ବାଙ୍ଗିରିପୋଷି : କେନ୍ଦୁପତ୍ର ବୋଝେଇ ଟ୍ରକ ଜବତ, ୨ ଗିରଫ
ବାଙ୍ଗିରିପୋଷି : ବାଙ୍ଗିରିପୋଷି ବନବିଭାଗ ଦ୍ବାରା ଲକ୍ଷାଧିକ ଟଙ୍କାର କେନ୍ଦୁପତ୍ର ବୋଝେଇ ଟ୍ରକ ଜବତ ହେବା ସହିତ ଦୁଇ ଜଣ ଗିରଫ ହୋଇଛନ୍ତି । ଚୋରାରେ ଏସବୁ କେନ୍ଦୁପତ୍ର ସମ୍ବଲପୁରରୁ ପଶ୍ଚିମବଙ୍ଗର ଦଘା ଯାଉଥିବା ପ୍ରାରମ୍ଭିକ ତଦନ୍ତରୁ ଜଣାପଡିଛି ।
Sambad is now on WhatsApp
Join and get latest news updates delivered to you via WhatsApp
ଡିଏଫଓ ସଂୟମ ମଲ୍ଲିକଙ୍କ ନିର୍ଦ୍ଦେଶକ୍ରମେ ଡେପୁଟି ରେଞ୍ଜର ଶୈଳେନ୍ଦ୍ର ଦାସଙ୍କ ନେତୃତ୍ଵରେ ଏକ ଟିମ ଦିନ ୨ଟାରୁ ଦ୍ବାରଶୁଣୀ ଘାଟିରେ ଜଗି ରହିଥିଲା । ସଂଧ୍ୟା ୫ଟା ସମୟରେ ଛଅ ଚକିଆ ଟ୍ରକଟି ଘାଟି ଅତିକ୍ରମ କାଳରୁ ପିଛା କରି ବାଙ୍ଗିରିପୋଷି କଲିକତା ଛକ ପାଖରେ ଅଟକାଇବା ସହିତ ଜବତ କରିଥିଲା । ଏହାସହିତ ଝାଡଖଣ୍ଡ ଜିଲ୍ଲା ଗ୍ରିଡିର ଡ୍ରାଇଭର ନରେଶ କୁମାର ରଜକ ସହିତ ମେଦିନାପୁରର ହେଲପର ସୋଇଫୁଲ ଖାଁକୁ ଗିରଫ କରାଯାଇଛି । କେନ୍ଦୁପତ୍ରର ମୂଲ୍ୟ ୫ ଲକ୍ଷ ଟଙ୍କାରୁ ଅଧିକ ହେବ ବୋଲି ଡେପୁଟି ରେଞ୍ଜର କହିଛନ୍ତି । ଜବତ ସମୟରେ ଫରେଷ୍ଟର ଲକ୍ଷ୍ମୀକାନ୍ତ ବେହେରା, ଫରେଷ୍ଟ ଗାର୍ଡ ରଜନୀକାନ୍ତ ଦେହୁରୀ,ପ୍ରିତମ ସିଂ,ମଳୟ ମାହାନ୍ତ ସହିତ ଡ୍ରାଇଭର ତପନ ବେହେରା ଉପସ୍ଥିତ ଥିଲେ । ବନବିଭାଗ ଏକ ମାମଲା ରୁଜ୍ଜୁ କରି ତଦନ୍ତ କରୁଛି ।