ଗୋରୁମହିଷାଣୀ: ମୟୁରଭଞ୍ଜ ଜିଲ୍ଲା ଗୋରୁମହିଷାଣୀ ଥାନା ଅଞ୍ଚଳରେ ଜଣେ ପ୍ରଧାନଶିକ୍ଷକଙ୍କୁ ବୀଭତ୍ସ ଭାବେ ହତ୍ୟା କରାଯାଇଛି । ଗତକାଲି ରାତ୍ରିରେ ତାଙ୍କ ବିଲ ନିକଟରୁ ରକ୍ତ ଜୁଡୁବୁଡୁ ମୃତଦେହ ଉଦ୍ଧାର କରାଯାଇଥିଲା। ଏପରି ଏକ ଅଘଟଣ ମୟୁରଭଞ୍ଜ ଜିଲ୍ଲା ଗୋରୁମହିଷାଣୀ ଥାନା ଚଢ଼େଇପାହାଡ଼ି ଗ୍ରାମ ପଂଚାୟତର ଜାମପାଣୀ ଗ୍ରାମର ଝାପ୍ଲାଆମ୍ବ ସାହିରେ ଘଟିଛି ।
Sambad is now on WhatsApp
Join and get latest news updates delivered to you via WhatsApp
ଘଟଣାରୁ ପ୍ରକାଶ ଯେ ପଡ଼ୋଶୀ ଝାଡ଼ଖଣ୍ଡ ରାଜ୍ୟ ଡୁମୁରିଆ ଥାନା ଅନ୍ତର୍ଗତ ଲୁପୁଙ୍ଗଡ଼ିହି ଗ୍ରାମର ସୁକଦେବ ମାରାଣ୍ଡି(୪୫) ସେହି ଗ୍ରାମର ପ୍ରାଥମିକ ବିଦ୍ୟାଳୟରେ ପ୍ରଧାନ ଶିକ୍ଷକ ଭାବେ ଅଛନ୍ତି । ତେବେ ଗତକାଲି ସନ୍ଧ୍ୟା ସମୟରେ ତାଙ୍କ ପଡ଼ୋଶୀଙ୍କ ସହିତ ଜମି ବିବାଦ ଓ ବାଡ଼ ଘେରିବାକୁ ନେଇ ପାଟିତୁଣ୍ଡ ହୋଇଥିଲା । ଏଥିରେ ପଡ଼ୋଶୀ ମଦନ ମୁର୍ମୁ (୫୦) ଓ ତାଙ୍କ ପୁଅ ଲାଲମୋହନ ମୁର୍ମୁ (୨୩) ଉତକ୍ଷିପ୍ତ ହୋଇ ସୁକଦେବଙ୍କୁ କୁରାଢ଼ୀ ଏବଂ କଟୁରି ସାହାଯ୍ୟରେ ଆକ୍ରମଣ କରିଥିଲେ । କୁରାଢ଼ୀ ଏବଂ କଟୁରି ଚୋଟରେ ସୁକଦେବ ଘଟଣାସ୍ଥଳରେ ହିଁ ଟଳି ପଡ଼ି ମୃତ୍ୟୁ ଘଟିଥିଲା ବୋଲି ଅଭିଯୋଗ ହୋଇଛି । ଏ ସମ୍ବନ୍ଧରେ ଗତକାଲି ରାତ୍ରିରେ ଗୋରୁମହିଷାଣୀ ଥାନାଧିକାରୀ ଫନିନ୍ଦ୍ର ଭୂଷଣ ନାଏକ ଓ ପ୍ରଶାନ୍ତ କୁମାର ସ୍ବାଇଁ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିଥିଲେ ଏବଂ ଦୁଇ ଅଭିଯୁକ୍ତଙ୍କୁ ଗିରଫ କରିଥିଲେ ।
ଆଜି ସକାଳୁ ବାରିପଦା ସାଇଣ୍ଟିଫିକ୍ ଟିମର ଅଫିସର ଯଶବନ୍ତ ଦେହୁରୀ ଏବଂ ତାଙ୍କ ଟିମ ପହଞ୍ଚି ତଦନ୍ତ ଆରମ୍ଭ କରିଥିଲେ । ପୋଲିସ ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁରକୁ ପଠାଇଛି । ଏ ନେଇ ଗୋରୁମହିଷାଣୀ ଥାନାରେ କେସ ନମ୍ବର ୬/୨୦ରେ ଏକ ହତ୍ୟା ମାମଲା ରୁଜୁ ହୋଇଛି । ତେବେ ଏପରି ସମ୍ବେଦନଶୀଳ ଘଟଣାକୁ ପୋଲିସ ଅତ୍ୟନ୍ତ ଗୁରୁତ୍ୱ ସହକାରେ ଗ୍ରହଣ କରିଥିବା ଜଣାପଡିଛି ।