କାର୍ଯ୍ୟରେ ଯୋଗଦେଲେ ମୟୂରଭଞ୍ଜର ନୂତନ ଜିଲ୍ଲାପାଳ ହେମକାନ୍ତ ସଏ

ବାରିପଦା: ସୋମବାର ଦିନ ମୟୂରଭଞ୍ଜର ନୂତନ ଜିଲ୍ଲାପାଳ  ହେମକାନ୍ତ ସଏ ଜିଲ୍ଲା ସଦର ମହକୁମା ବାରିପଦାସ୍ଥିତ ଜିଲ୍ଲାପାଳ ନିଜ କାର୍ଯ୍ୟାଳୟରେ ଯୋଗଦାନ କରିଛନ୍ତି। ଜିଲ୍ଲାପାଳ ଶ୍ରୀ ସଏଙ୍କୁ ଅତିରିକ୍ତ ଜିଲ୍ଲାପାଳ ନେତ୍ରାନନ୍ଦ ମଲ୍ଲିକଙ୍କ ସମେତ, କଲେକ୍ଟରେଟରେ କାର୍ଯ୍ୟରତ ଡେପୁଟି କଲେକ୍ଟର ଓ ଅନ୍ୟାନ୍ୟ କର୍ମଚାରୀଗଣ ସ୍ୱାଗତ କରିଥିଲେ ଏବଂ ଶ୍ରୀ ସଏ ବିଧିବଦ୍ଧ ଭାବରେ ସରକାରୀ ନିୟମ ଅନୁସାରେ ଅଧିକାରୀକ ପତ୍ରରେ ଦାୟିତ୍ୱ ଗ୍ରହଣ କରିଥିଲେ।

ସୂଚନାନୁସାରେ, ପଞ୍ଚାପୀଢ଼ ଉପଖଣ୍ଡ ପାଇଁ ସୋମବାର ଦିନ ଜନଶୁଣାଣୀ, ସଦର ମହକୁମା କରଞ୍ଜିଆଠାରେ ଥିବା ବେଳେ, ଜିଲ୍ଲାପାଳ କରଞ୍ଜିଆ ସ୍ଥିତ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଏହି ଜନଶୁଣାଣୀ କାର୍ଯ୍ୟକ୍ରମରେ ଯୋଗ ଦେବେ ଏବଂ ସେଠାରୁ ଫେରି ଜିଲ୍ଲାସ୍ତରୀୟ ସ୍ୱାଧୀନତା ଦିବସ ପାଳନ ତଥା ଘରେ ଘରେ ତ୍ରିରଙ୍ଗା ସମାରୋହ ପାଇଁ ସମସ୍ତ ଅଧିକାରୀମାନଙ୍କ ସହିତ ଆଲୋଚନା କରିବେ। ଜିଲ୍ଲାପାଳ ଶ୍ରୀ ସଏ ଏହା ପୂର୍ବରୁ ନୂଆପଡ଼ା ଜିଲ୍ଲାର ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ।

୨୦୧୭ ବ୍ୟାଚର ଭାରତୀୟ ପ୍ରଶାସନିକା ସେବା ଅଧିକାରୀ ଶ୍ରୀ ସାଏ ଏହା ପୂର୍ବରୁ କୋରାପୁଟରେ ଜ଼ିଲ୍ଲା ପରିଷଦର ମୁଖ୍ୟ ନିର୍ବାହୀ ଅଧିକାରୀ ଭାବେ କାର୍ଯ୍ୟ କରିଛନ୍ତି। ଜଣେ ମେଳାପୀ ଏବଂ ମିଷ୍ଟଭାଷୀ ବ୍ୟକ୍ତି ଭାବେ ଜଣାଶୁଣା ଶ୍ରୀ ସଏଙ୍କ ନିଜ ଘର କେନ୍ଦୁଝର ଜିଲ୍ଲା ଘଟଗାଁ ଅଞ୍ଚଳରେ। ମୟୂରଭଞ୍ଜ ଜିଲ୍ଲା ସହିତ ଶ୍ରୀ ସାଏଙ୍କ ସମ୍ପର୍କ ଅତି ନିବିଡ... ଆଇଏଏସ ଶିକ୍ଷାନବୀଷ ଭାବରେ ସେ ମୟୁରଭଞ୍ଜ ଜିଲ୍ଲାରେ ମଧ୍ୟ କାର୍ଯ୍ୟ କରିଛନ୍ତି ବୋଲି ମଧ୍ୟ ସୂଚନା ରହିଛି। ମୟୁରଭଞ୍ଜ ଜିଲ୍ଲା ଜଣେ ଓଡ଼ିଆ ଆଇଏଏସ ଅଧିକାରୀଙ୍କୁ ମୟୂରଭଞ୍ଜ ଜିଲ୍ଲାରେ ଜିଲ୍ଲାପାଳ ରୂପରେ ଅନେକ ଦିନ ପରେ ପାଇଥିବାରୁ ଜନ ମାନସରେ ଏକ ଅଭୂତପୂର୍ବ ଖୁସି ପରିଲକ୍ଷିତ ହୋଇଛି।