ଘରେ ପଶି ଲକ୍ଷାଧିକ ଟଙ୍କା, ଅଳଙ୍କାର ଲୁଟିନେଲେ ଦୁର୍ବୃତ୍ତ
ଖୋର୍ଦ୍ଧା: ଦୀର୍ଘ ୬ ମାସ ପରେ ପୁଣି ଖୋର୍ଦ୍ଧା ଟାଉନ୍ ଥାନା ଅଧୀନରେ ଏକ ବଡ଼ଧରଣର ଚୋରି ଘଟିଛି । ଗତକାଲି ରାତିରେ ଠାକୁରପଡ଼ା ଗାଁରେ ଜଣଙ୍କ ଘରେ ପଶି ଦୁର୍ବୃତ୍ତମାନେ ଲକ୍ଷାଧିକ ଟଙ୍କା ନଗଦ ଓ ସୁନା-ରୁପା ଅଳଙ୍କାର ଲୁଟି ନେଇଛନ୍ତି । ଲୁଟ ହୋଇଥିବା ସମ୍ପତ୍ତିର ଆନୁମାନିକ ମୂଲ୍ୟ ୧୦ଲକ୍ଷ ଟଙ୍କା ହେବ ବୋଲି ଅଭିଯୋଗ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଠାକୁରପଡ଼ା ବାସିନ୍ଦା ପ୍ରକାଶ ସାହୁଙ୍କ ଘରେ ଗତକାଲି ବିଳମ୍ବିତ ରାତିରେ କେତେକ ଦୁର୍ବୃତ୍ତ ଘରର ଝରକା ଭାଙ୍ଗି ଭିତରେ ପଶିଥିଲେ । ଆଲମିରାରୁ ନଗଦ ଟଙ୍କା ଓ ସୁନା, ରୁପା ଆଦି ଅଳଙ୍କାର ନେଇ ଚାଲିଯାଇଥିଲେ । ସକାଳେ ଘର ମାଲିକ ଏହା ଜାଣିବା ପରେ ଟାଉନ ଥାନାରେ ଲିଖିତ ଅଭିଯୋଗ ଦେଇଥିଲେ । ଅଭିଯୋଗରେ ଲୁଟ ସମ୍ପତ୍ତିର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କାରୁ ଊର୍ଧ୍ବ ହେବ ବୋଲି ଘର ମାଲିକ ଦର୍ଶାଇଛନ୍ତି ।
ଅଭିଯୋଗ ପରେ ପୁଲିସ ତଦନ୍ତ ଅଧିକାରୀ ଅନୁଭା ଦାଶଙ୍କ ନେତୃତ୍ୱରେ ଏକ ଟିମ୍ ପହଂଚିଥିଲେ । ସାଇଂଟିଫିକ୍ ଟିମ୍ ଓ ଡଗ୍ ସ୍କ୍ୱାଡ୍ ସାହାଯ୍ୟରେ ଅନୁସନ୍ଧାନ କରାଯାଇଥିଲା । ଏନେଇ ତଦନ୍ତ ଅଧିକାରୀ ଶ୍ରୀମତି ଦାଶ କହିଛନ୍ତି ଯେ ଗରମ ହେତୁ ଘରର ସମସ୍ତ ସଦସ୍ୟ ଏସି ଥିବା ପ୍ରକୋଷ୍ଠରେ ଶୋଇଥିଲେ । ଦୁର୍ବୃତ୍ତମାନେ ଝରକା ଭାଙ୍ଗି ପଶି ଶୋଇଥିବା ରୁମର ବାହାର ପଟୁ କବାଟ ଦେଇ ଦେଇଥିଲେ । ଘର ମାଲିକଙ୍କ ଅଭିଯୋଗକ୍ରମେ ୨୧୪/୨୦୨୧ରେ ଏକ ମାମଲା ରୁଜୁ ହୋଇଛି । ତଦନ୍ତରୁ ପ୍ରାୟ ୧ ଲକ୍ଷ ଟଙ୍କାର ସମ୍ପତ୍ତି ଚୋରି ଯାଇଥିବା ଜଣାପଡ଼ିଛି । ସନ୍ଧାନୀ କୁକୁର କିଛି ସୂଚନା ଦେଇଛି, ସେଇ ତଥ୍ୟକୁ ଆଧାର କରି ଆଗକୁ ତଦନ୍ତ ଜାରି ରହିବ ।