ଭବାନୀପାଟଣା: ୨୦୦୮ ମସିହାରୁ ଭବାନୀପାଟଣାରୁ ନିୟମିତ ପ୍ରକାଶ ପାଉଥିବା ସାହିତ୍ୟ ପତ୍ରିକା ‘କଳାହାଣ୍ଡି କବିତା ଆନ୍ଦୋଳନର ଏକ ଶାଶ୍ୱତ ସ୍ପନ୍ଦନ ମହୁରି’ ଚଳିତ ବର୍ଷ ଶାରଦୀୟ ପତ୍ରିକାମାନଙ୍କ ମଧ୍ୟରେ ରାଜ୍ୟରେ ଏକ ନମ୍ବର ପତ୍ରିକାର ମାନ୍ୟତା ପାଇଛି । ଗଞ୍ଜାମର କବିତାଘର ଲିଟେରାରୀ ଟ୍ରଷ୍ଟ ତରଫରୁ ବ୍ରହ୍ମପୁରଠାରେ ଆୟୋଜିତ ଏକ ବର୍ଣ୍ଣାଢ଼୍ୟ ଉତ୍ସବରେ ସାହିତ୍ୟ ପତ୍ରିକା ସଂପାଦନା କ୍ଷେତ୍ରରେ ଉତ୍କର୍ଷତା ପାଇଁ ‘ମହୁରି’ର ସଂପାଦକ ସୁକାନ୍ତ ସାହୁଙ୍କୁ ଶ୍ରେଷ୍ଠ ସଂପାଦକ ସମ୍ମାନ ପ୍ରଦାନ କରାଯାଇଛି । ପୁରସ୍କାର ବାବଦକୁ ପାଂଚ ହଜାର ଟଙ୍କାର ଅର୍ଥରାଶି ସହ ଏକ ଫଳକ ପ୍ରଦାନ କରାଯାଇଛି । ଏହି ସମ୍ମାନ ପ୍ରଦାନ ଅବସରରେ ମଂଚାସୀନ ଅତିଥିମାନେ ‘ମହୁରି’ ଓଡ଼ିଆ ପତ୍ରିକା ଜଗତରେ ସବୁଠୁ ଭଲ ଓ ସୁସଂପାଦିତ ପତ୍ରିକା ବୋଲି ମତ ରଖିଥିଲେ ।
Sambad is now on WhatsApp
Join and get latest news updates delivered to you via WhatsApp
‘ମହୁରି’ରେ ସାହିତ୍ୟର ସମସ୍ତ ବିଭାଗ ସ୍ଥାନ ପାଇବା ସହ ଏଥିରେ ଓଡ଼ିଶାରେ ପ୍ରାୟ ସମସ୍ତ ସୁଲେଖକଙ୍କ ଲେଖା ସ୍ଥାନିତ ହୋଇଥାଏ । କେବଳ ଏକ ନିର୍ଦ୍ଧିଷ୍ଟ ଅଞ୍ଚଳକୁ ଏହା ଗୁରୁତ୍ୱ ନଦେଇ ସମସ୍ତ ଓଡ଼ିଆ ଲେଖକଙ୍କ ବଛାବଛା ଲେଖାକୁ ସ୍ଥାନିତ କରିଥାଏ । ତ୍ରୁଟିରହିତ ମୁଦ୍ରଣ ସାଙ୍ଗକୁ ସଫାସୁତରା ପରିପାଟୀ ମହୁରିକୁ ଅନନ୍ୟ କରି ଗଢ଼ି ତୋଳିଛି । ଏଥିନିମନ୍ତେ ଚଳିତ ବର୍ଷ ମହୁରିକୁ ଶ୍ରେଷ୍ଠ ପତ୍ରିକା ଓ ମହୁରିର ସଂପାଦକ ସୁକାନ୍ତ ସାହୁଙ୍କ ଶ୍ରେଷ୍ଠ ସଂପାଦକ ସମ୍ମାନ ପ୍ରଦାନ କରାଯାଇଥିଲା । ଗତ ୨୦୦୮ ମସିହାରୁ କଳାହାଣ୍ଡିରୁ ମହୁରି ନିରବଚ୍ଛିନ୍ନ ଭାବରେ ପ୍ରକାଶ ପାଇ ଆସୁଛି । ମହୁରିର ମୁଖ୍ୟ ସଂପାଦକ ଭାବେ କବି ଭବାନୀଶଙ୍କର ନିଆଲ ଓ ସଂପାଦକ ଭାବେ ଗାଳ୍ପିକ, ଔପନ୍ୟାସିକ, ଅନୁବାଦକ ସୁକାନ୍ତ ସାହୁ ଅଛନ୍ତି । ସହ ସଂପାଦକ ଭାବେ ସକିତ ରତେ, ସୁଧୀର କୁମାର ଧଙ୍ଗଡ଼ାମାଝୀ, ବିରଂଚି ନାରାୟଣ ମୁଣ୍ଡ, ସୁଶୀଲ କୁମାର ବାଗ, ଡିଲେଶ୍ୱର ରଣା କାର୍ଯ୍ୟ କରୁଛନ୍ତି। ପ୍ରକାଶ ଥାଉକି, ଗାଳ୍ପିକ ସୁକାନ୍ତ ସାହୁଙ୍କର ସଂପାଦନା କ୍ଷେତ୍ରରେ ସୁଦୀର୍ଘ ୩୦ ବର୍ଷର ଅଭିଜ୍ଞତା ରହିଛି । ସେ ପ୍ରଥମରୁ ‘ନିର୍ମାତା’, ‘ନୀଳପତ୍ର’ର ସଂପାଦନା ସହ ଜଡ଼ିତ ଥିଲେ ।
ପରବର୍ତ୍ତୀ ସମୟରେ ‘ମହୁରି’, ‘ସମୟର ଆକାଂକ୍ଷା’ ଓ ‘ସାହିତ୍ୟ କଥା’ର ସଂପାଦନା କରୁଛନ୍ତି । ଜଣେ ସୁଲେଖକ ଓ ସଂଗଠକ ଭାବେ ସେ ଯଥେଷ୍ଟ ଖ୍ୟାତି ଅର୍ଜନ କରିଛନ୍ତି । ‘ମହୁରି’ର ଏହି ସଫଳତା ପାଇଁ କଳାହାଣ୍ଡି ଯୁବ ଲେଖକ ସମାବେଶ, କଳାହାଣ୍ଡି ଥିଏଟର, ଦେବଗିରି ସାଂସ୍କୃତିକ ଅନୁଷ୍ଠାନ ତଥା ଜିଲ୍ଲାର ଅନ୍ୟ ଅନୁଷ୍ଠାନମାନେ ଅଭିନନ୍ଦନ ଜଣାଇବା ସହ ସମଗ୍ର ଜିଲ୍ଲାରେ ଖୁସିର ଲହରି ଖେଳିଯାଇଛି ।