ମହୁମାଛି ଆକ୍ରମଣରେ ବିବାହିତ ଯୁବକ ମୃତ
ପାଇକସାହି: ମହୁମାଛି ଆକ୍ରମଣରେ ଜଣେ ବିବାହିତ ଯୁବକଙ୍କ ମୃତ୍ୟୁ ହୋଇଥିବା ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ ଅନ୍ତର୍ଗତ ଠାକୁରଗଡ଼ ଥାନାରେ ଅଭିଯୋଗ ହୋଇଛି । ମୃତକ ହେଲେ ପ୍ରଦୀପ ବେହେରା (୨୭) । ମହୁମାଛି ଆକ୍ରମଣରେ ପ୍ରଦୀପଙ୍କ ମୃତ୍ୟୁ ହୋଇଥିବା ତାଙ୍କର ବାପା ଅଭିଯୋଗ ଆଣିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ପ୍ରଦୀପଙ୍କ ଘର ଠାକୁରଗଡ଼ ଥାନା ଅନ୍ତର୍ଗତ ରାଣୀବନ୍ଧ ଗାଁ ହୋଇଥିବା ବେଳେ ସେ ଶ୍ୱଶୁର ଘରେ ରହି ଆସୁଥିଲେ । ୪ ବର୍ଷ ପୂର୍ବରୁ ସେ କୋରାବ ଗାଁରେ ବିବାହ କରିଥିଲେ । ତାଙ୍କର ଏକ ପୁଅ ଅଛି । ସେ ଗତକାଲି ଗାଁ ଜଙ୍ଗଲକୁ ମହୁ ସଂଗ୍ରହ କରିବାକୁ ଯାଇଥିଲେ । ଜଙ୍ଗଲରେ ଏକ କୁରୁମ ଗଛରେ ବାଘ ମହୁ ବସା ବାନ୍ଧିଥିଲେ । ନିଆଁ ଲଗାଇ ମହୁ ସଂଗ୍ରହ କରୁଥିବା ବେଳେ ମହୁମାଛିମାନେ ଆକ୍ରମଣ କରିଥିଲେ । ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା ।
ତେବେ ଗତକାଲି ପ୍ରଦୀପ ଘରକୁ ଫେରି ନଥିଲେ । ତେଣୁ ତାଙ୍କର ସ୍ତ୍ରୀ ବ୍ୟସ୍ତ ହୋଇ ପଡ଼ିଥିଲେ । ଆଜି ସେ ଗାଁର ଅନ୍ୟ ଲୋକଙ୍କ ସହିତ ଜଙ୍ଗଲକୁ ଯାଇ ସ୍ୱାମୀଙ୍କର ମୃତଦେହ ଠାବ କରିଥିଲେ । ପ୍ରଦୀପଙ୍କ ମୃତ୍ୟୁ ସଂପର୍କିତ ସୂଚନା ମିଳିବା ପରେ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ଆଠମଲ୍ଲିକ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲା । ପ୍ରଦୀପଙ୍କ ବାପାଙ୍କ ଅଭିଯୋଗ କ୍ରମେ ଠାକୁରଗଡ଼ା ଥାନା ପୁଲିସ ମାମଲା ରୁଜୁ କରି ଘଟଣାର ତଦନ୍ତ କରୁଛି ।