ବେତନଟୀ ସଦର: ମୟୂରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅଧୀନ ୧୮ ନଂ ଜାତୀୟ ରାଜପଥର ପଦ୍ମନାଭପୁର ଟୋଲ ଗେଟ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ବାଇକରୁ ଛିଟିକି ପଡ଼ି ବସ ଚାପାରେ ଚାଲିଗଲା ଝାଡ଼ଖଣ୍ଡର ୧୭ ବର୍ଷୀୟ ନାବାଳକଙ୍କ ଜୀବନ।
ସୂଚନା ଅନୁଯାୟୀ, ଝାଡ଼ଖଣ୍ଡ ରାଜ୍ୟ ବଡ଼ସର ଥାନା ଅଧୀନ ବେଣାଶୂଳି ଅଞ୍ଚଳର ବୁକାଇ ମୁର୍ମୁଙ୍କ ପୁଅ ସୁନୀଲ(୧୭) ଓ ମଙ୍ଗଲ ମୁର୍ମୁଙ୍କ ପୁଅ ଚୁନୁ(୧୬) ବାଲେଶ୍ୱର ଜିଲ୍ଲା ସୋର ସ୍ଥିତ ଏକ ଚାଉଳ ମିଲରେ କାମ କରନ୍ତି। ଆଜି ଦୁହେଁ ସାଙ୍ଗ ହୋଇ ନିଜ ଘରକୁ ଯାଉଥିବା ସମୟରେ ବାଲେଶ୍ୱର ଠାରୁ ଏକ ଚାଳକକୁ ଲିଫ୍ଟ ମାଗିକରି ତା ସହିତ ଗୋଟିଏ ବାଇକରେ ୩ ଜଣ ବସି ବାରିପଦା ଅଭିମୁଖେ ଯାଉଥିଲେ। ହେଲେ ଦୁର୍ଭାଗ୍ୟବଶତଃ ପଦ୍ମନାଭପୁର ଟୋଲ ଗେଟ ଅତିକ୍ରମ କରିବାପରେ ବାଇକ ସାମ୍ନାକୁ ହଠାତ ଏକ ସ୍କର୍ପିଓ ଚାଲି ଆସିଥିଲା। ବାଇକ ଚାଳକ ଭାରସାମ୍ୟ ହରାଇ ସ୍କର୍ପିଓ ପଛପଟେ ଶକ୍ତ ଧକ୍କା ଦେଇ ତଳେ ପଡ଼ିଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ପରେ ବାଇକ ଚାଳକ ଓ ମଝିରେ ବସିଥିବା ଚୁନୁ ବାମ ପାର୍ଶ୍ୱକୁ ଛିଟିକି ପଡ଼ିଥିବାବେଳେ ସୁନୀଲ ଦକ୍ଷିଣ ପାର୍ଶ୍ୱକୁ ଛିଟିକି ପଡ଼ିଥିଲା ଓ ଠିକ ସେହି ସମୟରେ ପଛପଟୁ ବାଲେଶ୍ୱରରୁ ବାରିପଦା ଅଭିମୁଖେ ଯାଉଥିବା ବାସୁଦେବ ବସ ଚକ ତଳେ ସୁନୀଲ ପଡ଼ିଯାଇଥିଲା। ସୁନୀଲର ଅଣ୍ଟା ଉପର ଦେଇ ବସ ଚକ ଚାଲିଯାଇଥିବାବେଳେ ଘଟଣାସ୍ଥଳରେ ହିଁ ପ୍ରାଣବାୟୁ ଉଡ଼ିଯାଇଥିଲା। ହେଲେ ବାଇକ ଚାଳକ ଘଟଣାସ୍ଥଳରୁ ସଙ୍ଗେ ସଙ୍ଗେ ଚମ୍ପଟ ମାରିଥିଲା ।ସୁନୀଲର ଶବ ରାସ୍ତା ଉପରେ ପଡ଼ିଥିବା ତଥା ଦୁର୍ଘଟଣା ପାଇଁ ରାସ୍ତା ଉପରେ ସ୍ଥାନୀୟ ଲୋକ ରୁଣ୍ଡ ହୋଇଯିବା ଯୋଗୁଁ କିଛି ସମୟ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଥିଲା। ଖବର ପାଇ ବୈଶିଙ୍ଗା ଏସଆଇ ସୁମନ୍ତ ସେଠୀ ସଦଳବଳ ଘଟଣା ସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ମୃତକଙ୍କ ଶବକୁ ରାସ୍ତା ଉପରୁ ଉଠାଇବା ସହିତ ଆହତ ଚୁନୁକୁ ବୈଶିଙ୍ଗା ଡାକ୍ତରଖାନା ନେଇଯାଇଥିଲେ। ଦୁର୍ଘଟଣାରେ ସମ୍ପୃକ୍ତ ସ୍କର୍ପିଓ ଓ ବାସୁଦେବ ବସ ଆସି ବୈଶିଙ୍ଗା ଥାନାରେ ଆତ୍ମସମର୍ପଣ କରିଛନ୍ତି।