ଅଜଣା ଗାଡ଼ି ଧକ୍କାରେ ଚାଲିଗଲା ମାନସିକ ବିକାରଗ୍ରସ୍ତ ଯୁବକଙ୍କ ଜୀବନ

ବେତନଟୀ ସଦର: ବୈଶିଙ୍ଗା ଥାନା ଅଧୀନ ୧୮ନଂ ଜାତୀୟ ରାଜପଥର ଖଇରିବଣି ଛକ ନିକଟରେ ମଙ୍ଗଳବାର ବିଳମ୍ବିତ ରାତିରେ ଏକ ଅଜଣା ଗାଡ଼ି ଧକ୍କାରେ ଜଣେ ଯୁବକଙ୍କ ଶୋଚନୀୟ ମୃତ୍ୟୁ ଘଟିଛି। ଏଯାଏ ଯୁବକଙ୍କ ପରିଚୟ ପାଇନି ବୈଶିଙ୍ଗା ପୁଲିସ।

ସୂଚନା ଅନୁଯାୟୀ, ଗତକାଲି ରାତି ପ୍ରାୟ ୩ଟା ସମୟରେ ଖଇରିବଣି ଛକ ନିକଟରେ କୌଣସି ଏକ ଦ୍ରୁତଗାମୀ ଗାଡ଼ି ଧକ୍କାରେ ଜଣେ ଅଜଣା ଯୁବକଙ୍କ ଘଟଣାସ୍ଥଳରେ ଶୋଚନୀୟ ମୃତ୍ୟୁ ଘଟିଥିଲା। ହେଲେ ଘଟଣାସ୍ଥଳରୁ ଧକ୍କା ଦେଇଥିବା ଗାଡ଼ିଟି ଚମ୍ପଟ ମାରିଥିଲା। ତେବେ ବୈଶିଙ୍ଗା ପୁଲିସର ପେଟ୍ରୋଲିଙ୍ଗ ଭ୍ୟାନ ଉକ୍ତ ରାସ୍ତାରେ ଯାଉଥିବାବେଳେ ପ୍ରଥମେ ମୃତ ଯୁବକକୁ ଦେଖିଥିଲେ ଓ ଶବକୁ ଉଦ୍ଧାର କରି ବୈଶିଙ୍ଗା ଡାକ୍ତରଖାନାକୁ ନେଇଯାଇଥିଲେ। ହେଲେ ଏପର୍ଯ୍ୟନ୍ତ ମୃତ ଯୁବକଙ୍କ ପରିଚୟ ପାଇନି ପୁଲିସ।

ସ୍ଥାନୀୟ ଲୋକଙ୍କ କହିବା ମୁତାବକ ଉକ୍ତ ଯୁବକ ମାନସିକ ବିକାରଗ୍ରସ୍ତ ହୋଇ ୨ଦିନ ହେଲା ଉକ୍ତ ଅଞ୍ଚଳରେ ଘୁରି ବୁଲୁଥିଲା। ବୈଶିଙ୍ଗା ଥାନାର ଏଏସଆଇ ସୁବ୍ରତ ସାହୁ ୨୭/୨୪ରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛନ୍ତି।