ପ୍ରବଳ କୁହୁଡି ଯୋଗୁ ଦୁଇ ବାଇକ ମୁହାଁମୁହିଁ ଧକ୍କା ହୋଇ ଚାରି ଜଣ ଗୁରୁତର

ଚିତ୍ରଡା: ଆଜି ସକାଳେ ପ୍ରବଳ କୁହୁଡି ଯୋଗୁଁ ରାସ୍ତାଘାଟ କିଛି ବି ଦେଖାଯାଉନଥିଲା। ଯାହାଫଳରେ ଦୁଇ ବାଇକ ମୁହାଁମୁହିଁ ଧକ୍କା ହେବାରୁ ୪ ଜଣ ଗୁରୁତର ଆହତ ହୋଇଥିବା ଜଣାପଡିଛି। ଖବରରୁ ପ୍ରକାଶ କି ମୟୂରଭଞ୍ଜ ଜିଲ୍ଲା ମୋରଡା ଥାନା ତଥା ଚିତ୍ରଡା ଫାଣ୍ଡି ଅଧିନସ୍ଥ ଅସ୍ତିଆଠାରେ ଆଜି ସକାଳ ପ୍ରାୟ ୬ ଟା ୩୦ ସମୟରେ ଦୁଇ ବାଇକ ମୁହାଁମୁହିଁ ଧକ୍କାରେ ଚାରି ଜଣ ଗୁରୁତର ହୋଇଥିବା ଜଣାପଡିଛି।

ବାରିପଦା-ଅମର୍ଦା ୬୧ ନଂ ରାଜ୍ୟ ରାଜପଥରେ ଚିତ୍ରଡା ପଟୁ ଯାଉଥିବା ଏକ ବାଇକରେ ଦୁଇ ଜଣ ବସିଥିବା ବେଳେ ବାରିପଦା ପଟୁ ଆସୁଥିବା ବାଇକରେ ମଧ୍ୟ ଦୁଇଜଣ ଥିଲେ। ଉଭୟ ବାଇକ ଧକ୍କା ହେବା ପରେ ଚାରି ଜଣ ଗୁରୁତର ଅବସ୍ଥାରେ ରାସ୍ତାରେ ଉପରେ ଛିଟିକି ପଡି ଗୁରୁତର ଅବସ୍ଥାରେ ପଡିରହିଥିଲେ।

ସ୍ଥାନୀୟ ଲୋକଙ୍କ ସହାୟତାରେ ଆମ୍ବୁଲାନ୍ସ ଜରିଆରେ ଗୁରୁତର ଆହତଙ୍କୁ ଚିକିତ୍ସା ନିମନ୍ତେ ନିକଟସ୍ଥ କିଶାନତାଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବା ଜଣାପଡିଛି। ତେବେ ଚାରି ଜଣ ଗୁରୁତର ଥିବାରୁ କାହାରି ପରିଚୟ ମିଳିପାରିନାହିଁ। ତେବେ ଘଟଣା ସମ୍ପର୍କରେ ମୋରଡା ଥାନା ଅଧିକାରୀ ଖବର ପାଇ ସଙ୍ଗେ ସଙ୍ଗେ ଚିତ୍ରଡା ଫାଣ୍ଡି ଅଧିକାରୀଙ୍କୁ ଘଟଣାସ୍ଥଳକୁ ପଠାଇଥିବା ଜଣାପଡିଛି। ପୁଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡିଛି।