ଭୁବନେଶ୍ୱରରେ ମୋବାଇଲ ଏଟିଏମ ସେବା, ନବରଙ୍ଗପୁରରେ କରୋନା ପାଇଁ ମୋକିଆ ଏସବିଆଇ ଶାଖା ବନ୍ଦ
୧୫ରେ ଖୋଲିବା ନେଇ ନୋଟିସ
ଭୁବନେଶ୍ୱର: ରାଜଧାନୀ ଭୁବନେଶ୍ୱରର ନିଷିଦ୍ଧାଞ୍ଚଳରେ ମୋବାଇଲ ଏଟିଏମ ସେବା ଜାରି ରହିଛି । ବର୍ତ୍ତମାନ ଏହା ସୂର୍ଯ୍ୟନଗର ଅଞ୍ଚଳରେ ଆକ୍ସିସ ବ୍ୟାଙ୍କର ଏହି ମୋବାଇଲ ଏଟିଏମ୍ ଭ୍ୟାନ ବୁଲୁଛି । ଆସନ୍ତାକାଲି ଠାରୁ ପର୍ଯ୍ୟାୟକ୍ରମେ ଭୁବନେଶ୍ୱରର ଅନ୍ୟ ଅଞ୍ଚଳରେ ଏହି ସେବା ଦିଆଯିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ନବରଙ୍ଗପୁରରେ କରୋନା ନେଇ ବ୍ୟାଙ୍କ ବନ୍ଦ। ଆସନ୍ତା ୧୫ ତାରିଖରେ ପୁଣି ଖୋଲିବ। ଏପରି ନୋଟିସ ମରାଯାଇଛି ବ୍ୟାଙ୍କ ଫାଟକରେ। ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ମୋକିଆ ଭାରତୀୟ ଷ୍ଟେଟ୍ ବ୍ୟାଙ୍କ ଶାଖା ଫାଟକରେ ଏକ ନୋଟିସ ମରାଯାଇ ଆଜି ଠାରୁ ବ୍ୟାଙ୍କ କୁ ବନ୍ଦ ରଖାଯାଇଛି। ଉକ୍ତ ନୋଟିସ୍ ରେ ଉଲ୍ଲେଖ କରାଯାଇଛି ଯେ କରୋନା ମୁକାବିଲା କରିବା ପାଇଁ ଗତ ୩୧ ତାରିଖ ଠାରୁ ସମସ୍ତ କର୍ମଚାରୀଙ୍କୁ ଘରୋଇ ସଙ୍ଗରୋଧ ହୋଇ ରହିବା ପାଇଁ କୁହାଯାଇଛି। ଆସନ୍ତା ୧୪ ତାରିଖ ପର୍ଯନ୍ତ ସମସ୍ତ କର୍ମଚାରୀ ମାନେ ନିଜ ନିଜ ଘରେ ସଙ୍ଗରୋଧ ହୋଇ ରହିବେ।
୧୪ ଦିନ ସଙ୍ଗରୋଧ ହୋଇ ରହିବା ପରେ ଆସନ୍ତା ୧୫ ତାରିଖ ରେ ବ୍ୟାଙ୍କ ଖୋଲାଯିବ ବୋଲି ଉଲ୍ଲେଖ କରାଯାଇଛି। ଉକ୍ତ ନୋଟିସରେ ଉଚ୍ଚ କତ୍ତୃପକ୍ଷଙ୍କ ନିର୍ଦ୍ଧେଶ ଅନୁଯାୟୀ ସମସ୍ତ କର୍ମଚାରୀ ମାନେ ଘରୋଇ ସଙ୍ଗରୋଧ ହୋଇ ରହିବା କଥା ଉଲ୍ଲେଖ କରାଯାଇଛି। ତେବେ ଗତ କାଲି ପାପଡାହାଣ୍ଡି ବିଡିଓ ରଂଜିତା ମଲ୍ଲିକ ବ୍ୟାଙ୍କ କୁ ଯାଇ ଶାଖା ପରିଚାଳକଙ୍କ ସହ କଥା ହୋଇ ଆସିଥିଲେ। ତେବେ ଆଜି ଠାରୁ ବ୍ୟାଙ୍କ କୁ ବନ୍ଦ ରଖାଯାଇଛି। ତେବେ କରୋନାକୁ ନେଇ ବ୍ୟାଙ୍କ ବନ୍ଦ ହେବା ନୋଟିସ ମରାଯିବା ପରେ ମୋକିଆ ଗ୍ରାମରେ ସାଧାରଣ ଜନତାଙ୍କ ମହଲରେ ଏକ ଭୟ ସୃଷ୍ଟି ହୋଇଥିବା ଜଣାପଡିଛି।