ମାଲକାନଗିରି : ମାଓ ହିଂସା ବିରୋଧରେ ରାସ୍ତାକୁ ଓହ୍ଲାଇଲେ ସ୍ବାଭିମାନ ଅଞ୍ଚଳବାସୀ
ପୁଲିସକୁ ସୂଚନା ନ ଦେବାକୁ ଅଞ୍ଚଳବାସୀଙ୍କୁ ମାଓବାଦୀଙ୍କ ଚେତାବନୀ
ମାଲକାନଗିରି : ମାଲକାନଗିରି ଜିଲ୍ଲାର ସ୍ୱାଭିମାନ ଅଞ୍ଚଳରେ ପୁଣି ମାଓ ବିରୋଧୀ ସ୍ବର ଉଠିଛି । ଏଥର ଗୋଟିଏ କି ଦୁଇଟି ନୁହେଁ ୧୦ ରୁ ଅଧିକ ଗ୍ରାମର ଲୋକମାନେ ମିଳିତ ହୋଇ ମାଓବାଦୀଙ୍କୁ ବିରୋଧ କରିଛନ୍ତି । ଆଜି ମାଲକାନଗିରି ଜିଲ୍ଲାର ସ୍ୱାଭିମାନ ଅଞ୍ଚଳରେ ଥିବା ଖଜୁରୀଗୁଡା ଠାରେ ମାଓବାଦୀଙ୍କୁ ବିରୋଧ କରି ହଜାର ହଜାର ଲୋକେ ଏକତ୍ରିତ ହୋଇଥିଲେ । ମାଓବାଦୀ ମାନେ ୨୦ ତାରିଖ ରାତିରେ ଉକ୍ତ ଗ୍ରାମର ଦାସ ଖେମୁଡୁକୁ ପୋଲିସ ଇନଫର୍ମର କହି ଗୁଳି କରି ହତ୍ୟା କରିବା ପରେ ସମଗ୍ର ଅଞ୍ଚଳରେ ମାଓବାଦୀଙ୍କ ବିରୋଧରେ ସ୍ୱର ଉଠିଛି । ମାଓବାଦୀ ଙ୍କୁ ନିଜ ଅଞ୍ଚଳରେ ପୁରାଇ ଦେବୁ ନାହିଁ ବୋଲି ଶପଥ ନେଲେ ସ୍ୱାଭିମାନ ଅଞ୍ଚଳବାସୀ । ଆଉ ଏହାପରେ ସ୍ବାଭିମାନ ଅଞ୍ଚଳର ବିଭିନ୍ନ ସ୍ଥାନରେ ଗତକାଲି ମାଓ ବିରୋଧୀ ପୋଷ୍ଟର ଲଗାଯାଇଥିବା ବେଳେ ଆଜି ମାଓ ବିରୋଧୀ ମେଳି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଏହି ମେଳିରେ ଲୋକମାନେ ‘ଆମକୁ ଶାନ୍ତି ଦରକାର, ହିଂସା ନୁହେଁ’, ‘ନିରୀହ ଜନତା କୁ ମାରିବା ବନ୍ଦ କରାଯାଉ’, ‘ମୃତ ଦାସ ଖେମୁଡୁ ଏବଂ ଅନ୍ୟ ମାନଙ୍କୁ ନ୍ୟାୟ ମିଳୁ’ ଆଦି ଅନେକ ମାଓ ବିରୋଧୀ ସ୍ଲୋଗାନ ଦେଇଥିଲେ ।
ଅନ୍ୟପକ୍ଷରେ ଆଜି ମାଓବାଦୀମାନେ ତିନି ପୃଷ୍ଠାର ଚିଠି ଜାରି କରି ପୁଲିସ ସହ ସମ୍ପର୍କ ନରଖିବାକୁ ଗ୍ରାମବାସୀମାନଙ୍କୁ ସତର୍କ କରିଦେଇଛନ୍ତି । ଏହି ଚିଠି ଗୁମା ଏରିଆ କମିଟିର ସେକ୍ରେଟାରି ମାଓନେତା ଅନୀଲ ଜାରି କରିଛନ୍ତି । ଚିଠିରେ ମାଓବାଦୀ ଉଲ୍ଲେଖ କରିଛନ୍ତି ଯେ ଖଜୁରୀଗୁଡାର ଦାସ ଖେମୁଡୁ ପୋଲିସର ଇନଫର୍ମର ଭାବେ କାମ କରୁଥିବାରୁ ପୋଲିସକୁ ସାହାଯ୍ୟ ନ କରିବା ନିମନ୍ତେ ବୁଝାଶୁଝା କରା ଯାଇଥିଲା କିନ୍ତୁ ନ ମାନିବାରୁ ତାକୁ ହତ୍ୟା କରାଗଲା । ସିନ୍ଧିବାଡି, ଦାରଲାବେଡ଼, ଜନ୍ତୁରାଇ, ଯୋଡ଼ାଆମ୍ବ ଗ୍ରାମବାସୀଙ୍କୁ ଏହି ପତ୍ରରେ ବିରୋଧ କରାଯିବା ସହ ଅନ୍ୟ ଗ୍ରାମର ଲୋକମାନେ ଏହି ଚାରି ଗ୍ରାମବାସୀଙ୍କ ସହିତ ସଂପର୍କ ନରଖିବା ପାଇଁ ବାରଣ କରିଛନ୍ତି । ପୋଲିସକୁ ସହାୟତା ନକରିବା ପାଇଁ ପଣସପୁଟ ପଞ୍ଚାୟତର ଅନ୍ୟ ଗ୍ରାମବାସୀଙ୍କୁ ଏହି ପତ୍ରରେ ସତର୍କ କରାଇଦିଆଯାଇଛି । ଯଦି ଗ୍ରାମବାସୀ ପୋଲିସ ସହାୟତା ଯୋଗାଇବେ ତେବେ ସେମାନଙ୍କୁ ଦାସ ଖେମୁଡୁ ଭଳି ମୃତ୍ୟୁଦଣ୍ଡ ଦିଆଯିବ ବୋଲି କଡା ଚେତାବନୀ ଦିଆଯାଇଛି ।