ଭବାନୀପାଟଣା : କଳାହାଣ୍ଡି ଜିଲ୍ଲାରେ କୋହଲା ଓ ଝିପି ଝିପି ବର୍ଷାରେ ମଣ୍ଡିକୁ ଧାନ ଆଣିଥିବା ଚାଷୀମାନେ ବେହାଲ ହୋଇପଡିଛନ୍ତି । ବହୁ ମଣ୍ଡି ମାନଙ୍କରେ ଆନୁଷଙ୍ଗିକ ବ୍ୟବସ୍ଥା ଓ ଛାଉଣୀ ନ ଥିବା ଯୋଗୁଁ ଚାଷୀମାନେ ଏବେ ଅଡୁଆରେ ପଡିଛନ୍ତି । ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାରେ ପ୍ରଥମ ପର୍ଯ୍ୟାୟରେ ୧୯ ଲକ୍ଷ ୭୫ ହଜାର ୩୦୦ କୁଇଣ୍ଟାଲ ଟାର୍ଗେଟ ପ୍ରଦାନ କରାଯାଇଛି । ୨୧୦ ଟି ଧାନକ୍ରୟ କେନ୍ଦ୍ର କରାଯାଇଥିବା ବେଳେ ରିପୋର୍ଟ ଲେଖାହେଲା ପର୍ଯ୍ୟନ୍ତ ୩୪ ଟି ମଣ୍ଡି ଖୋଲିଥିବା ବେଳେ ୨୭ ଟି ମିଲର୍ସ ଧାନକ୍ରୟରେ ସାମିଲ ହୋଇଛନ୍ତି । ଗତ ତିନି ଦିନ ଧରି କୋହଲା ଓ ଝିପି ଝିପି ପାଗ ଥିବା ଯୋଗୁଁ ଚାଷୀମାନେ ଅଡୁଆ ରେ ପଡିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଯେଉଁ ଚାଷୀ ମାନଙ୍କ ଟୋକନ ଆସିଛି ସେମାନଙ୍କ ବିକ୍ରି ତାରିଖ ଡିସେମ୍ବର ମାସରେ ଥିବା ବେଳେ ବର୍ତ୍ତମାନ ଧାନ ଅମଳ ହୋଇନଥିବା ଚାଷୀଙ୍କୁ ଟୋକନ ମିଳି ନଥିବା ଯୋଗୁଁ ବହୁ ମଣ୍ଡିରେ ଅଚଳାବସ୍ଥା ଦେଖା ଦେଇଛି । ଗୋଲାମୁଣ୍ଡା ବ୍ଲକର ଶୋଷିଆ, ବେହେରାଗୁଡା, ହଳଦୀ, ଆମ୍ବଗୁଡା, ପଞ୍ଜିଆ ଓ ଘୋଟିଆ ଗ୍ରାମର ଚାଷୀ ମାନଙ୍କ ପାଇଁ ଘଟିଆ ଠାରେ ମଣ୍ଡି ଖୋଲା ଯାଇଛି । ଏହି ଚାଷୀମାନେ ମଣ୍ଡିକୁ ଧାନ ଆଣି ଜଗି ରହିଛନ୍ତି । ସେମାନଙ୍କ ଧାନ ବିକ୍ରି ପାଇଁ ଡିସେମ୍ବର ୧୨ , ଡିସେମ୍ବର ୧୫ ଓ ଅନ୍ୟ ତାରିଖ ଥିବା ବେଳେ ବର୍ତ୍ତମାନ କୋହଲା ଓ ଝିପି ଝିପି ବର୍ଷାରେ ଖୋଲା ଆକାଶ ତଳେ ପଡିରହିଛନ୍ତି ।
ବହୁ ଚାଷୀଙ୍କ ଧାନ ଅମଳ ହୋଇନଥିବା ବେଳେ ସେମାନଙ୍କ ଟୋକନ ଆସିନଥିବା ଯୋଗୁଁ ମଣ୍ଡିରେ ବିକ୍ରି କରିପାରୁନାହାନ୍ତି । ମଣ୍ଡିକୁ ଆସୁଥିବା ଧାନ ଗୁଡିକୁ ଅଗ୍ରାଧିକାର ଭିତ୍ତିରେ କ୍ରୟ କରାଯାଉନଥିବା ଯୋଗୁଁ ଚାଷୀମାନେ ଭାଗ୍ୟକୁ ଆଦରି ପଡ଼ି ରହିଛନ୍ତି । ଝିପି ଝିପି ବର୍ଷା ଯୋଗୁଁ ଧାନରେ ଆଦ୍ରତା ଦେଖା ଦେଇଥିବା ଯୋଗୁଁ ଚାଷୀଙ୍କ ପାଇଁ ଚିନ୍ତାରକାରଣ ପାଲଟିଛି । ନିୟନ୍ତ୍ରିତ ବଜାର କିମିଟି ପକ୍ଷରୁ ଧାନରୁ ଟିକସ ଆଦାୟ କରୁଥିବା ବେଳେ ମଣ୍ଡି ଗୁଡିକର ଭିତ୍ତିଭୂମି ନିର୍ମାଣ ପାଇଁ ଆବଶ୍ୟକ ପଦକ୍ଷେପ ନେଉନଥିବା ଯୋଗୁଁ ବହୁ ମଣ୍ଡିରେ ଚାଷୀମାନେ ଖୋଲା ଆକାଶ ତଳେ ଧାନକୁ ଧରି ଜଗି ରହୁଛନ୍ତି ।
ଧାନର ଆଦ୍ରତା ଯୋଗୁଁ ମଣ୍ଡି ମାନଙ୍କରେ ୭ କେଜି ରୁ ଅଧିକ କଟନୀ ଛଟନୀ ହେଉଛି । ଚାଷୀ ମାନଙ୍କୁ କଟନୀ ଛଟନୀ ପାଇଁ ମୁଲଚାଲ ହେଉଥିବା ଯୋଗୁଁ କ୍ଷୋଭ ପ୍ରକାଶ ପାଇଛି । ଗୋଟିଏ ପଟେ ଚାଷୀଙ୍କ ଧାନ ଅଣ୍ଡର ରେଟ ରେ କିଣା ଯାଇ ଛତିଶଗଡ଼ ଚାଲାଣ ହେଉଥିବା ବେଳେ ସ୍ଥାନୀୟ ଚାଷୀଙ୍କୁ ମଣ୍ଡିରେ ହଇରାଣ ହେବାକୁ ପଡୁଛି । ମଣ୍ଡିରେ ଦିନ ଦିନ ଧରି ପଡି ରହିବା ଯୋଗୁଁ ଚାଷୀମାନେ କମ ରେଟ ରେ ଦଲାଲ କୁ ଟେକି ଦେବାକୁ ବାଧ୍ୟ ହେଉଛନ୍ତି । ଏଭଳି ଅବସ୍ଥା ଜିଲ୍ଲାର ସମସ୍ତ ମଣ୍ଡିରେ ଦେଖିବାକୁ ମିଳୁଛି । ବହୁ ସ୍ଥାନରେ ମଣ୍ଡି ଆରମ୍ଭ ହୋଇନଥିବା ବେଳେ ଯେଉଁଠ ମଣ୍ଡି ଆରମ୍ଭ ହୋଇଛି ଚାଷୀ ଶୋଷଣର ଶିକାର ହେଉଛନ୍ତି । ତୁରନ୍ତ ରାଜ୍ୟ ସରକାର ଏଥିରେ ହସ୍ତକ୍ଷେପ କରିବାକୁ ସାଧାରଣରେ ଦାବୀ ହୋଇଛି ।