିବାକୁ ନିଜେ ଯାଇ ନଥିଲେ ଭାରପ୍ରାପ୍ତ ନିର୍ବାହୀ ଯନ୍ତ୍ରୀ। ପିଅନ ସତ୍ୟବାନ ମଲ୍ଲିକଙ୍କୁ ପଠାଇଲେ। ଅଧିକାରୀଙ୍କ ନିର୍ଦେଶ ମାନି ଟଙ୍କା ଧରି ଆସିଲା ବେଳକୁ ପିଅନଙ୍କୁ ମାଡ଼ି ବସିଲେ ଭିଜିଲାନ୍ସ ଅଧିକାରୀ। ଆଉ ଏହି ଖବର ପାଇବା ପରେ ଫେରାର ହୋଇଯାଇଛନ୍ତି ନିର୍ବାହୀ ଯନ୍ତ୍ରୀ। ଶେଷକୁ ପିଅନ ବନ୍ଧା ହୋଇ ଜେଲ ହାଜତକୁ ଯାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
କୋରାପୁଟ ଜିଲ୍ଲା କୁନ୍ଦୁରା ବ୍ଲକ ଶିରିଗୁଡା ଗ୍ରାମରେ ନିର୍ମାଣ ହୋଇଥିବା ଏକ ଓଭରହେଡ ପାଣି ଟାଙ୍କିର ବିଲ କରାଇବା ପାଇଁ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ଭାରପ୍ରାପ୍ତ ନିର୍ବାହୀ ଯନ୍ତ୍ରୀ ଲକ୍ଷ୍ମଣ କୁମାର ବେହେରା ୫୦ ହଜାର ଟଙ୍କା ଲାଂଚ ମାଗିଥିଲେ। ୩୫ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମାଣ ହୋଇଥିବା ଏହି ଟାଙ୍କିର ଦ୍ବିତୀୟ ବିଲ ବାବଦରେ ୧୦ ଲକ୍ଷ ୫୪ ହଜାର ଟଙ୍କା ପ୍ରଦାନ କରିବାକୁ ସି- କ୍ଲାସ ଠିକାଦାର ଟଙ୍କଧର ହରିଜନଙ୍କୁ କହିଥିଲେ। ତେବେ ଏଥିନେଇ ଠିକାଦାର ଜଣଙ୍କ ଭିଜିଲାନ୍ସରେ ଅଭିଯୋଗ କରିବା ପରେ ତାଙ୍କୁ ଧରିବା ପାଇଁ ଭିଜିଲାନ୍ସ ପକ୍ଷରୁ ଜାଲ ବିଛା ଯାଇଥିଲା। ତେବେ ସିଧାସଳଖ ଟଙ୍କା ନେବାକୁ ମନା କରି ଦେଇଥିଲେ ନିର୍ବାହୀ ଯନ୍ତ୍ରୀ। ପିଅନ ସତ୍ୟବାନ ମଲ୍ଲିକଙ୍କୁ ଟଙ୍କା ଆଣିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ଠିକାଦାର ଓ ପିଅନ ଗୋଟିଏ ଏଟିଏମ୍ କାଉଣ୍ଟରକୁ ଯାଇଥିଲେ। ପିଅନ ସତ୍ୟବାନ ମଲ୍ଲିକଙ୍କ ବାଇକ ଡିକିରେ ଟଙ୍କା ରଖି ଦେବାକୁ ସେ ଠିକାଦାରଙ୍କୁ କହିଥିଲେ। ପରେ ଡିକି ବନ୍ଦ କରି ଗାଡ଼ି ବାହାର କରିଲା ବେଳକୁ ଭିଜିଲାନ୍ସ ଅଧିକାରୀମାନେ ମାଡ଼ି ବସିଥିଲେ। ଠିକାଦାର ଦେଇଥିବା ଲାଞ୍ଚ ଟଙ୍କା ପିଅନଙ୍କ ପାଖରୁ ଉଦ୍ଧାର କରାଯାଇଥିଲା। ଏପଟେ ପିଅନ ଧରା ପଡ଼ିବା ଖବର ପାଇ ନିର୍ବାହୀ ଯନ୍ତ୍ରୀ ଲକ୍ଷ୍ମଣ ବେହେରା ଫେରାର ହୋଇ ଯାଇଥିଲେ। ତାଙ୍କୁ ଧରିବା ପାଇଁ ଭିଜିଲାନ୍ସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲେ ମଧ୍ୟ ତାଙ୍କ ପତ୍ତା ମିଳିନି। ଏପଟେ କୋରାପୁଟ ଭିଜିଲାନ୍ସ ୩୩/୨୦୧୮ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ପିଅନ ସତ୍ୟବାନ ମଲ୍ଲିକଙ୍କୁ ଗିରଫ କରାଯାଇଥିଲା ବେଳେ ନିର୍ବାହୀ ଯନ୍ତ୍ରୀଙ୍କୁ ଧରିବା ପାଇଁ ଉଦ୍ୟମ ଚାଲିଛି।
ପ୍ରକାଶଥାଉକି, ଆଜିର ଘଟଣା ପୂର୍ବରୁ ଶ୍ରୀ ବେହେରା ତିନି ଥର ଭିଜିଲାନ୍ସ ହାବୁଡ଼ରେ ପଡ଼ିଛନ୍ତି।