ଖୋର୍ଦ୍ଧା: ଆଜି ଦୁଇଟି ପୃଥକ ମାମଲାରେ ଖୋର୍ଦ୍ଧା ଟାଉନ୍ ଥାନା ପୁଲିସ ବିପୁଳ ପରିମାଣରେ ବିଦେଶୀ ମଦ ଜବତ କରିବା ସହ ବେଆଇନ ବ୍ୟବସାୟ ଅଭିଯୋଗରେ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ୨୯ ତାରିଖ ରାତି ୭ଟାରୁ ୯ଟା ମଧ୍ୟରେ ପୁଲିସର ରାତ୍ରୀକାଳୀନ ପାଟ୍ରୋଲିଂ ବେଳେ ବେଆଇନ ଭାବେ ବିଦେଶୀ ମଦ ବିକ୍ରି ହେଉଥିବା ସୂଚନା ମିଳିଥିଲା । ସୂଚନା ଆଧାରରେ ପୁଲିସର ଦୁଇଟି ଟିମ୍ ଚଢ଼ଉ କରିଥିଲା । ଖୋର୍ଦ୍ଧା ପୌର ପରିଷଦ ଛକ ଠାରେ ବାଙ୍କୀର ତାଳବସ୍ତଠାରୁ ବିଦେଶୀ ମଦ ନେଇ ଆସୁଥିବା ବେଳେ ପୁଲିସ ଦୁଇଜଣଙ୍କୁ ଧରିଥିଲା । ସେମାନଙ୍କ ଠାରୁ ୮୦ ଲିଟର ଭାରତରେ ନିର୍ମିତ ବିଦେଶୀ ମଦ (ଆଇଡି) ଜବତ କରିଥିଲା । ଥାନା ଅଧିକାରୀ ସଂଜୟ ପଟ୍ଟନାୟକ ଏନେଇ କହିଛନ୍ତି ଯେ ଏହି ମଦ ବେଆଇନ ଭାବେ ଅଣାଯାଇ ଖାଲି ମଦ ବୋତଲରେ ଭର୍ତ୍ତି କରି ବିକ୍ରି କରାଯାଉଥିଲା । ସେମାନଙ୍କ ଠାରୁ ସଂଖ୍ୟାଧିକ ଖାଲି ମଦ ବୋତଲ ମଧ୍ୟ ଜବତ କରାଯାଇଛି । ଏନେଇ ୨୫୨/୨୦୨୧ରେ ଏକ ମାମଲା ରୁଜୁ କରାଯିବା ସହ ବାଲୁଙ୍କେଶ୍ୱର ମହାପାତ୍ର ଓ ଛବୀନ୍ଦ୍ର କୁମାର ସାହୁଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।
ସେହିଭଳି ଅନ୍ୟ ଏକ ଚଢ଼ଉରେ, ଠେଙ୍ଗାହାଟ ଠାରେ ବେଆଇନ ବିଦେଶୀ ମଦ ବିକ୍ରି କରୁଥିବା ବେଳେ ରବୀନ୍ଦ୍ର ଛୁଆଳସିଂହ ନାମକ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି । ତାଙ୍କ ନିକଟରୁ ୧୫ଲିଟର ଆଇଡି ମଦ ଜବତ କରାଯାଇଛି । ଏନେଇ ୨୫୩/୨୦୨୧ରେ ଏକ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି । ଏହି ଚଢ଼ଉରେ ଏସ୍ଆଇ ବିନୟ ଭୂଷଣ ବେହେରା, ଏଏସ୍ଆଇ ବସନ୍ତ ପଟ୍ଟନାୟକ, କନ୍ଷ୍ଟେବଳ ପିକେ ହରିଚନ୍ଦନ, ଏମ୍ ଖାନ୍ ଓ ଅନ୍ୟ କର୍ମଚାରୀ ସାମିଲ ଥିଲେ ।