ରାଇରଙ୍ଗପୁର: ବାଇକ୍ ଧକ୍କାରେ ନାତୁଣୀ ମୃତ, ଆଈ ଓ ନାତି ଗୁରୁତର
ରାଇରଙ୍ଗପୁର: ଆଈ ସହିତ ନାତି ଓ ନାତୁଣୀ ଗଛ ମୂଳେ ବସିଥିବା ବେଳେ ବାଇକ୍ ଧକ୍କା ଦେବାରୁ ଦୁଇ ବର୍ଷର ନାତୁଣୀ ମୃତ୍ୟୁବରଣ କରିଥିବା ବେଳେ ନାତି ଓ ଆଈ ଗୁରତର ଆହତ ହୋଇଥିବା ସୂଚନା ମିଳିଛି । ମୃତ ନାତୁଣୀ ଜଣକ ମହାଲକ୍ଷ୍ମୀ ମୁର୍ମୁ ବୋଲି ଜଣାପଡିଛି । ଦୁର୍ଘଟଣାଟି ଘଟିଛି ମୟୂରଭଞ ଜିଲ୍ଲା ବାଦାମପାହାଡ ଥାନା ସୁଲେଇପାଟ ଫାଣ୍ଡି ଅର୍ନ୍ତଗତ କୁଲଡିହା-ଜୟପୁର ରାସ୍ତାରେ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ କୁଲଡିହା ଗ୍ରାମର ଚାଷୀ ପରିବାର ବିଲ କାମ ସାରି ରାସ୍ତା କଡରେ ଥିବା ଗଛମୂଳେ ବିଶ୍ରାମ ନେଉଥିବା ସମୟରେ ଦ୍ରୁତ ଗତିରେ ଆସୁଥିବା ଏକ ବାଇକ୍ ଆଈ ସାକ୍ରୋ ମାଝୀ, ତାଙ୍କ ନାତି ରାଜକୁମାର ଓ ନାତୁଣୀ ମହାଲକ୍ଷ୍ମୀଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ଦୁଇ ବର୍ଷର ନାତୁଣୀର ମୃତ୍ୟୁ ହୋଇଥିବା ବେଳେ ନାତି ଓ ଆଈଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ରାଇରଙ୍ଗପୁର ହସ୍ପିଟାଲରେ ଭର୍ତ୍ତି କରାଯାଇଛି । ସେଠାରେ ଆଈଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜକୁ ସ୍ଥାନାନ୍ତରିତ କରାଯାଇଛି । ସୁଲେଇପାଟ ଫାଣ୍ଡି ଅଧିକାରୀ ଅବନୀ ପଣ୍ଡା କେସ୍ ନଂ ୮୨/୨୧ ରେ ଏକ ଦୁର୍ଘଟଣା ମାମଲା ରୁଜୁ କରି ଘଟଣାର ଅଧିକ ତଦନ୍ତ ଆରମ୍ଭ କରିଛନ୍ତି । ଦୁର୍ଘଟଣା ଘଟାଇଥିବା ବାଇକକୁ ପୁଲିସ ଜବତ କରିଥିବା ବେଳେ ଚାଳକ ଫେରାର୍ ଥିବା ସୂଚନା ମିଳିଛି ।