ଖୋର୍ଦ୍ଧା: ଆଜି ଜଟଣୀ ପୁଲିସ ସୁନା ଚେନ୍ ଲୁଟେରା ଗ୍ୟାଙ୍ଗର ୩ଜଣ ସଦସ୍ୟଙ୍କ ସହ ସେମାନଙ୍କଠାରୁ ସୁନା କିଣିଥିବା ଜଣେ ସୁନା ବ୍ୟବସାୟୀଙ୍କୁ ଗିରଫ କରିଛି ।
ଜଟଣୀ ଥାନା ପକ୍ଷରୁ ମିଳିଥିବା ସୂଚନାନୁସାରେ, ଗତ ମାସ ୨୪ ତାରିଖରେ ଜଟଣୀ ଆନ୍ଧ୍ର ବ୍ୟାଙ୍କ ନିକଟରୁ ଫକିର ଚରଣ ନାୟକ, ତାଙ୍କ ପତ୍ନୀ ଓ ପୁଅ ମୋଟର ସାଇକଲରେ ଯାଉଥିବା ସମୟରେ ୨ଜଣ ଲୁଟେରା ପଲସର ମୋଟର ସାଇକେଲରେ ଆସି ଫକିରଙ୍କ ପତ୍ନୀଙ୍କ ବେକରୁ ସୁନା ଚେନଟିକୁ ଛଡ଼ାଇ ନେଇଯାଇଥିଲେ । ଏନେଇ ପୁଲିସ ୪୯୨/୨୦୨୧ରେ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଥିଲା । ଏହା ପୂର୍ବରୁ ଅନୁରୂପ ଏକ ଘଟଣାରେ ସୀତାରାମ ଛକ ନିକଟରୁ ଗୀତାଞ୍ଜଳି ସାହୁଙ୍କଠାରୁ ମଧ୍ୟ ୨ଜଣ ଲୁଟେରା ପଲସର ମୋଟର ସାଇକଲରେ ଆସି ସୁନା ଚେନ୍ ଲୁଟିନେଇଥିଲେ । ଏନେଇ ପୁଲିସ ୪୭୮/୨୦୨୧ରେ ଏକ ମାମଲା ରୁଜୁ କରିଥିଲା । ଦୁଇଟି ଘଟଣାର ତଦନ୍ତ ବେଳେ ଏଥିରେ ସମ୍ପୃକ୍ତ ଥିବା ଲୁଟେରାଙ୍କ ସମ୍ପର୍କରେ ଜଣାପଡ଼ିଥିଲା ।
Sambad is now on WhatsApp
Join and get latest news updates delivered to you via WhatsApp
ଆଜି ଏହି ଦୁଇଟି ମାମଲାରେ ପୁଲିସ ଗଡ଼ଖୋର୍ଦ୍ଧାର ଚନ୍ଦନ ନାୟକ ଓରଫ ବାଳୁଆ (୨୬), ଭଗବାନ ନାୟକ ଓରଫ ଟିକିଆ (୨୪) ଓ ମହାବୀର ମାଲ୍ଲା (୨୬)ଙ୍କୁ ଗିରଫ କରିଥିଲା । ପଚରାଉଚୁରାରେ ସେମାନେ ଲୁଟିଥିବା ସୁନା ଚେନ୍ଗୁଡ଼ିକୁ ସୁଦାମ ସାହୁ ନାମକ ଏକ ସୁନାବେପାରୀକୁ ବିକ୍ରି କରିଥିବା କହିଥିଲେ । ପରେ ପୁଲିସ ସୁଦାମ ସାହୁଙ୍କୁ ଗିରଫ କରି ସମ୍ପୃକ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ।