ନୂଆପଡ଼ା ଜିଲ୍ଲାରେ ମାଓ ପୋଷ୍ଟର, ବାଘ ଅଭୟାରଣ୍ୟକୁ ବିରୋଧ

ନୂଆପଡ଼ା: ବହୁ ଦିନର ବ୍ୟବଧାନ ପରେ ନୂଆପଡ଼ା ଜିଲ୍ଳାରେ ପୁଣି ଥରେ ମାଓବାଦୀମାନେ ନିଜର ଉପସ୍ଥିତ ଜାହିର କରିଛନ୍ତି। ଜିଲ୍ଲାର ଧରମବନ୍ଧା ଥାନା ଅଞ୍ଚଳରେ ଶୁକ୍ରବାର ମାଓବାଦୀଙ୍କ ପୋଷ୍ଟର ଦେଖିବାକୁ ମିଲିଛି। ଏହି ପୋଷ୍ଟରରେ ମେନପୁର ଓ ନୂଆପଡ଼ା ଡିବିଜନ କମିଟି ‘ଭାରତ କି କମ୍ୟୁନିଷ୍ଟ ପାର୍ଟି’ ବୋଲି ଉଲ୍ଲେଖ ରହିଛି।

ନୂଆପଡ଼ା ଜିଲ୍ଲା ସୁନାବେଡ଼ା ଅଭୟାରଣ୍ୟ ହେବାକୁ ଥିବା ବାଘ ଅଭୟାରଣ୍ୟକୁ ବିରୋଧ କରିବା ସହ ଜଳ, ଜଙ୍ଗଲ ଓ ଜମି ଉପରେ ଜନତାଙ୍କ ଅଧିକାର ରହୁ। ସୁନାବେଡ଼ା ଅଭୟାରଣ୍ୟରେ ଥିବା ପୁଲିସ କ୍ୟାମ୍ପ ହଟାଯାଉ, ଲୋକମାନେ ବିସ୍ଥାପନକୁ ବିରୋଧ କରନ୍ତୁ। ଅଭୟାରଣ୍ୟ ନାମରେ ଖଣିଜ ସଂମ୍ପଦ ଲୁଣ୍ଠନ ବିରୋଧରେ ଆନ୍ଦୋଳନକୁ ତୀବ୍ର କରାଯାଉ। ସେହିପରି ଲୋକେ ବିଧାନସଭା ଓ ଲୋକସଭା ନିର୍ବାଚନକୁ ବିରୋଧ କରନ୍ତୁ ବୋଲି ପୋଷ୍ଟରରେ ଉଲ୍ଲେଖ ରହିଛି।

ଏହି ପୋଷ୍ଟର ଧରମବନ୍ଧା ଓ ପଣ୍ଡରିପାଣି ଗ୍ରାମ ମଝି ରାସ୍ତାରେ ପଡିିଥିବା ଦେଖିବାକୁ ମିଲିଥିଲା। ଧରମବନ୍ଧା ପୁଲିସ ଏହି ପୋଷ୍ଟରକୁ ଜବତ କରିଛି। ଧରମବନ୍ଧା ଅଞ୍ଚଳରେ ବହୁଦିନ ପରେ ମାଓବାଦୀଙ୍କ ପୋଷ୍ଟର ଦେଖିବାକୁ ମିଲିଛି। ପୋଷ୍ଟରରୁ ଅନୁମାନ କରାଯାଉଛି ଯେ, ପୁଣିଥରେ ମାଓବାଦୀମାନେ ପୁଲିସଙ୍କୁ ଚେଲେଞ୍ଜ କରୁଛନ୍ତି।