ଲକ୍ଷାଧିକ ଟଙ୍କାର ଶାଗୁଆନ କାଠ ଜବତ, କାଠ ମାଫିଆଙ୍କୁ ଛାଡ଼ିଦେଲା ବନ ବିଭାଗ!
ଖୋର୍ଦ୍ଧା : ଖୋର୍ଦ୍ଧା ବନ ବିଭାଗ ପକ୍ଷରୁ ଲକ୍ଷାଧିକ ଟଙ୍କାର ଶାଗୁଆନ କାଠ ଜବତ ହୋଇଛି । ତେବେ ଏହି ଘଟଣାରେ ସମ୍ପୃକ୍ତ ଅଭିଯୁକ୍ତ ରହସ୍ୟମୟ ଭାବେ ଫେରାର୍ ହେବା ଏବଂ ଘଟଣା ସମ୍ପର୍କରେ ବନ ବିଭାଗ ଗୋଟିଏ ଦିନ ପରେ ସାର୍ବଜନୀନ କରିବାନେଇ ସାଧାରଣରେ ନାନା କଳ୍ପନାଜଳ୍ପନା ପ୍ରକାଶ ପାଇଛି ।
Sambad is now on WhatsApp
Join and get latest news updates delivered to you via WhatsApp
ଗୁରୁବାର ବିଳମ୍ବିତ ରାତିରେ ବୈଦ୍ୟେଶ୍ୱର ନିକଟ ପସାଣିଆରୁ ବାଙ୍କି ଏକ ଟାଟା ଏସି (ଓଡି୦୨ ବିଏମ୍ ୩୦୪୦)କୁ ଖୋର୍ଦ୍ଧା ବନାଂଚଳର ବନବିଭାଗ କର୍ମଚାରୀଙ୍କ ଦ୍ୱାରା ଜବତ ହୋଇଥିଲା । ତେବେ ଏନେଇ ବନ ବିଭାଗ ପକ୍ଷରୁ ଆଜି ସୂଚନା ଦିଆଯାଇଥିଲା । ଆଜି ଏନେଇ ସୂଚନା ଦେଇ ବନାଂଚଳ ରେଂଜର ସତୀଶ ମିଶ୍ର କହିଛନ୍ତି ଯେ ପସାଣିଆ-ବାଙ୍କି ରାସ୍ତାର ବରପୁଟ ଠାରେ ଏକ ଟାଟା ଏସି ଜବତ କରାଯାଇଛି । ସେଥିରୁ ୨ କ୍ୟୁବିକ୍ ମିଟର ଶାଗୁଆନ କାଠ ଜବତ କରାଯାଇଛି । ତେବେ କାଠ ଗୁଡ଼ିକର ଗୁଣାତ୍ମକମାନ ଯାଂଚ ହୋଇନଥିବାରୁ ଏହାର ପ୍ରକୃତ ବଜାର ମୂଲ୍ୟ କେତେ ଜଣାପଡ଼ିନାହିଁ । କିନ୍ତୁ ଏହା ଲକ୍ଷାଧିକ ଟଙ୍କା ହେବ ବୋଲି ଅନୁମାନ କରାଯାଉଛି ।
ତେବେ ଏହି ଘଟଣାର ସବୁଠାରୁ ଗୁରୁତ୍ୱପୂର୍ଣ୍ଣ ଘଟଣାରେ ହେଲା, ବନ ବିଭାଗ ସୂଚନା ପାଇଁ ଗାଡ଼ିକୁ ଜବତ କରି ଗୋଟିଏ ଦିନ ଏନେଇ ଲୁଚାଇ ରଖିଥିଲା । ଦ୍ୱିତୀୟରେ, ଗାଡ଼ି ଜବତ କରାଯିବା ବେଳେ ଚାଳକ ସମେତ ଗାଡ଼ିରେ ଥିବା ୨ ଜଣଙ୍କୁ ଅଟକ ଥିବା ଜଣାପଡ଼ିଥିଲା । ତେବେ ଆଜି ବନ ବିଭାଗ କୌଣିସି ବ୍ୟକ୍ତି ଗିରଫ ହୋଇନାହାନ୍ତି ଓ ସମସ୍ତେ ଗାଡ଼ି ଛାଡ଼ି ଫେରାର୍ ହୋଇଯାଇଛନ୍ତି ବୋଲି କହିଛି ।
ଏହାର ପ୍ରତିକ୍ରିୟାରେ ରେଂଜର ଶ୍ରୀ ମିଶ୍ର କହିଛନ୍ତି ଯେ ଏନେଇ ତଦନ୍ତ ଜାରି ରହିଛି । କାଠ କେଉଁଠାରୁ ଆସୁଥିଲା, ତା’ର ମାଲିକ କିଏ ସେନେଇ ଜଣାପଡ଼ିବା ପରେ ପଦକ୍ଷେପ ନିଆଯିବ ।