ଜୟପୁର: ଆଜି ସକାଳେ କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକ୍ ଅଞ୍ଚଳରେ ଘଟିଛି ଏକ ଦୁଃଖଦ ଘଟଣା। ଘର ଭିତରେ ଥିବା ବେଳେ ସର୍ଟ ସର୍କିଟ୍ ଯୋଗୁଁ ଘରେ ନିଆଁ ଲାଗିଯିବାରୁ ପ୍ରଥମ ଶ୍ରେଣୀରେ ପଢ଼ୁଥିବା ଜଣେ ୫ ବର୍ଷର କୁନି ଝିଅ ଜୀବନ୍ତ ଦଗ୍ଧ ହୋଇ ଯାଇଥିିବା ବେଳେ ଏହି ଅଗ୍ନିକାଣ୍ଡରେ ମୃତ ଶିଶୁ କନ୍ୟାର ମାଆ ଓ ସାନ ଭାଇ ଗୁରୁତର ଭାବେ ଆହତ ହୋଇଛନ୍ତି। ଆହତମାନଙ୍କୁ ଉଦ୍ଧାର କରି ପ୍ରଥମେ ବୋରିଗୁମ୍ମା ଡାକ୍ତରଖାନା ଓ ପରେ ଜୟପୁର ମେଡିକାଲରେ ଭର୍ତ୍ତି କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ବୋରିଗୁମ୍ମା ଥାନା ଅନ୍ତର୍ଗତ ମାଲଦା ପଞ୍ଚାୟତର ତାରାଗାଁର ବଳରାମ ହରିଜନ, ପତ୍ନୀ ଧନମତି ହରିଜନ,୫ ବର୍ଷର ଝିଅ ଦିନେଶ୍ୱରୀ ହରିଜନ ଓ ବର୍ଷକର ପୁଅ ରଇଲ ହରିଜନ ସହିତ ରୁହନ୍ତି। ଦିନେଶ୍ୱରୀ ଗାଁ ସ୍କୁଲରେ ପ୍ରଥମ ଶ୍ରେଣୀରେ ପଢ଼ନ୍ତି। ତେବେ ଶ୍ରାବଣ ମାସ ପାଇଁ ବଳରାମ ହରିଜନ ତୀର୍ଥ କରିବା ଲାଗି ହରିଦ୍ୱାର ଯାଇଥିବା ବେଳେ ଘରେ ଧନମତି, ରଇଲ ଓ ଦିନେଶ୍ୱରୀ ରହୁଥିଲେ। ଆଜି ଭୋରରୁ ହଠାତ ଘର ଭିତରେ ନିଆଁ ଜଳି ଉଠିଥିଲା। କୁହାଯାଉଛି ସର୍ଟ ସର୍କିଟ ଯୋଗୁଁ ଏହି ଅଗ୍ନିକାଣ୍ଡ ଘଟିଥିଲା। ଏହି ଅଗ୍ନିକାଣ୍ଡରେ ଦିନେଶ୍ୱରୀ ଜୀବନ୍ତ ଦଗ୍ଧ ହୋଇ ଯାଉଥିବା ବେଳେ ଧନମତି ଓ ରଇଲଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି।