ଖୋର୍ଦ୍ଧା: ମାଙ୍କଡ଼ା ପଥର ଓ ମୋରମ ଆଦି ଲଘୁ ଖଣିଜ ଦ୍ରବ୍ୟର ବେଆଇନ ଚାଲାଣ ନେଇ ଖୋର୍ଦ୍ଧା ଗ୍ରାମାଂଚଳ ଚର୍ଚ୍ଚାରେ ରହିଛି । ଏବେ ମଳିପଡ଼ା ନିକଟ ଲହଙ୍ଗାଠାରେ ଥିବା କାଜୁ ନିଗମର ଜମି ନିକଟରେ ମାଙ୍କଡ଼ା ପଥର ଖଣି ଖନନର ନିଲାମ ନେଇ କାଜୁ ନିଗମ ଓ ରାଜସ୍ୱ ବିଭାଗର ବିବାଦ ଘଟଣାକୁ ଭିନ୍ନ ମୋଡ଼ ଦେଇଛି । ଗୋଟିଏ ପଟେ ଗ୍ରାମାଂଚଳରେ ଥିବା ଶତାଧିକ ଏକର କାଜୁ ଜଙ୍ଗଲରେ ବେଆଇନ ଖଣି ଖୋଳାଯାଉଥିବା ଓ ଅଭିଯୋଗ ପରେ ମଧ୍ୟ ରାଜସ୍ୱ ବିଭାଗ କିମ୍ବା ପୁଲିସ ପଦକ୍ଷେପ ନେଉନଥିବା କାଜୁ ନିଗମ ଅଭିଯୋଗ କରିଛି, ଆରପଟେ ମାଙ୍କଡ଼ା ପଥର ଖନନର ଅନୁମତି ସଂପୂର୍ଣ୍ଣ ଆଇନଗତ ବୋଲି ରାଜସ୍ୱ ବିଭାଗ ସଫେଇ ଦେଇଛି । ତେବେ ଘଟଣା ଯାହା ହେଉନା କାହିଁକି ଉଭୟ ବିଭାଗର ବିବାଦ ଖଣି ମାଫିଆଙ୍କୁ ସୁହାଉଥିବା ବେଳେ ଏହାଦ୍ୱାରା ଶତାଧିକ ଏକର ଜଙ୍ଗଲ ଓ ରାଜସ୍ୱ ହାନୀ ହେଉଛି ।
Sambad is now on WhatsApp
Join and get latest news updates delivered to you via WhatsApp
୨୦୧୯ରେ ଖୋର୍ଦ୍ଧା ଜିଲ୍ଲାରେ ବେଆଇନ ଲଘୁ ଖଣିଜ ଦ୍ରବ୍ୟ ଚାଲାଣକାରୀଙ୍କ ବିରୋଧରେ ରାଜ୍ୟର ସ୍ୱତନ୍ତ୍ର ଟାସ୍କ ଫୋର୍ସ (ଏସ୍ଟିଏଫ୍) ଲଗାତାର ଚଢ଼ଉ କରିଥିଲା । ଖଣି ମାଫିଆଙ୍କ ମଧ୍ୟରୁ କେତେକଙ୍କୁ ଗିରଫ କରିବା ସହ ଏନ୍କାଉଂଟରରେ ମଧ୍ୟ ଥୋକାଏ ଆହତ ହୋଇଥିଲେ । କେବଳ ଏହାନୁହେଁ ଖଣି ମାଫିଆଙ୍କୁ ସହାୟତା କରୁଥିବା ଅଭିଯୋଗରେ ସଦର ଥାନାର ଜଣେ ପୁଲିସ୍ କନ୍ଷ୍ଟେବଲ୍ ଗିରଫ ହୋଇଥିବା ବେଳେ ତତ୍କାଳୀନ ସଦର ଥାନା ଅଧିକାରୀ ବିକ୍ରମ କେଶରୀ ଜେନା ଓ ତତ୍କାଳୀନ ତହସିଲଦାର ଶୁଭେନ୍ଦୁ ସାମଲଙ୍କୁ ଏସ୍ଟିଏଫ୍ ଏକାଧିକ ଥର ଜେରା କରିଥିଲା । ଘଟଣା ପରେ ସଦର ଥାନା ଆଇଆଇସି ଶ୍ରୀ ଜେନା ଫେରାର୍ ହୋଇଯାଇଥିଲେ ଓ ତାଙ୍କୁ ଦିଆଯାଉଥିବା ପୁଲିସ ପଦକ ଫେରାଇ ନେବା ସହ କାର୍ଯ୍ୟରୁ ନିଲମ୍ବନ କରାଯାଇଥିଲା । ଏହି ଘଟଣାପରେ ହଠାତ୍ ବେଆଇନ ଖଣି ଉପରେ ଏସ୍ଟିଏଫ୍ର ଚଢ଼ଉ ବନ୍ଦ ହୋଇଯାଇଥିଲା ।
ବର୍ତମାନ ପୁଣିଥରେ ତତ୍କାଳୀନ ତହସିଲଦାର ଶ୍ରୀ ସାମଲ ମଳିପଡ଼ା-ଲହଙ୍ଗା ଠାରେ ନିଲାମ ପାଇଁ ଅନୁମତି ଦେଇଥିବା ଏକ ମାଙ୍କଡ଼ା ପଥର ଖଣିକୁ ନେଇ ରାଜସ୍ୱ ବିଭାଗ ଓ କାଜୁ ନିଗମ ମଧ୍ୟରେ ବିବାଦ ଘନେଇବାରେ ଲାଗିଛି । ଏହି ଘଟଣାରେ ରାଜସ୍ୱ ବିଭାଗର ଚଚଂକତା କରୁଛି ଓ ଖଣି ମାଫିଆଙ୍କୁ ରାଜସ୍ୱ ବିଭାଗ ସହାୟତା କରୁଛି ବୋଲି କାଜୁ ନିଗମ ଅଧ୍ୟକ୍ଷ ଅମରେନ୍ଦ୍ର ଦାସ ଅଭିଯୋଗ କରି ହାଇକୋର୍ଟର ଦ୍ୱାରସ୍ଥ ହେବି ବୋଲି କହିଛନ୍ତି ।
ନିକଟରେ ମଳିପଡ଼ା ନିକଟସ୍ଥ ଲହଙ୍ଗା ଠାରେ ବଗାୟତ କିସମର ୩୧ଏକର ଜଙ୍ଗଲ ଥିଲା । ଏହା ମଧ୍ୟରୁ ୨୧ ଏକର ଜମି ମୃତ୍ତିକା ସଂରକ୍ଷଣ ବିଭାଗ ୧୯୯୫ରେ କାଜୁ ନିଗମକୁ ହସ୍ତାନ୍ତର କରିଥିଲା । ଏହାପରେ କାଜୁ ନିଗମ ସେଠାରେ କାଜୁ ବୃକ୍ଷରୋପଣ କରିଥିଲା । ଏହାପରେ ନିୟମିତ ଭାବେ ସେହି ଜଙ୍ଗଲକୁ ନିଲାମ ଡକାଯାଉଥିଲା । କିନ୍ତୁ ୨୦୧୪-୧୫ରେ ସେଠାରେ ଥିବା କାଜୁ ନିଗମର ଜଙ୍ଗଲ ନିକଟସ୍ଥ ଅଂଚଳ ଖଣି ମାଫିଆଙ୍କ ନଜରରେ ପଡ଼ିଥିଲା । ବର୍ତମାନ କାଜୁ ଜଙ୍ଗଲ ସନ୍ନିକଟ ପ୍ରାୟ ୧୫ ଏକର ଅଂଚଳରେ ବେଆଇନ ଖଣି ଖନନ ଚାଲିଛି । ଏହି ସମୟରେ, ଜିଲ୍ଲା ପ୍ରଶାସନ ସେଠାରେ ୨ ଏକର ଜମି ମାଙ୍କଡ଼ା ପଥର ଖନନ ପାଇଁ ନିଲାମ ଆହ୍ୱାନ କରିଥିଲା । ତତ୍କାଳୀନ ତହସିଲଦାର ଶୁଭେନ୍ଦୁ ସାମଲଙ୍କ ରିପୋର୍ଟ ଭିତ୍ତିରେ ସେଠାରେ କୌଣସି କାଜୁ ଜଙ୍ଗଲ ନଥିବା ଦର୍ଶାଯାଇଥିଲା । ଏହି ରିପୋର୍ଟ ଭିିତ୍ତିରେ ଜିଲ୍ଲାପାଳ ଓଡ଼ିଶା ମାଇନିଂ ରୁଲ୍ ଅନୁସାରେ ଅନୁମତି ଦେଇଥିଲେ । ପରିବେଶ (ଏନ୍ଭିରୋନ୍ମେଂଟ୍) ଓ ପରିବେଶ ପ୍ରଦୂଷଣ (ପଲ୍ୟୁସନ୍ କଂଟ୍ରୋଲ୍ ବୋର୍ଡ) ପକ୍ଷରୁ ଏନ୍ଓସି ଦିଆଯାଇଛି । ବର୍ତମାନ ସେଠାରେ ଖଣି ଖୋଳା ଆରମ୍ଭ ହେବା ବେଳେ କାଜୁ ନିଗମ ଏହି ଅଂଚଳ ନିଜର ବୋଲି ଦାବି କରିବା ସହ କାଜୁ ନିଗମର ବିନାଅନୁମତିରେ ଏଭଳି ଖନନ ଅନୁମତି ଦେବା ବେଆଇନ ବୋଲି ଦର୍ଶାଇଛି । ଏନେଇ କାଜୁ ନିଗମ ପକ୍ଷରୁ ଅଭିଯୋଗ ହେବା ପରେ ଜିଲ୍ଲାପାଳଙ୍କ ଅନୁମତିକ୍ରମେ ସେଠାରେ ଦୁଇ ଦୁଇ ଥର ସର୍ଭେ ଓ ଜିଓ ଟାଗିଂ ମଧ୍ୟ କରାଯାଇଛି ।
ଘଟଣା ସମ୍ପର୍କରେ ତହସିଲଦାର ପଦ୍ମଚରଣ ସାହୁ କହିଛନ୍ତି, ସେହି ଜଙ୍ଗଲର କିସନ ବଗାୟତ । ଏକାଧିକ ଥର ସର୍ଭେ କରିବା ପରେ ସେହି ଅଂଚଳ ରାଜସ୍ୱ ବିଭାଗର ବୋଲି ଜଣାପଡ଼ିଛି । କାଜୁ ନିଗମ ସେହି ଜମି ନିଜର ବୋଲି କୌଣସି ସଠିକ୍ ରେକର୍ଡ ଦେଖାଇପାରିନାହିଁ । ସେଠାରେ ଖଣି ଖୋଳିବା ପାଇଁ ଯେଉଁ ଅନୁମତି ପ୍ରଦାନ କରାଯାଇଛି ତାହା ଆଇନ ସମ୍ମତ । ଯଦି ଏଥିରେ କିଛି ପ୍ରତିବାଦ ଅଛି ତେବେ କାଜୁ ନିଗମ ନ୍ୟାୟାଳୟର ଦ୍ୱାରସ୍ଥ ହୋଇପାରନ୍ତି ।