ମାସେ ବ୍ୟାପୀ ସଡ଼କ ସୁରକ୍ଷା କାର୍ଯ୍ୟକ୍ରମର ଶୁଭାରମ୍ଭ
ଖୋର୍ଦ୍ଧା: ଆଜି ଖୋର୍ଦ୍ଧା ଜିଲ୍ଲା ମହକୁମାରେ ମାସେ ବ୍ୟାପୀ ସଡ଼କ ସୁରକ୍ଷା କାର୍ଯ୍ୟକ୍ରମର ଶୁଭାରମ୍ଭ ହୋଇଛି । ଏହି ଅବସରରେ ସଡ଼କ ପରିବହନ ଓ ପୁଲିସ୍ ବିଭାଗ ପକ୍ଷରୁ ବିଭିନ୍ନ ସଚେତନତା କାର୍ଯ୍ୟକ୍ରମ ଗ୍ରହଣ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
୧୮ ତାରିଖ ଠାରୁ ଫେବ୍ରୁଆରି ୧୭ ତାରିଖ ଯାଏଁ ହେବାକୁ ଥିବା ସଡ଼କ ସୁରକ୍ଷା କାର୍ଯ୍ୟକ୍ରମ ଆଜି ଖୋର୍ଦ୍ଧାରେ ଶୁଭାରମ୍ଭ ହୋଇଛି । ଏହି ଅବସରରେ ପୂର୍ବାହ୍ନ ସାଢ଼େ ୯ଟାରେ ଏକ ସଚେତନତା ରାଲି ଅନୁଷ୍ଠିତ ହୋଇଥିଲା । ରାଲି ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରୁ ବାହାରି ନୂଆବସଷ୍ଟାଣ୍ଡ ଦେଇ ଷ୍ଟେଟବ୍ୟାଙ୍କ ଛକରେ ପହଞ୍ଚିଥିଲା।
ଏହି ରାଲିରେ ଜିଲ୍ଲାପାଳ ସନତ କୁମାର ମହାନ୍ତି ଓ ଆରକ୍ଷୀ ଅଧିକ୍ଷକ ଅଜୟ ପ୍ରତାପ ସ୍ୱାଇଁ ଅତିଥୀ ଭାବେ ଯୋଗ ଦେଇଥିଲେ । ରାଲିରେ ସ୍ୱେଚ୍ଛାସେବୀ, ପୁଲିସ୍ କର୍ମଚାରୀଙ୍କ ସମେତ ରିଜର୍ଭ ଇନ୍ସପେକ୍ଟର ନାଗେଶ ଜେନା ଯୋଗ ଦେଇଥିଲେ । ରାଲିକୁ ସହକାରୀ ଆଞ୍ଚଳିକ ପରିବହନ ଅଧିକାରୀ ବୃନ୍ଦାବନ ସାହୁ ଓ ଏମଭିଆଇ ଅମିତ କୁମାର ରଣା ପରିଚାଳନା କରିଥିଲେ ।
ଏହାସହ ଏକ ସଡ଼କ ସୁରକ୍ଷା ସଚେତନତା ରଥ ମଧ୍ୟ ବାହାରିଥିଲା । ଏହି ରଥ ଖୋର୍ଦ୍ଧା ସହର ପରିକ୍ରମା କରିବା ସହ ବିଭିନ୍ନ ଛକ ଓ ପ୍ରମୁଖ ସ୍ଥାନଗୁଡ଼ିକରେ ନାଚଗୀତ ମାଧ୍ୟମରେ ଲୋକଙ୍କୁ ସଡ଼କରେ ଗାଡ଼ି ଚଲାଇବା, ଗାଡ଼ି ଚଲାଇବା ସମୟରେ ନିଶା ନଖାଇବା, ହେଲମେଟ ପିନ୍ଧିବା ଆଦି ନିୟମ ସମ୍ପର୍କରେ ସଚେତନ କରାଇଥିଲେ । ଏହାସହ ଜିଲ୍ଲା ମୁଖ୍ୟଚିକିତ୍ସାଳୟରେ ଭାରିଯାନ ଚାଳକଙ୍କ ଚକ୍ଷୁ ପରୀକ୍ଷା କରାଯାଇଥିଲା । ଏଥିରେ ୨୭ଜଣ ଗାଡ଼ିଚାଳକ ନିଜ ଚକ୍ଷୁ ପରୀକ୍ଷା କରାଇବା ସହ ଡାକ୍ତରଙ୍କ ଠାରୁ ଆବଶ୍ୟକ ପରାମର୍ଶ ନେଇଥିଲେ ।