ଦୋକାନ ଯାଇଥିଲେ, ଫେରିବା ବେଳେ ଧକ୍କା ଦେଲା ହାଇୱା

ଦେବଗଡ଼: ହାଇୱା ଧକ୍କାରେ ଦେବଗଡ ଥାନା ଅନ୍ତର୍ଗତ ବଳମ ଗ୍ରାମର କୃଷ୍ଣଚନ୍ଦ୍ର କାଲୋଙ୍କ ବୁଧବାର ସନ୍ଧ୍ୟାରେ ମୃତ୍ୟୁ ହୋଇଯାଇଛି। କୃଷ୍ଣଚନ୍ଦ୍ର ନିକଟସ୍ଥ ଦୋକାନରୁ ରାସନ ସାମଗ୍ରୀ ନେଇ ଘରକୁ ଚାଲି ଚାଲି ଆସୁଥିବାବେଳେ ବଳମ ଗ୍ରାମ ନିକଟରେ ଏକ ହାଇୱା ତାଙ୍କୁ ଧକ୍କା ଦେଇ ଫେରାର ହୋଇଯାଇଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଛି। ଖବରପାଇ ଦେବଗଡ ଥାନା ପୁଲିସ ଶବ ଜବତ କରିବା ସହିତ ଘଟଣାର ତଦନ୍ତ ଆରମ୍ଭ କରିଛି। କୃଷ୍ଣଚନ୍ଦ୍ରଙ୍କ ମୃତ୍ୟୁ ପରେ ଉତ୍ତ୍ୟକ୍ତ ଲୋକମାନେ ପରିବାର ଲୋକଙ୍କୁ କ୍ଷତିପୂରଣ ପ୍ରଦାନ କରିବା ଦାବିରେ ୪୯ନଂ ଜାତୀୟରାଜପଥ ଅବରୋଧ କରିଥିଲେ। ଖବରପାଇ ପୁଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକମାନଙ୍କୁ ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା।