ହାତୀ ଆକ୍ରମଣରେ ଜଣଙ୍କର ମୃତ୍ୟୁ
ବେତନଟୀ: ଝାଡ଼ଖଣ୍ଡ ପଟୁ ପଳାଇ ଆସିଥିବା ୭୧ଟି ହାତୀ ଗତ ୩ ଦିନ ହେଲା ମୟୂରଭଞ୍ଜ ସମେତ ବାଲେଶ୍ବର ଜିଲ୍ଲାର ବସ୍ତା ଓ ଜଳେଶ୍ବର ଅଞ୍ଚଳରେ ଆତଙ୍କ ଖେଳାଇଛନ୍ତି। ହାତୀ ଆକ୍ରମଣରେ ଆଜି ଜଣେ ଯୁବକଙ୍କର ପ୍ରାଣ ଯାଇଛି। ସେ ହେଲେ ବେତନଟୀ ଥାନା ଛଚିନାପଦା ନୂଆଗାଁ ଗ୍ରାମର ସିଂରାୟ ମାଝୀ (୪୬)।
Sambad is now on WhatsApp
Join and get latest news updates delivered to you via WhatsApp
ଶନିବାର ସକାଳ ପ୍ରାୟ ସାଢ଼େ ୭ଟା ସମୟରେ ଛଚିନାପଦା ନୂଆଗାଁ ଗ୍ରାମର ୭ ଜଣ ଯୁବକ ଗାଁ’ ମୁଣ୍ଡ ଜଙ୍ଗଲ ପାଖକୁ ଶୌଚ ହେବାକୁ ଯାଇଥିଲେ। ଏହି ସମୟରେ ଏକ ଦନ୍ତା ବୁଦା ଉହାଡ଼ରୁ ବାହାରି ସେମାନଙ୍କୁ ଗୋଡ଼ାଇଥିଲା। ୬ ଜଣ ଯୁବକ ଦନ୍ତା ହାବୁଡ଼ରୁ ଖସି ଆସିଥିବାବେଳେ ସିଂରାୟ ମାଝୀ ତଳେ ପଡ଼ି ଯାଇଥିଲେ। ଦନ୍ତା ତାଙ୍କୁ ଶୁଣ୍ଢରେ ଟେକି କଚାଡ଼ି ଦେଇଥିଲା। ଫଳରେ ତାଙ୍କ ମୁଣ୍ଡ ଓ ଶରୀରରେ ଗଭୀର କ୍ଷତ ସୃଷ୍ଟି ହୋଇଥିଲା।
ଖବର ପାଇ କୃଷ୍ଣଚନ୍ଦ୍ରପୁର ବନରକ୍ଷୀ ରାଇଧନ ସିଂ ଓ ଗ୍ରାମବାସୀ ସିଂରାୟଙ୍କୁ ଉଦ୍ଧାର କରି ବେତନଟୀ ଡାକ୍ତରଖାନା ଆଣିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାରିପଦା ସ୍ଥାନାନ୍ତର କରିବାବେଳେ ବାଟରେ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ବେତନଟୀ ରେଞ୍ଜ ଅଧିକାରୀ ଘନଶ୍ୟାମ ସିଂ ଓ ବନପାଳ ପିକେ ସିଂ ସାମନ୍ତ ଡାକ୍ତରଖାନାରେ ପହଞ୍ଚି ମୃତକଙ୍କ ପରିବାର ଲୋକଙ୍କୁ ଭେଟି ସହାୟତା ପ୍ରତିଶ୍ରୁତି ଦେଇଥିଲେ। ଏ ନେଇ ବେତନଟୀ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।